சமையல் செய்து சம்சாரத்தை அசத்தலாமா!

அன்பிற்கினிய உறவுகளே,

வாழ்க்கையில் சந்தோசமா இருக்க விரும்புகிறீர்களா? திருமணம் செய்ய விருப்பமா? இல்லை உங்களுக்கு ஒரு காதலி தேடிக் கொண்டிருக்கிறீர்களா?  எதுவானாலும் நீங்க ஒரு மிக முக்கியமான விடயத்தினை மறந்து விடக் கூடாது. அது தான் சமையற் கலையில் நீங்கள் நன்கு தேர்ச்சி பெற்றிருக்க வேண்டும்.

ஆய்வுகளின் அடிப்படையில் இக் காலப் பெண்கள் சமையலில் தேர்ச்சி பெற்ற ஆண்களையே தமது வாழ்க்கைத் துணையாக்கிக் கொள்ள விரும்புகிறார்களாம். ஆகவே சமையல் செய்யத் தெரியாத ஆண்களுக்கும், சமையற் கலையில் தேர்ச்சி பெற்ற பெண்களுக்கும் இத்தால் அறிவித்துக் கொள்வது என்னவெனில்;

என் வலையில் சமையற் குறிப்புக்களை உங்களுக்காகப் பகிர்ந்து கொள்ளும் நோக்கில்;

பாகற்காய்/ பாவற்காய் வற்றல் கறி/  பிரட்டல் கறி வைப்பது தொடர்பான குறிப்புக்களை இப் பதிவினூடாக வழங்குகிறேன்.

ஈழத்து மிளகாய்த் தூள் தயாரிப்பது எப்படிஎனும் பதிவினைத் தொடர்ந்து நான் உங்களோடு பகிர்ந்து கொள்ளப் போகும் இரண்டாவது சமையற் குறிப்புத் தான் இது.ஈழத்து மிளகாய்த் தூள் தயாரிப்பது தொடர்பான விடயங்களை நீங்கள் இங்கே சென்று பார்க்க முடியும்.

  ஈழத்து மிளகாய்த் தூள் தயாரிக்கும் முறை 

சுவையான ஈழத்துப் பாகற்காய் பிரட்டல்/ வற்றல் கறி தயாரித்தல்.

தேவையான பொருட்கள்:

பாகற்காய்/ பாவற்காய்/ Bitter Melon

வெங்காயம்

மிளகாய்த் தூள்

உப்பு

பழப் புளி/ Tamarind Paste

இளநீர்(பாகற்காயினைக் கசப்பின்றிச் சுவையாக சமைப்பதற்கு)

வெந்தயம்

இனிச் செய்முறையினைக் கொஞ்சம் படிப்போமா.

*பாவற்காயினைச் சிறிய, சிறிய துண்டுகளாக வெட்டி நன்றாகப் பொரிக்காது அரைப் பருவம் ஆகும் வரை(Just like half frying) பொரித்து எடுத்துத் தனியாக வைத்துக் கொள்ளவும்.

*பழப் புளியோடு உங்களுக்குத் தேவையான அளவு/ சிறிதளவு இளநீரையும் சேர்த்துக் குழைத்து/ பிசைந்து வைத்திருக்கவும்.
(பாகற்காய் சமைக்கும் போது இளநீர் சேர்த்தால் கசப்பின்றி, சுவையானதாக பாவற்காய் சமையல் இருக்கும். )

*வெங்காயத்தை நீங்கள் வழமை போல உணவிற்குச் சிறு சிறு துண்டுகளாக வெட்டுவது போன்று வெட்டி, சிறிதளவு வெந்தயம் சேர்த்து மிக்ஸ் பண்ணி வதக்க/ தாழிக்கத் (Fried)  தொடங்கவும்.  

*வதக்கும் போது(Fried பண்ணும் போது) வெங்காயம் அரைப் பருவமாகப் பொரிந்து வருகையில், ஏற்கனவே பொரித்து வைத்துள்ள பாகற்காயினையும் சேர்த்துப் பொரிக்கவும்.

*பாகற்காயோடு, வெங்காயத்தினையும் சேர்த்து மிக்ஸ் பண்ணிய பின்னர் - தேவையான அளவு மிளகாய்த் தூளினைச் சேர்க்கவும்.

*இறுதியாகப் பழப் புளியோடு சேர்த்துக் கலந்துள்ள இளநீரையும் ஒன்றாகச் சேர்த்து அவிய விடவும். அவிந்து வருகையில் சிறிதளவு உப்புச் சேர்த்து வற்ற விட்டு இறக்கவும். 

*சிறிது நேரத்தில் சுவையான பாவற்காய் கறி தயார்!

கொஞ்சம் தண்ணிப் பருவமாக அல்லது குழம்பு பருவமாக இந்தப் வற்றல் கறியினை உண்ண விரும்புவோர் சிறிதளவு அல்லது இரண்டு தேக்கரண்டி பாலினையும் சேர்த்துக் கொள்ளலாம்.

டிஸ்கி: சமையற் குறிப்பில் சந்தேகம் இருந்தால் அப்பாவி ஆண்களே, தயவு செய்து வெட்கப்படாமது கேளுங்க..

Share