குறுக்கு வழியில் பிரபல பதிவராக அருமையான டிப்ஸ்!

பேரன்பிற்கும் பெரு மதிப்பிற்குமுரிய உறவுகளே,

வலைப் பதிவு எனப்படுவது, இன்றைய கால கட்டத்தில் தணிக்கைகள் ஏதுமற்ற ஒரு சுயாதீன ஊடகமாக வளர்ந்து கொண்டிருக்கிறது. எமக்குப் பிடித்தவற்றை, எங்களின் எண்ணங்களை வலையில் எழுதி உலகெங்கும் கொண்டு செல்வதற்கு கூகிள் அம்மம்மா இலவசமாக வழங்கும் ஓர் ஊடகம் தான் ப்ளாக்.

நானும் இவ்ளோ நாளா ப்ளாக் எழுதிட்டு இருக்கேன், கூட்டமே இல்லையே என்று கவலை உணர்வு மேலோங்க, என் பதிவுகளை எப்படிப் பிரபலமாக்கலாம் எனும் நோக்கில், அழாக் குறையா 

பதிவரும், என் நண்பருமான இடிச்ச புளி இத்தியாசி அவர்களிடம் என் சந்தேககங்களைக் கேட்கத் தொடங்கினேன். 

ஆரம்பத்தில் நகைச்சுவை நடிகர் செந்திலின் போட்டோவோடு ப்ளாக் தொடங்கிய இடிச்ச புளி அவர்கள், திடீரெனத் தனது போட்டோவையும், மாற்றி விட்டு இப்போது வேறோர் வடிவில் ப்ளாக்கில் முதிர்ந்த தோற்றத்தோடு வலம் வருகிறார்( இந்தப் போட்டோ மாற்றத்திற்கான காரணம் இடிச்ச புளியின் பேட்டியுடன் வெளியான அவரது போட்டோவும், 

அவரது ப்ளாக்கில் இருந்த செந்திலின் போட்டோவும் வித்தியாசமின்றி இருக்கே எனப் பதிவர்கள் பலர் கிண்டல் பண்ணியது தானாம்.)

ஓக்கே மேட்டருக்குப் போவேமா. இப் பதிவில் உள்ள விடயங்கள் அனைத்தும் பதிவர் இடிச்ச புளி எனக்கு அருளிய விடயங்களே. ஆகவே பதிவினைப் படித்து விட்டு என் மீது கோபங் கொள்வது முறையல்ல. எதுவாக இருப்பினும் பதிவர் இடிச்ச புளி இத்தியாசியிடம் நீங்களே டீல் பண்ணிக்குங்க. 

எச்சரிக்கை/ Warning:  இப் பதிவின் நோக்கம் யார் மனதையும் நோகடிப்பதல்ல. பதிவு பிடிக்காதவர்கள் இந்த அறிமுகத்தைப் படித்து விட்டு, எஸ்கேப் ஆகலாம். இவ் அறிமுகத்தின் கீழே அபாயக் குறியீடுகள், சிகப்புக் கோடுகள் உள்ளன. மனதில் தைரியம்- தெம்பு உள்ளவர்கள், சாதிக்க விரும்பும் அன்பர்கள், எல்லோரும் இந்தச் சிகப்புக் கோட்டினைத் தாண்டி வரலாம். பதிவில் உள்ள கருத்துக்கள் நேரடியாக உங்களில் யாரையாவது தாக்குகிறது, பதிவில் உள்ள கருத்துக்கள் எனக்கே குத்தலாக உள் குத்துடன் எழுதப்பட்டிருக்கிறது என்று பஞ்சாயத்துப் பண்ண சால்வையைத் தோளில் போடுற ப்ளாண் உங்களில் யாருக்காச்சும் இருந்தா; இப்பவே எஸ் ஆகிடுங்க. சிகப்புக் கோட்டைத் தாண்டி வந்தீங்க- ரொம்ப சீரியஸ் ஆகிடுவீங்க! இனிப் பதிவிற்குள் போவோமா.

டிஸ்கி: சிகப்புக் கோடு உபயம்:  ஓட்ட வடை நாராயணன்)  

 ________________________________________________________________________

ப்ளாக் எழுதுவோரைப் பின் வருமாறு வகைப்படுத்தலாம். 

*ஆத்ம திருப்திக்காக எழுதுவோர் அல்லது அலுவலக வேலைச் சுமையில் கொஞ்சம் ஆறுதல் வேண்டி ப்ளாக் எழுதுவோர், இவர்கள் தான் இன்று ப்ளாக் எழுதுவோர்களில் முதலாமிடத்தில் இருக்கிறார்கள்.

*மற்றையோர் தாம் என்ன எழுதினாலும் சரி, தமக்கு ஓட்டும், பின்னூட்டங்களும் வந்து பிரபலமாகினால் போதும் எனும் நோக்கில் பதிவெழுதுவோர். 

*எப்போதாவது கிடைக்கும் தமது ஓய்வு நேரத்தில் ஒரு பகுதியினைப் பயன்படுத்தி தம் படைப்புக்களைப் பகிரும் இலக்கியவாதிகள். 

*பிறரை வசை பாடும் நோக்கில் ப்ளாக் எழுதும் நபர்கள்.  

*விளம்பரம் மூலம் பணம் சம்பாதிக்கும் நோக்கில் ப்ளாக் எழுதத் தொடங்குவோர். 

இப்படிப் பல்வேறு வகையானோர் ப்ளாக் எழுதினாலும் நாம பிரபலமாக வேண்டும் என்றால் நிறைய உத்திகள் இருக்கிறது. அவற்றினை நாம் கடைப் பிடித்தால் தான் எங்களின் பதிவுகளைப் பல நூற்றுக்கணக்கான வாசகர்களிடம் பகிர்ந்து கொள்ள முடியும் என்று ஒரு அதிரடிச் செய்தியைத் தந்தார் பதிவர் இடிச்ச புளி அவர்கள். 

*நாம ஒரு ப்ளாக்கினைத் தொடங்கி விட்டு, யாராச்சும் வருவாங்களா என்று இலவு காத்த கிளி போன்று காத்திருக்கக் கூடாது. முதல்ல ஜாலியாக கூண்டை விட்டுக் கிளம்பி, வலையில் எழுதும் சக பதிவர்களோடை பதிவுகளைப் படித்துப் பின்னூட்டமும், வாக்குகளும் போட வேண்டும். 

*ஈகோவைக் களைந்து எம்மால் முடிந்த வரை எமது நேர எல்லைக்குள், வாசிப்பு பரப்பளவிற்குள் எட்டக் கூடிய பதிவுகளைத் தேடிப் பிடித்து வாசிக்க வேண்டும். பதிவினைப் படிக்காது ஒற்றை வரிகளில், ஏனைய பதிவர்கள் தங்கள் பதிவுகளை வந்து படித்தால் போதும் எனும் நோக்கத்தில் பின்னூட்டமிடாது,

பதிவினைப் படித்து பின்னூட்டமும், வாக்குகளும் ஊக்கங்களும் வழங்க வேண்டும். 

*இவ்வாறு ’கடமையைச் செய் பலனௌ எதிர் பாராதே’ எனும் நோக்கில் செயற்படும் போது நமக்கென்று ரசனையுள்ள நண்பர்கள் குழாம் உருவாகும். 

காலப் போக்கில் நண்பர்களின் முயற்சியால் எமது பதிவுகள் பல வாசகர்களைச் சென்றடையும். 

*நாமளே எழுதிப் போட்டு, நண்பர்களின் ப்ளாக்கினைப் படிக்காது, ஓட்டும் போடாது இருந்தால் 

தனிக் கடையில் Page Refresh பண்ணி ஈ ஓட்டிக் கொண்டிருக்க வேண்டிய நிலமை தான் கிடைக்கும்.  

* சிறிது காலத்தின் பின்னர் நண்பர்கள், வாசகர்கள் அதிகரிக்கத் தொடங்கும் போது எமது பதிற்கான அங்கீகாரம், ஆதரவு, பதிவின் தரம் முதலிய விடயங்கள் இயல்பாகவே கூடிக் கொண்டு போகும். 

*எம்மோடு இருக்கும் நண்பர்கள் தான் எங்கள் பதிவுகளை அதிகம் பேர் படிப்பதற்கு உந்து சக்தியாக இருப்பார்கள். நண்பர்கள் இல்லேன்னா....நாம என்ன எழுதினாலும் ரீச் ஆக வாய்ப்பே இருக்காது. இது வெளியில் இருந்து பார்க்கும் உள்ளங்களுக்கு கூட்டம் அமைத்து ஓட்டுப் போட்டுப் பின்னூட்டம் போடும் செயலாக இருந்தாலும், எமது பதிவுகள் பிரபலமாவதற்கும், நண்பர்கள் மனம் விட்டுப் பேசுகையில் பல் வேறு பட்ட விமர்சனங்களை முன் வைப்பதால் பதிவர்களின் எழுத்துக்கள் மெருகேற்றப் படச் சிறந்த ஓர் வாய்ப்பாக அமையும். 

*மனந் திறந்து பிறரின் படைப்புக்களைப் பாராட்டும் பக்குவம் இருக்க வேண்டும். 

புதிதாக ஒரு பதிவர் எழுத வந்து விட்டால் ஓடோடிச் சென்று அவரை நமக்குப் பின்னூட்டமும் ஓட்டும் போடும் நபராக மூளைச் சலவை செய்து மாற்றும் எண்ணங்களை விட்டு விட்டு மனந் திறந்து பதிவினை ரசித்துப் படித்துப் பாராட்ட வேண்டும்.

*இவை எல்லாவற்றையும் விட உங்களுக்கே ஆச்சரிய மூட்டக் கூடிய ஒரு வழி இருக்கு. அது தான் ஓட்டுப் போடுதலின் ரகசியம்.

இண்ட்லி திரட்டியில் நீங்கள் புதிதாக எழுதிய உங்களது பதிவினை இணைத்த பின்னர் புது வரவு என்ற பக்கத்தின் கீழ் உங்களது பதிவு தோன்றும். இந்தப் புது வரவு என்ற பக்கத்தில் இருக்கும் பதிவுகள் அனைத்திற்கும் ஒரே பக்கத்தில் வைத்து பசக்- பசக் என்று ஒரு இருபது குத்துக் குத்திப் பாருங்க. உங்கள் பதிவிற்கு ஒரு சில மணி நேரங்களின் பின் அதற்கான எதிர் வினை கிடைக்கும்.  அதாவது எப்படி வருமோ?

யார் ஓட்டுப் போடுவார்களோ தெரியாது, தானியங்கி முறையில் மர்ம நிலையில் பல ஓட்டுக்கள் உங்கள் பதிவிற்கு வந்து குவியும். 

இந்தத் தகவலை உபயமளித்தவர் சகோதரன் மதியோடை சுதா. 

அட என்ன பார்க்கிறீங்க? ஒரு வாட்டி செஞ்சு பார்த்திட்டுச் சொல்லலாமில்ல!! 

*அடுத்த அதிர்ச்சிகரமான விடயம், உங்க ப்ளாக் லோடிங் ஆக நிறைய நேரம் எடுக்க கூடாது, ப்ளாக்கில் அதிகளவான ஹெட்ஜெற்றினை (Gadget) இனைச் செருகி வைத்தால் ப்ளாக் லோடிங் ஆக இருக்கும். இதனால் வருகையாளர்களிற்குச் சலிப்புத் தான் ஏற்படும். ப்ளாக் ஓப்பின் ஆகலை என்றால் எஸ் ஆகிடுவாங்க.

*ஓட்டுப் பட்டைகள் அனைத்தையும் பதிவிற்கு கீழே வருமாறு மாற்றி அமைத்துக் கொள்ளுங்கள். அப்போது தான் பதிவினைப் படித்த பின் ஓட்டுப் போடக் கூடியவாறு இருக்கும்.

*இன்னொரு முக்கியமான விடயம், நீங்கள் பதிவு எழுதியதும், உங்கள் ப்ளாக்கைப் பாலோ பண்ணும் நண்பர்களிற்கு Google Friend Connect ஊடாக மின்னஞ்சல் வடிவில் உங்களது புதிய பதிவு பற்றிய தகவலினை அனுப்பலாம். 

உங்கள் ப்ளாக்கைப் பாலோ பண்ணும் நபர்களில் பலருக்கு அவர்களின் டாஷ் போர்ட்டில் உங்கள் பதிவுகள் எப்போது வருகின்றன, எப்படி வருகின்றன என்பது தெரியாமல் இருக்கும். ஆகவே பதிவு எழுதிப் ப்ப்ளிஷ் பண்ணிய உடன் http://www.google.com/friendconnect இம் முகவரி ஊடாக உங்களது மொழி நடையில் உங்களது புதிய பதிவினைப் பற்றிய விபரங்களையும், பதிவிற்கான லிங்கினையும் அனுப்பலாம். 

Google Connect  ஊடாக, எவ்வாறு News Letter அனுப்பலாம் என்பதனை இங்கே கிளிக் பண்ணுவதன் மூலம் அறிந்து கொள்ளலாம்.

டிஸ்கி: இவ்ளோ வழியையும் பின் பற்றினால் போதாது, குறுக்கு வழியில் பிரபல பதிவராக வேண்டும் என்றால் நல்ல பதிவினை எழுத வேண்டும்.

ஹி...ஹி....

அட என்ன பார்க்கிறீங்க, குறுக்கு வழியில் பிரபலமாகுவதற்கான டிப்ஸ்;  என்று தலைப்பிட்டு விட்டு, நேர் வழியைச் எழுதிட்டான் நிரூபன் என்றா...

ஹி...கோபம் வேணாம், இப்பவே உங்க வேலையை ஆரம்பிக்கலாமில்ல!  

Share