மகிந்தவுக்கு செய்வினை வைக்க முடியுமா- ஒரு சவால்!

இப் பதிவின் நோக்கம், ஒரு சில விடயங்களினைத் தெளிய வைப்பதாகும். இப் பதிவில் வரும் கருத்துக்கள் யாவும் தமிழ் ஊடகங்களின் செய்திகளை அடிப்படையாக வைத்தே தொகுக்கப்பட்டுள்ளன. இங்கே எழுதப்பட்டுள்ள என்னுடைய தனிப்பட்ட கருத்துக்களை, ஊடகங்களில் வரும் செய்திகளை அடிப்படையாகக் கொண்டு வினாக்களாக மாத்திரம் முன் வைக்கிறேன். 

இந்து மத நம்பிக்கையாளர்களிடமும், கடவுள் இருக்கிறார் என்று ஆணித்தரமாக கூறும் இந்து மத மக்களிடமும் என் மனதில் இருக்கும் சந்தேகங்களை முன் வைக்கலாம் என நினைக்கிறேன்.

‘’அரசன் அன்று கொல்வான், தெய்வம் நின்று கொல்லும்’ எனும் வாக்கினை அடிப்படையாக வைத்தும், எம்மை விட மேலான ஒருவன் - கடவுள் என்ற பெயரில் இவ் உலகத்தில் இருக்கிறான் என குறிப்பிடும் மக்களிடமும் நான் முன் வைக்கும் வினா, இது தான், 

இன்றையா கால கட்டத்தில் யுத்தம் மூலம் பல கோயில்களை இடித்து, பல மக்களைக் கொன்றதாக நீங்கள் அனைவரும் சொல்லும் இலங்கை ஜனாதிபதி மகிந்தவிற்கு உங்களால்- நீங்கள் வணங்கும் கடவுளால் என்ன செய்ய முடியும்?

அடுத்த வினா, செய்வினை, சூனியம், பிசாசு, மாந்திரீகம், பேய் கட்டுதல் பற்றிய நம்பிக்கைகள் எனக்கு இல்லை; என்றாலும், இன்றும் எங்கள் ஊர்களில், ஊருக்கு அண்மையாக செய்வினை, சூனியம் முதலியவற்றால் பீடிக்கப்பட்ட மக்களை மீட்பதற்கு பூசாரிகள் என்ற பெயரில் ஒரு சிலர் கோயில்களில் அமர்ந்துள்ளார்கள். இவர்களைப் பற்றிப் பலர் வாயிலாக அறிந்துமுள்ளேன். 

சமீபத்தில் கூட, பல வருடங்களுக்கு முன்னர் ஏற்பட்ட பகைமை உணர்வினை அடிப்படையாக வைத்துச் செய்யப்பட்ட செய்வினை மாந்திரீகச் செயற்பாட்டின் காரணத்தால், பாதிக்கப்பட்டு, துன்பத்திற்குள்ளாகிப் பேய்களுடன் பேசிக் கொண்டிருந்த நபர் என்று ஒருவரை ஆலயத்திற்கு அழைத்து வந்து, அந்த மாந்திரிகள் அவரில் இருந்த பேயை விரட்டியதாக ஊர் மக்கள் பேசுகிறார்கள்.

இந்த மனிதரில் பிடிக்கப்பட்ட பேயினை விரட்டிய பின்னர், அவரில் இருந்த பேய்களுடன் பேசும் குணங்கள், தன்னை மறந்து செய்வினையின் காரணமாக வாய் ஓயாது அலப்பறை கொட்டும் குணங்கள் நீங்கி விட்டதாக எமது தேநீர்க் கடைச் சந்தியில் பேசி மகிழ்ந்தார்கள்.

இதனை விட, இப்போது யாழ்ப்பாணத்தில் பேய் விரட்டுவோர், செய்வினை- சூனியம் முதலியவற்றால் பாதிக்கப்பட்டோருக்கு விடுதலை அளிப்போர் என ஒரு குழுவினர் தமிழகத்தில் இருந்தும், இந்தியாவின் கேரளத்தில் இருந்தும் வருகை தந்துள்ளதோடு, பத்திரிகைகளிலும் விளம்பரங்கள் கொடுத்து மக்களிடம் ஏமாற்றிப் பணம் பறிப்பதில் குறியாக இருக்கிறார்கள்.

ஈழத்திலும் செய்வினை சூனியம் நிகழ்வுகளில் சிறந்தவர்களாக மட்டக்களப்பில் வாழும் மாந்திரிகர்கள் விளங்குவதாக அறிந்துள்ளேன். இந்த மாந்திரிகர்களின்- சக்திக்கு உதாரணமாக, ஒருவர் உட்கார்ந்திருக்கிறார் என்றால், அவரை அறியாமலே அந்த இடத்தில் இருந்து வேறு இடத்திற்கு அவரைத் தூக்கக் கூடிய சக்தி படைத்தவர்கள் என்று கூறுவார்கள். 

ஒரு மனிதனின் தலை முடி, காலடி மண், அவனது ஆடைகள், இவற்றில் ஏதாவது ஒன்றினை எடுத்து, செய்வினை - சூனியம் செய்தால் வாழ் நாள் பூராகவும் அவனைத் துன்பத்திற்கு ஆளாக்க முடியும் என்று கூறுகிறார்கள்.

இத்தனை தகவல்களையும் அடிப்படையாக வைத்து, இந்த மந்திரவாதிகளிடம் நான் கேட்கும் கேள்வி, உங்களால்

இலங்கையின் ஜனாதிபதியாகத் தற்போது உள்ளவரும், நவீன துட்டகைமுனு என்று இலங்கையின் பெரும்பானை இனச் சகோதர்களால் அழைக்கப்படுபவரும்,

போர் குற்றங்கள் புரிந்தவர் என்று உலகச் செய்தி நிறுவனங்களால் ஆதாரங்களுடனும் சொல்லப்படுகின்றவருமான

மகிந்த ராஜபக்சேவிற்கு, 

உங்களால் செய்வினை செய்ய முடியுமா?

இது மதவாதிகளிடமும், மாந்திரீக வித்தை செய்வோரிடமும் நான் விடும் பகிரங்க சவால். இது. 

கடவுள் இருக்கிறார், மாந்திரீக வித்தைகள் உண்மை என்று சொல்லுகின்ற உங்களிடம் நான் கேட்பது இது தான். 

இன்று உலகின் பல நாடுகளில் வாழும் தமிழ் மக்கள் மனங்களுக்கு எதிரியாகவும், போர்க் குற்றங்கள் புரிந்தவராகவும், 

தமிழருக்கான தீர்வினைக் கொடுக்காது, ஏமாற்றி வருகின்றவர் இந் நபர் தான் என்று நீங்கள் சொல்லுகின்ற ஜனாதிபதி மகிந்தவுக்கு உங்களால் செய்வினை வைக்க முடியுமா? பேய் ஏவி விட முடியுமா? இல்லை கடவுளால் தான் இந் நபரின் அசைவினைத் தடுக்க முடியுமா?

அப்போ எங்கே கடவுள்! மாந்திரீக வித்தைகள் என்பது பொய்யா?

பதிவினை முழுமையாகப் படிக்காது, வெள்ளை வான் அனுப்ப முயற்சி செய்வோர் கவனத்திற்கு:

இலங்கையின் அதிபர் மகிந்தவினை இப் பதிவிற்கான ஓர் உதாரணமாகத் தான் கையாண்டுள்ளேன். 

ஹி....ஹி....

Share