பதிவுலகில் பரபரப்பை ஏற்படுத்தப் போகும், பதிவர்களுக்கு பரவசத்தை கொடுக்கப் போகும் கிளு கிளுப்பான் பின்னூட்ட மெசின்!

புத்தம் புதிய கண்டு பிடிப்பு!

அகில உலகப் பதிவுலக வரலாற்றில் விற்பனைச் சந்தையில், வசூலில் சாதனை படைத்த- பதிவினைப் படிக்காது கமெண்ட் போடும் நபர்களைக் கண்டறியும் நோக்கில் "மூலக் கருத்தை முகர்ந்து அறி" எனும் தொழில் நுட்பத்தின் அடிப்படையில் நாற்று வலைப் பதிவின் சொந்தக்காரர் செல்வராஜா நிரூபன் அவர்களால் கண்டு பிடிக்கப்பட்ட "ஸ்மார்ட் கமெண்ட் பவுண்டர் (SMART COMMENT FOUNDER) சிஸ்டத்தின்" வெற்றியினைத் தொடர்ந்து, தற்போது இரண்டாவது கண்டு பிடிப்பாக நிரூபன் அவர்களின் முயற்சியிலும், நிகழ்வுகள் கந்தசாமி அவர்களின் வடிவமைப்பிலும் பதிவுலகச் சந்தைக்கு வந்துள்ள புத்தம் புதிய மெசின் தான் கிளு கிளுப்பான் பின்னூட்ட மெசின்! (SMART COMMENT FOUNDER SYSTEM பற்றி அறியாதோர் இந்த இணைப்பில் சென்று பார்க்கலாம்)

பதிவுலகில் யார் யார் பதிவினைப் படித்துப் பின்னூட்டம் எழுதுகின்றார்கள்? பதிவினைப் படிக்காது எத்தனை பேர் பின்னூட்டம் இடுகின்றார்கள்? எனப் பதிவுலக ஜாம்பவான்களும், பதிவுலக சமூக சீர்திருத்த வாதிகளும் நீண்ட நாட்களாக யோசித்து; மண்டையினைப் பிய்த்து தலையில் எஞ்சி இருந்த முடிகளும் காற்றில் பறந்து தம் மண்டை சைக்கிள் பெல் மூடிக்கு ஒப்பானதாக மாறி மன அழுத்தத்திற்கு உள்ளாகி இருக்கும் சூழலில் என்னுடைய கடும் உழைப்பின் மூலமாகவும்; "சகோதரன் நிகழ்வுகள் வலைப் பதிவின் சொந்தக்காரன் கந்தசாமி" அவர்களின் டிசைனிங் உதவியில் இக் குறைகளினை நிவர்த்தி செய்யும் நோக்கில் உருவாக்கப்பட்டது தான் கிளு கிளுப்பான் பின்னூட்ட மெசின்!

"அண்மைக் காலமாக பதிவுலக வரலாற்றில் நிலவும் தமிழ்மண டாப் 20 போட்டி முறையின் காரணமாக பதிவர்கள் பலர் அசுர வேகத்தில் தினந் தோறும் இடை விடாது பதிவுகளைப் போட்டி போட்டு எழுதிக் குவித்து வரும் சூழ் நிலையில், பதிவினைப் படித்துப் பின்னூட்டம் போடுகின்ற நபர்களின் எண்ணிக்கை என்பது குறைவாக இருக்கின்றது என "அகில உலகத் தமிழ்ச் சமூக சீர் திருத்தப் பதிவர் குழுமம்" எனும் அமைப்பினால் வெளியிடப்பட்ட கண்ணீர் கலந்த அறிக்கையினைத் தொடர்ந்து, பதிவர்களின் பதிவுகளைப் படிக்காமல் பின்னூட்டம் போடுகின்ற குறைகளை நிவர்த்தி செய்யும் நோக்கில் உருவாக்கப்பட்டது தான் இந்த கிளு கிளுப்பான் பின்னூட்ட மெசின்!

கிளு கிளுப்பான் பின்னூட்ட மெசின் பற்றிய அறிமுகம்!

*கையினுள் அடங்கும் வகையில் - கைக்கடக்கமாக சிறியதொரு அலைபேசியின் அளவிற்கு ஒப்பானதாக தயாரிக்கப்பட்டிருக்கும் இந்த கிளு கிளுப்பான் மெசின் ஆனது, உலகின் எப்பாகத்திலும் எந் நேரத்திலும் சாட்டிலைட் உதவியுடன் தொழிற்படக் கூடிய வல்லமை கொண்டது.

*WEAPONS, FOOD, TASTE, KUMMI, COMMENT ஆகிய ஐந்து பட்டன்களையும், ஒரு பிரதான - MENU பட்டனையும், உள்ளடக்கியுள்ளது இந்த கிளு கிளுப்பான் மெசின்.  

* "ஒரு தடவை என் பதிவை எழுதிப் பப்ளிஷ் பண்ணினா, அதில் என்ன தவறு இருந்தாலும் மறுபடியும் நான் படிக்க மாட்டேன் - பதிவினைத் திருத்த மாட்டேன்" என அடம் பிடிக்கும் பதிவர்களின் உணர்வுகளுக்கு முன்னுரிமை கொடுத்து, தானியங்கி முறையில் அப் பதிவுகளில் உள்ள வழுக்களைத் திருத்தும் வசதியினையும் கொண்டுள்ளது இந்த சிஸ்டம்.

*ஒலி வடிவில் பதிவுகளைப் படித்து (Reader)  உங்கள் செவியில் ஆட்டோ மெட்ரிக் தொழில் நுட்பத்தில் இயங்கும் லேடிஸ் வாய்ஸ் மூலமாக அப் பதிவினைப் பற்றிய விடயங்களைச் சொல்லுகின்ற தானியங்கி இயல்பு இம் மெசினுக்கு உண்டு.

*மெனு பட்டனில் கிளிக் செய்து, உங்களின் வலைப் பதிவு முகவரியினை, அல்லது நீங்கள் படிக்க விரும்பும் வலைப் பதிவு முகவரியினைக் கொடுத்தால் போதும். அதிலுள்ள பதிவினைப் படித்து, நீங்கள் விரும்பின் உங்களுக்குப் பதிவினைப் பற்றிய கருத்துக்களைப் பகிர்ந்து கொள்ளும் இந்த சிஸ்டம். 

இல்லையேல் தானாகவே பதிவிற்குப் பொருத்தமான பின்னூட்டத்தினை - நீங்கள் மனதினுள் நினைக்கும் பின்னூட்டத்தினைத் தானியங்கி முறையில் நீங்கள் விரும்பும் மொழியில் பப்ளிஷ் செய்யும் இந்த சிஸ்டம்.

*பதிவெழுதி விட்டுத் தமது பதிவுகளுக்கு இன்னமும் பின்னூட்டம் வரவில்லையே என ஏங்கும் அன்பர்களிற்கும்; "பின்னூட்டங்களுக்குப் பதில் எழுதுவது பின்னூட்டங்களின் எண்ணிக்கையினை அதிகரித்துக் காட்டவா?" எனும் அறியாமையில் உள்ளோருக்கும், அதிகளவான பின்னூட்டங்களை வழங்கும் நோக்கிலும், அவரவர் தமது ப்ளாக்கிற்கு ஏற்ற வகையில் தமக்குத் தாமே பின்னூட்டங்களைப் போட்டு மகிழ்ச்சியடையும் வண்ணமும் இந்த சிஸ்டம் வடிவமைக்கப்பட்டுள்ளது. 

*காப்பி பேஸ்ட் பதிவுகள், படிக்கப்படவில்லையே, அவற்றிற்கு அதிகளவான பின்னூட்டங்கள் கிடைக்கவில்லையே எனும் ஆதங்கத்திற்கு முற்றுப் புள்ளி வைத்து, பதிவினை விட, மிகவும் நீண்ட பின்னூட்டங்களை அள்ளி வழங்கும் வகையில் இந்த கிளு கிளுப்பான் சிஸ்டம் கை கொடுக்கும். 

கிளு கிளுப்பான் சிஸ்டத்தை ஆப்பிரேட் செய்வது எப்படி!

* WEAPONS, FOOD, TASTE, KUMMI, COMMENT, ஆகிய ஐந்து பட்டன்களில் நீங்கள் விரும்பிய வகையில் பின்னூட்டங்களை அளித்து மகிழலாம்.

*WEAPONS  எனும் பட்டனை அழுத்தினால் நீங்கள் விரும்பும் பதிவிற்கு "கத்தி, கோடாரி, அருவாள், துப்பாக்கி, தோட்டா, கடப்பாரை" எனும் பாணியில் உலகின் இருக்கும் அத்தனை ஆயுதங்களின் பெயரினையும் அடுத்தடுத்து அதிர்ச்சியூட்டும் கமெண்டுகளாகப் போட்டு, பின்னூட்டங்களின் எண்ணிக்கையினை அதிகரித்துக் காட்ட முடியும்.

*FOOD என்ற பட்டனை அழுத்தினால் போதும், வடை, பஜ்ஜி, பரோட்டா, போண்டா, சமோசா, பால் கோப்பி எனப் பல வகையான சுவையான உணவுகளின் பெயரினைப் பதிவினைப் படிக்காது பின்னூட்டமாக வழங்கும் தன்மை கொண்டது இந்த மெசின்.

*TASTE என்ற பட்டனை அழுத்தினால் போதும், நீங்கள் விரும்பும் எந்த மாதிரியான பதிவுகளுக்கும், "ஆகா, அருமை, ஓகோ, சூப்பர், கலக்கிட்டாய் மச்சி, எப்படி இப்படி?, சான்ஸே இல்ல, செம தூக்கல், செம ஹாட்" எனும் பாணியிலான பின்னூட்டங்களை அடுத்தடுத்து எழுதி அறுபது பின்னூட்டங்கள் எனும் எண்ணிக்கையினை ஒரு நிமிட நேரத்தில் எட்டும் தனித் தன்மையும் இம் மெசின் மூலம் கிடைக்கும்.

*KUMMI என்ற பட்டனை அழுத்தினால் மொக்கைப் பதிவுகள், சீரியஸ் பதிவுகள், சாதாப் பதிவுகள் என அனைத்து வகையான பதிவுகளுக்கும், தமிழில் உள்ள 247 எழுத்துக்களை உள்ளடக்கிய கும்மிப் பின்னூட்டங்களை வழங்கும் இந்த மெசின்.

*COMMENT எனும் பட்டனை அழுத்தினால்; ஆட்டோமெட்ரிக் ரீடர் முறையில் பதிவினைப் படித்து உங்கள் காதுகளில் தேன் போன்ற குரலோசை மூலம் அப் பதிவின் உள்ளடக்கத்தினைச் சொல்லும் இம் மெசினில், அப் பதிவிற்கு நீங்கள் எவ் வகையான கருத்தினை எழுதப் போகிறீர்களோ, அதனை மனதில் நினைத்தாலே போதும். இரண்டு செக்கனில் நீங்கள் மனதில் நினைத்த பின்னூட்டம் அந்தப் பதிவில் பப்ளிஷ் ஆகும்.

ஸ்பெஷல் ஆப்பர்: 

*கிளு கிளுப்பான் சிஸ்டத்தை வாங்குவதன் மூலம் இனிமேல் அலுவலகங்களில், பாடசாலைகளில், ஆப்பிஸ்களில் மேலாதிகரிக்குப் பயந்து கம்பியூட்டரில் பதிவினைப் படித்துக் கமெண்ட் போடும் அன்பர்களிற்கு முதன்மை கொடுக்கும் வண்ணம் தமது மனித உடலின் எப் பாகத்தில் சொருகியிருந்தாலும், உணர்வுகள் மூலம் நீங்கள் மனதினுள் நினைக்கும் பதிவர்களின் பதிவினைப் படித்து அதன் சாராம்சத்தினைச் சொல்லும் இயல்பு கொண்டது இந்த கிளு கிளுப்பான் மெசின்.

*கிளு கிளுப்பான் சிஸ்டத்தினை வாங்கும் ஒவ்வொருவருக்கும் சாட்டிலைட் கனெக்சன் இலவசம்.

*இன்று இரவு இந்திய - இலங்கை நேரப் படி நள்ளிரவு 12.00 மணிக்கு ரிலீஸ் செய்யப்படும், இந்த கிளு கிளுப்பான் பின்னூட்ட மெசினை நீங்கள் நாளை காலை ஆறு மணியிலிருந்து அமெரிக்கா, ஐரோப்பயா, ஆபிரிக்கா, மத்திய கிழக்கு, தென்னாசிய நாடுகளில் நீங்கள் ஆன்லைனில் பணம் செலுத்தி ஆடர் செய்வதன் மூலம் பெற்றுக் கொள்ள முடியும்.

www.kizhukizuppancomment.com

உறவுகளே, கிளு கிளுப்பான் பின்னூட்ட மெசினை வாங்குவதாக பிளான் பண்ணி விட்டீர்களா?

விலையோ குறைவு, ஆனால் இதன் விவேகமோ அதிகம்!!
*கிளு கிளுப்பான் மெசினை வாங்கப் போகும் முதல் பத்து வாடிக்கையாளர்களுக்கு 10% வீத விலைக் கழிவும், வேலாயுதம் படம் ரிலீஸாகுவதற்கு ஐந்து நாட்கள் முன்பதாகவே அப் படத்தினைப் பார்த்து விமர்சனம் எழுதும் சந்தர்ப்பமும் வழங்கப்படும்.

 
*முதல் பத்து வாடிக்கையாளர்களில் தேர்ந்தெடுக்கப்படும் ஐவருக்கு, எமது கிளு கிளுப்பான் பின்னூட்ட மெசினைப் பிரபலமாக்கும் வகையில் நடிகை ஹன்சிகா, மற்றும் அனு ஆகியோர் எமக்காக நடித்துக் கொடுக்கப் போகும் விளம்பர சூட்டிங்கை தூரத்தே இருந்து பார்த்து ரசிக்கும் சந்தர்ப்பம் மட்டும் வழங்கப்படும்.

*இதன் விலை இலங்கை ரூபாயில் வெறும் 1021 ரூபா .49காசுகள் மட்டுமே
இந்தியாவில் 250 ரூபா 6காசுகள் மட்டுமே.
சர்வதேச நாடுகளில்,அந் நாட்டின் நாணயப் பெறுமதியினைப் பொறுத்தும், தொடர்பு கொள்ளும் நபரைப் பொறுத்தும் விலை விகிதம் வேறுபடும்!
முகவர்களுக்கும் முன்னுரிமை உண்டு, இன்றே தொடர்பு கொள்ளுங்கள்
Kizhukizuppan Comment Machine 

Smart Academy Lap
No 251 ஆரிய குளம்
அடங்கா நல்லூர்
யாழ்ப்பாணம்
தொலை பேசி 0094- 7773333444
மின்னஞ்சல் comment@kizukizuppan.com

இன்றே முந்துங்கள்! இப் பொழுதே விரையுங்கள்!
கையிருப்பில் குறைந்தளவு ஸ்டொக் மாத்திரம் இருப்பதால் இன்றே தொடர்பு கொள்ளுங்கள்.
Hurry up., Don't miss your massive offer!

******************************************************************************************************************************

உலகில் கவிதைகளின் வடிவங்கள் மாற்றமடைந்து வரும் இச் சூழலில்; எம் தமிழ் இலக்கிய சூழலில் மரபுக் கவிதை எனும் முதிர் கன்னி மீது உள்ள காதலும் மரபின் கடின நடை காரணமாகப் பலருக்கு கசப்பினை ஏற்படுத்தி வருகின்றது.  

மரபுக் கவிதை மீதான இளையவர்களின் ஆர்வத்தினை அதிகரிக்கும் வண்ணம் இலகு நடையில் - எளிமையாக மரபுக் கவிதைகளை வழங்குகின்ற புலவர்களை நாம் இன்றைய கால கட்டத்தில் விரல் விட்டு எண்ணி விட முடியும்.

கடுந் தமிழில் மரபெழுதினால் தான் அதற்கு மரபுக் கவிதை என்று பெயர் எனக் கவித்துவம் பேசும் இன்றைய சூழலில் எளிமையான மொழி நடையில் மரபுக் கவிதைகளைப் பகிர்ந்து வருபவர் தான் புலவர் சா. இராமாநுசம் அவர்கள். 

80வது அகவையினை நெருங்கிக் கொண்டிருக்கும் சூழலிலும், இன்றும் இளமைத் துடிப்போடு வீரியமிக்க மரபுக் கவிதைகளைத் தன்னுடைய வலைப் பதிவில் பகிர்ந்து வருகிறார் புலவர் சா.இராமாநுசம் அவர்கள்.

புலவர் சா.இராமாநுசம் அவர்களின் வலைப் பதிவிற்குச் செல்ல:

http://pulavarkural.blogspot.com/

***************************************************************************************************************************************************************************

Share