குளு குளு குற்றாலத்தில் கிளு கிளு நடிகையுடன் குளித்த பிரபல பதிவர்!

அறிவிப்பு: அரபு நாட்டில் தண்ணீர் பஞ்சம் எனப் பொய் சொல்லிக் குளிக்காது; தற்போது தமிழகத்திற்கு திடீர் விஜயம் மேற்கொண்டு தண்ணீர் மேல் உள்ள தன் கண்டத்தினைப் போக்கும் நோக்கில் நீர் நிலைகளில் திவ்ய தரிசனம் செய்யும் பதிவருக்கும்,  இச் சிறுகதைக்கும் யாராவது தொடர்பிருக்கென்று கருதினால். அதற்கு நிர்வாகம் பொறுப்பல்ல.

*************************************************************************************

''டிரிங்.....டிரிங்..............டிரிங்............டிரிங்................... எனத் தொலைபேசி மணி அடிக்க, பல நாட்கள் குளிக்காததால், உடலில் படிந்திருந்த அழுக்கு கட்டிலோடு ஸ்டிக்கர் போல ஒட்டிக் கொள்ள, தன்னைச் சுதாகரித்துக் கொண்டு, அவசர அவசரமாக கட்டிலில் இருந்து எழுந்து,

’ஹலோ....யாரு பேசுறது? எனக் கேட்டவாறு தனது டாப்போ டீப்போ தொலைபேசியினைக் காதில் வைத்தார் குணா.

’’ஆய், அப்பா, நான் வர்ஷி பேசுறேன். எப்படி இருக்கிறீங்க அப்பா. என மறு முனையில் குணாவின் ஆசை மகள் வர்ஷி தொடர்ந்தார்.

’’நான் இருக்கேன்டா செல்லம், வூட்டிலை அம்மா எப்படி இருக்கிறா. நீ சாப்பிட்டியா..எனக் கேள்வி மேல் கேள்விகளை அடுக்கிக் கொண்டு போன வர்ஷியிடமிருந்து, இப்படி ஒரு கேள்வி திடீரென்று புற்றீசல் போல வருமென்று பதிவர் குணா எதிர்பார்த்திருக்க மாட்டார்.

‘அப்பா குளிச்சீங்களாப்பா.....

பதிவர் தன்னை யாரோ திருப்பாச்சி அருவாள் கொண்டு வெட்டுவதற்குப் பதிலாக, நடு ரோட்டில் நிற்க வைத்து டவுசரை உருவுவது போன்ற மன நிலைக்குத் தள்ளப்பட்டார். ’’ச்சே....என் மகளா என்னைப் பார்த்து இப்படிக் கேட்டிருக்கிறாள்.

’’என்ரை செல்லமெல்லே, என் டாடிச் செல்லக் குட்டியெல்லே. உங்களுக்கு அப்பா ஊருக்கு வரும் போது அமெரிக்கன் மிலிட்டரி லப்டாப்பும், ஐஸ்லாந் மேட் இன் ஐ பாட்டும் வாங்கிட்டு வாரேன்’ என்று குணா கதையினை வேறு பக்கம் திருப்ப முனைந்தார்.

ஆனாலும் ஐந்து வயதான சுட்டி வர்ஷி, ’’அப்பா ஐஸ்லாந்திலை எங்கப்பா ஐ பாட் செய்வாங்க. நீங்க நல்லாத் தான் ரீலு வுடுறீங்க. நான் என்ன சின்னப் புள்ள என்றா நெனைச்சீங்க. நான் இப்போ பெரிய பொண்ணு. என்னை ஏமாத்துற வேலை எல்லாம் வைச்சுக்காதீங்க. என்னை ஏமாத்தனும் என்று நெனைச்சீங்க. நீங்க குளிக்காத மேட்டரைப் புதுசா ஒரு ப்ளாக் தொடங்கி எழுதிடுவேன் ஜாக்கிரதை’ என்று வர்ஷி பேசியதும் தான் தாமதம்,

‘’செல்லம் அம்மாகிட்டப் போனைக் குடுக்கிறீங்களா. நான் பேசனும், என்றவாறு அந்தக் குழந்தையின் விருப்பமின்றியே போனை மனைவி ஷீலாவின் கைகளுக்கு மாற்றினார் குணா.

‘என்னங்க எப்படி இருக்கிறீங்க. சாப்பிட்டீங்களா... அப்புறம் குளிச்சீங்களா? என மனைவி ஷீலாவிடமிருந்து வந்த கேள்விகளால் கடுப்படைந்த குணா, ‘உனக்கென்ன நேர காலம் தெரியாதா?

இப்போ காலங்காத்தாலை தான் எந்திருக்கேன். நீ வேறை போனைப் பண்ணுறாய்? என்னோடை ஆசை மனைவியெல்லே,

நான் கேட்கிறேன் என்று கோவிச்சுக்காதே?

‘இப்போவெல்லாம் நான் குளிக்கிறேல்லை என்ற சேதியை யார் உனக்குச் சொன்னது? மெதுவாச் சொல்லு பார்க்கலாம்.... எனக் கெஞ்சலுடன் கேட்டார் குணா.

’’என்னங்க ஒரு பெரிய பொய்யை விடுறீங்க. நீங்க இப்ப மட்டும் தான் குளிப்பதில்லை என்று?ஊரிலுருந்து அரபு நாட்டிற்குப் போகும் போது குளிச்சதுக்கு இப்ப வரைக்கும் நீங்க குளிக்கலை என்று ப்ளாக்கிலை வேறு அரேபியாவில் இருந்து எழுதியிருக்கிறாங்க. ஊருக்கே தெரிஞ்ச விசயம், உங்க பெண்டாட்டி எனக்குத் தெரியாமலா இருக்கும்?

’அடிப் பாவி ஷீலா, நீ ப்ளாக் எல்லாம் படிப்பியா?

’’ப்ளாக் எல்லாம் படிப்பேனா?  சமையல் முடிஞ்சாப் பிறகு எனக்கு என்ன வேலை?

ப்ளாக் படிப்பது தானே. ப்ளாக் படிக்கலைன்னா, நீங்க இந்தியாவை விட்டு 2009ம் ஆண்டு கிளம்பியதிலிருந்து இற்றை வரை குளிக்காமல் நாற நாற ‘அரபு நாட்டு அஸ்கி ஜாஸ்மீன் பெர்ஃபியூமை அடிச்சுக் கொண்டு வேலைக்குப் போய் வாற கதை எனக்குத் தெரிஞ்சிருக்குமா சொல்லுங்க.

பதிவர் நிலை தடுமாறிப் போனார். இதற்கு மேலும் பேசினால், தன் ஒட்டு மொத்த மானத்தையும் தனது ஆசை மனைவி ஷீலாவே கப்பலேற்றி விடுவாள் என்பதால், ’நான் இப்போ அவசரமாக டாய்லெட்டுக்குப் போகனும்’ எனக் கூறிப் பேச்சை மாற்றினார். குணா ஆழ்ந்த சிந்தனையில் ஆழ்ந்தார். ஒரு மனிதன் குளிக்கவில்லை என்பதையுமா ப்ளாக்கில் எழுதி நாறடிப்பாங்க. ’முதல்ல இப்போ அரேபியாவில் இருந்து என் வாழ்கையில் கலியை(துன்பத்தை) உண்டாக்கிய அந்த கலியுகம் பதிவரைத் தேடிப் பிடிக்கனும்.

’பயங்கர வீக்கிலிக்ஸ் ஆளா இருப்பானோ அந்தக் கலியுகம் பையன்?

’பின்னே நான் ஒருத்தன் குளிக்காமல் என்ன பாடி ஸ்பிரே யூஸ் பண்ணிக் கொண்டு இங்கே இருக்கேன் என்பதை மோந்து பிடித்து மானத்தைக் கப்பலேற்றியிருக்கிறான். அவன் மட்டும் என் கையில் கிடைக்கனும், செத்தான் அவன்’ எனக் கோப மிகுதியால் அரபி ஒருவன் சியேர்ஸ் சொல்லி தேநீர் குடிக்க கொடுத்த அழகிய மார்பிள் கிளாஸை உடைத்தெறிந்தார்.

அவசர அவசரமாக டாய்லெட்டுக்குப் போயிட்டு, வந்த பின்னர், குணா வேலைக்கு கிளம்பினார். அவர் வேலை செய்யும் இடத்தில் தன் பதவிக்குப் பதிலாக மாட்டி வைத்திருக்கும் வசனமான

‘அரபு நாட்டில் தண்ணீர் பஞ்சம்

ஐயா குளிக்கலைன்னா வாட்டர் பில் மிஞ்சும்!

எனும் வசனத்தையும் யாராச்சும் பார்த்துப் போட்டோ புடிச்சு ப்ளாக்கில் போட்டிட்டால், ஊருக்குப் போய் ஏர் போட்டில் இறங்கும் போது தண்ணி பவுசரோடு ஒரு குழு நம்மளைக் குளிப்பாட்டும் நோக்கோடு காத்திருப்பாங்க எனும் நினைப்பில், மேற்படி வசனம் எழுதிய போர்ட்டை முறித்துக் குப்பையில் போட்டார் குணா.

இன்று மாலை எப்படியாச்சும் அரபியிடம் பேசி, ஊருக்குப் போவதற்கான லீவினை உறுதிப்படுத்த வேண்டும் எனக் காத்திருந்த குணாவிற்கு, அரபியே ஒன்றரை மாத விடு முறையோடு, மும்பையின் புகழ் பூத்த அரபுக் கடலில் நீராடி மகிழ்வதற்கும், அழகிகள் மசாஜ் செய்வதற்கென புக் பண்ணப்பட்ட பவுச்சரையும்(Voucher) குணாவின் கையில் கொடுத்தார்.  இதனால் அளவில்லா மகிழ்ச்சியடைந்த குணா, தான் ஊருக்குப் போவதற்குரிய நாட்களை எண்ணிக் கொண்டிருந்தார்.

ஊருக்குப் போகும் காலத்தில் ஈரோட்டில் ஒரு பதிவர் சந்திப்பு இடம் பெறவுள்ள தகவலும் குணாவின் காதுகளுக்கு எட்டியது. எப்படியாவது பாரத மண்ணில் கால் வைத்து, அங்கேயுள்ள அரபுக் கடலில் குளித்து, பதிவர் சந்திப்பிற்கு கம கமெவென்று வாசனை வீச, அனைத்துப் பதிவர்களும் தான் நடக்கும் போது தன் உடல் வாசனையினை நுகர்ந்து பார்த்து வியப்படைய வேண்டும் எனும் எண்ணங்கள் மனத் திரையில் ஓடிக் கொண்டிருக்க, அரபி கொடுத்த மசாஜ்- குளியல் வவுச்சரைத் தன் சேர்ட் பாக்கட்டினுள் வைத்தவாறு, நடந்து சென்ற குணாவுக்கு அதிர்ச்சி காத்திருந்தது.

தண்ணீரில் குணாவிற்கு உள்ள கண்டத்தை உறுதி செய்வது போல, எங்கிருந்தோ வீசிய பாலைவனப் புழுதிப் புயல், குணாவின் பாக்கட்டினுள் இருந்த அந்த வவுச்சரையும் தன்னோடு காவிச் சென்று விட்டது. குணா, ’சரி, நாம குளிப்பது கூட அரபு தேசப் பாலைவன புழுதிப் புயலுக்கும் புடிக்கலை’ எனத் தன் மனதைத் தேற்றிக் கொண்டார். ’அட, இந்த வவுச்சர் போனால் என்ன, நான் நாகர்கோயிலிலும், குற்றாலத்திலும் எப்படியோ குளிக்கத் தானே போறேன் எனத் தன் மனதைத் திடப்படுத்தியவாறு, பயணத்திற்குரிய ஆடைகளைப் பொதி செய்து, தன் பயண நாளுக்காக காத்திருந்தார் குணா. 

அரபு தேசத்திற்கு விடை கொடுத்து, இந்திய மண்ணினுள் காலடி எடுத்து வைத்த குணா, நேரடியாக நாகர்கோயிலிற்குச் சென்றால், தன் உடலில் இருந்து வெளிப்படும் குளிக்காத அழுக்கு நாற்றத்தினால் தன்னை அறிந்தவர்கள், தெரிந்தவர்கள் புறக்கணிப்பார்களே எனக் கருதி மும்பை ஏர்போர்ட்டில் இறங்கினார். ஏர்போட்டில் இறங்கி வெளியே வந்ததும் தான் குணாவிற்கு இப்போது இந்தியாவில் கத்தரி வெய்யில் எனும் நினைப்பு வெளியே வந்தது.

அடடா, உடம்பெல்லாம் வியர்க்கப் போகிறதே, என்ன பண்ணலாம் என யோசித்தவருக்கு, தெருவோரத்தில் இருந்த ஐஸ்கட்டி வியாபாரி கண்ணில் தென் பட்டார். மூன்று கிலோ ஐஸ்கட்டிப் பையினை வாங்கித் தான் போகும் வழியெங்கும்,  தன் உடல் மீது கொட்டிக் கொண்டு நடந்தார் குணா. மும்பையிலிருந்து புகை வண்டி மூலமாக நாகர்கோயிலுக்கு வரும் வரைக்கும், 

அஸ்மி ஜாஸ்மீன் பாடி ஸ்பிரேயை அரை மணி நேரத்திற்கொரு தரம் அடித்துக் கொண்டே வந்தார் குணா.

நாகர்கோயிலில் வரவேற்க ஆவலோடு காத்திருக்கும் தனது மனைவி ஷீலாவும், மகள் வர்ஷியும் ஓடோடி வந்து ஆவலுடன் குணாவை இறுக்கி அணைத்து மகிழுவார்கள் என நினைத்த குணாவிற்கு ஏமாற்றத்துடன் கூடிய அவமானம் தான் கிடைத்தது. ‘நீயெல்லாம் குளிக்காமல் இருக்கிறியே அப்பா, உனக்கு வெட்கமா இல்லே?

பாடி ஸ்பிரே வைச்சு அடிச்சுக் கொண்டு திரியுறியே...உனக்கு இது அவமானமா இல்லே...எனும் மகள் வர்ஷியின் கேள்விகள் குணாவின் அடி மனதை வெகுவாகப் பாதித்தது.

’எல்லோரும் ஒரு ரெண்டு நாள் டைம் குடுங்க’. நான் குற்றாலத்தில் போய் குளிக்கிறேன்’ எனச் சொல்லி விட்டு, குற்றாலத்தில் இடம் பெறும் பதிவர் சந்திப்பிற்குத் தன்னைத் தயார்படுத்த தொடங்கினார் குணா. 

‘தன் உடம்பெங்கும் நறுமணம் கம கம என்று வீசும் வண்ணம் அஸ்மி ஜாஸ்மீன் அரபு ஸ்பெசல் பாடி ஸ்பிரேயை அடித்துக் கொண்டு சென்ற குணாவைக் கண்ட ஏனைய பதிவர்கள் முகத்தைச் சுழிக்கத் தொடங்கினார்கள். சந்திப்பில் இருந்த ஒரு பெண் பதிவர் ‘ஓடோடிச் சென்று வாந்தியெடுப்பதற்காக வெளியே போனதும்’ இனியும் பொறுத்தல் அழகில்லை எனப் பொங்கியெழுந்த ஆப்பிசர் சங்கரன், 

குணாவிடம் தனிப்பட்ட முறையில் பேசி, குளிப்பதற்குரிய சம்மதத்தை வாங்கினார்.

தனக்கு முன்னே நடிகை குளிக்கும் காட்சி காண்பிக்கப்பட்டால் தான் குளிப்பேன் என அடம்பிடித்தார் குணா. எந்த நடிகையின் காட்சி என்று தெரியாததால், அரங்கில் இருந்த அனைவரும் குழம்பி விட்டார்கள். இறுதியில் அந்த நடிகை என்று குணா சொல்ல, ஆப்பிசர் அந்த நடிகையின் குளு குளியல் கட் அவுட்டினைத் தாயார் செய்து, குற்றாலத்திற்குப் போகும் வண்டியில் அனுப்பி வைத்தார் ஆப்பிசர் சங்கரன். 

குணா பலரது பெரும் முயற்சிகளின் பின்னர், குற்றாலத்தில் குளிப்பதற்குத் தயாரானார். குற்றாலத்திற்குப் போகும் வழியில் குணாவுடன் கூடச் சென்ற விஸ்வா, ’’ஏன் குணா அண்ணே, நீங்க குளிப்பதில்லை, ஏன் குணா அண்ணே உங்களுக்கு தண்ணியென்றால் பயம்...என குணாவின் பொறுமையினைச் சோதிக்கும் வகையில் அடுக்கடுக்காக கேள்வி மேல் கேள்விகளைக் கேட்டுக் கொண்டு வந்தார். வேறு வழியின்றிக் குணா தன் நினைவுகளை மீட்டத் தொடங்கினார்.

’’ஓ....அதுவா...அரேபியாவிற்குப் போக முன்னாடி, ஒருவாட்டி நாகர்கோயிலில் ஆற்றில் நண்பர்களோடு, இடுப்பில் துண்டை மட்டும் கட்டிக் கொண்டு குளிச்சிக்கிட்டிருந்தேன். திடீரென என் இடுப்பில் இருந்த சிறு துண்டும் ஆற்றுத் தண்ணீரோடு சேர்ந்து போய் விட்டது. அப்புறம் எப்பூடி நான் ஆற்றில் இருந்து வெளியேறுவது. என் நண்பர்களுக்கு மேட்டர் என்னான்னு தெரியாமல், என்னைக் கரையேறச் சொல்லிக் கேட்டாங்க. ஆனால் உடம்பில் ஒரு பொட்டுத் துணி கூட இல்லாமல் எப்படிக் கரையேற முடியும்? ஆதலால், நண்பர்கள் வூட்டுக்குப் போனதுக்கப்புறம் நான் வெளியே வந்து துணி மாத்திக்கலாம் என்று இருந்தப்போ,

யாரோ ஒருத்தன் ‘நாஞ்சில் குணா ஆற்றுக்குள்ளே சாதனை செய்யுறான் என்று தகவல் கொடுத்து விட, ஊரிலை உள்ள மீடியாகாரங்க, பத்திரைக்காரங்க எல்லோருமே ஆற்றைச் சுற்றிக் கூடிட்டாங்க. வேறு வழி?

தண்ணிக்குள்ளே நின்றே ஒரு பேட்டி கொடுத்தேன்.  இந்தக் கருமாந்திரத்தை சன் டீவி வேறு லைவ் டெலிக்காஸ்ட் பண்ணப் போறதா பர்மிஷன் கேட்டிச்சு. நான் தான் கடைசி நேரத்திலை உணமையைச் சொல்லி, உலக அளவில் நான் பேமஸ் ஆக கிடைச்ச சந்தர்ப்பத்தை கெடுத்திட்டேன். என கண்களில் கண்ணீர் மல்க தன் சோக கதையினக் கூறி முடித்தார் குணா. 

இவ்ளோ பெரிய கதையை குணா சொல்லி முடித்துப் பக்கத்தில் இருந்த விஸ்வாவைத் திரும்பிப் பார்த்தார். அவன் அரைத் தூக்கத்தில் சீத்துவாயினை அருகே இருந்த பதிவர் செந்தில் மீது ஊற்றிக் கொண்டிருந்தான். சே...கறுமம் கறுமம்.........என்று குணா கத்தவும், குற்றாலம் இறக்கம் என டிரைவர் சொல்லவும் சரியான டைம்மிங்காக அமைந்தது. குற்றாலத்தில் நடிகையின் கட் அவுட்டினை வைத்துப் பதிவரைக் குளிப்பாட்ட அனைவரும் ரெடியாகிய வேளை ஆப்பிசர் சங்கரன் தொலைபேசி அழைப்பொன்றை மேற்கொண்டார். 

‘ஏம்பா, விஸ்வா இந்தக் குற்றாலம் அருவித் தண்ணியிலை கலப்படம் ஏதுமிருக்கா என்று குளிக்க முன்னாடி செக் பண்ணினியா?

நான் ஜிஸ்கி புஸ்கா என்று ஒரு மிசின் தந்தேனே அதை வைச்சு, ஒருவாட்டி குற்றாலம் அருவியில் கலப்படம் ஏதாச்சும் இருக்கா என்று செக் பண்ண முடியுமா? என விஸ்வாவிற்கு கடுப்பேற்றிக் கொண்டிருந்தார் ஆப்பிசர்?

‘ஆப்பிசர், அருவித் தண்ணியிலை எப்பூடிக் கலப்படம் இருக்கும்? என்ன என் கூட விளையாடுறீங்களா? என்னை என்ன லூசென்று நினைச்சீங்களா? என விஸ்வா கோபப்பட்டார்,

ஆப்பிசர் மறு முனையில் போடாங்......’தண்ணியிலை அந்த தண்ணி கலந்திருக்கா என்று செக் பண்ணடா......ராஸ்கல்’ என்று பேசிவிட்டு போனைக் கட் பண்ணினார்.

பலத்த சிரமங்களின் பின்னர், இரண்டு வருடங்களாக குளிக்காத ஒருவரைக் குளிக்கச் செய்து விட்டோம் என்ற மகிழ்ச்சியில் செந்திலும், விஸ்வாவும் துள்ளிக் குதித்தனர்.  குற்றாலப் பயணம் நிறைவுற்ற பின்னர், குணாவுக்கு தண்ணி மீதிருந்த கண்டமெல்லாம் நீங்கி விட்டது போலும், இப்போது ஒவ்வோர் நாளும் ஒவ்வோர் அருவி என அளவற்ற மகிழ்ச்சியோடு நீராடி மகிழ்கிறார்.

கடந்த வாரம், குணாவுவிற்கு அலைபேசி அழைப்பொன்றை மேற்கொண்டிருந்தேன். ‘ஹலோ குணா அண்ணாவோடு பேச முடியுமா? எனக் குரல் கொடுத்த எனக்கு, மறு முனையில் ஒரு மழலைக் குரல் கேட்டது. 

‘நான் வர்ஷி பேசுறேன். அப்பா இப்போ குளிக்கிறார்’ அப்புறமா போன் பண்றீங்களா’.

’ஓக்கே நான் அப்புறமா போன் பண்றேன்’ எனச் சொல்லி விட்டு, அழைப்பினைத் துண்டித்து விட்டு, ஒரு கணம் குணாவினை நினைத்து மனதினுள் சிரித்தேன்!

                                                                                                             யாவும் கற்பனையே............

பிற்சேர்க்கை: வழமை போல இப் பதிவிற்கும் படங்களினைத் தன் கை வண்ணத்தால் கலக்கலாக வடிவமைத்தவர் சகோதரன் நிகழ்வுகள் வலைப்பதிவு ஓனர் கந்தசாமி.

Share