தமிழக அரசியலை நோண்டிப் பார்க்கலமா?

பேரன்பிற்கும், பெரு மதிப்பிற்குமுரிய உறவுகளே; 

தமிழக அரசியலை நோண்டிப் பார்க்கலாமா? இன்றைய கால கட்டத்தில் அரசியல் கொஞ்சம் விவகாரமான விடயமாகத் தான் இருக்கிறது. தமிழக அரசியலை நோண்டிப் பார்க்கலாமா என்று தலைப்பு எழுதியதும் பல பேர் கடுப்பாகியிருப்பீங்க. ’ஈழத்து அரசியலை நோண்டிப் பார்க்கத் தைரியம் இல்லை. அதில நம்ம தமிழக அரசியலைப் பற்றி ஏதோ எழுதுறியா? உன்னை அப்புறமா டீல் பண்ணிக்கிறேன்’ என்று யாராவது உணர்ச்சிவசப்பட்டால் அதற்கு நான் சொல்லும் பதில் இது தான்.

ஈழத்து அரசியல் என்பது மனிதாபிமானமற்ற மனிதர்களது அரசியல். ஆகவே அதனைப் பற்றி வாய் திறந்தால் எத்தகைய பிரதி கூலங்கள் ஏற்படும் என்பது அனைவருக்கும் தெரியும். இனிப் பதிவிற்குள் நுழைவோமா.  இப் பதிவினூடாக நாம் அலசவிருப்பது நோண்டி பற்றிய சில குறிப்புக்களைத் தான். 

தமிழக அரசியலை நோண்டிப் பார்க்கப் போறியா மவனே, உன்னை நொங்கெடுத்திடுவேன் என்று யாரோ பேசுறீங்க போல இருக்கே.  

தமிழக மக்களின் பேச்சு வழக்கில் நோண்டிப் பார்த்தல் என்பது கிண்டிப் பார்த்தல், அல்லது கிளறிப் பார்த்தல் எனும் பதத்தில் வந்து கொள்ளும்.  ஈழத்திலும் நோண்டிப் பார்த்தலுக்கு இதே பொருள் இருந்தாலும், இந்த நோண்டி எனும் பதத்தினை நாம் பல்வேறு சந்தர்ப்பங்களில்-ஏன் சுட்டுகின்றோம் எனும் சரியான காரணம் தெரிந்தும் அச் சொல்லிற்கான அர்த்தத்தினை அறியாதவர்களாய்ப் பயன்படுத்துகிறோம்.

2001ம் ஆண்டின் இறுதிப் பகுதியினைத் தொடர்ந்து கடுகதி வேகத்தில் ஈழத்தின் வட கிழக்கு மாகாணங்களில் பிரபல்யமான வார்த்தை தான் இந்த நோண்டி. இக் காலத்திற்கு முன்னரே இலங்கையின் தென் மாகாணங்களில் இந்த நோண்டி எனும் பதம் வழக்கத்திலிருந்திருக்கிறது. 

நோண்டி எனும் சொல்லிற்கான பொருள் விளக்கங்கள் இடம், பொருள், ஏவல் எனும் மூன்றினையும் அடிப்படையாகக் கொண்டு வேறுபட்டுக் கொள்ளும்.

இதனடிப்படையில் பார்க்கும் போது தமிழில் நாம் பயன்படுத்தும் நோண்டி எனும் பேச்சு மொழிக்கான அர்த்தம் ஆழமாக/ உள்ளார்ந்தமாக/ ஊடுருவிப் பார்த்தல் எனும் தொனியில் வந்து கொள்ளும். 

எடுத்துக் காட்டாக, 

*மச்சான் நாங்கள் அந்தப் பிகருக்குப் பின்னால போறது வீட்டிற்கு மட்டும் தெரிஞ்சுது, செம நோண்டி மச்சான்.

*நீ கொஞ்சம் நோண்டியாக்காமல் பேசாமல் இருக்கலாம் தானே(ஒருவர் அளவுக்கதிகமாக ஓயாது பேசும் போது இதனைப் பயன்படுத்துவோம்.)

*இது கொஞ்சம் நோண்டியான விசயம் மச்சான். (இடக்கு முடக்கான மேட்டரை இப்படிச் சொல்லுவோம்)

*கொஞ்ச நேரம் அந்தப் போனை நோண்டாமல் இருக்கிறியே(அதாவது கொஞ்ச நேரம் அந்தப் போனை ஆராயாது இருக்கிறியே என்று சொல்லுவார்கள்.

* கோபத்தில் ஒரு சிலர் ‘சும்மா நோண்டாமல் இருக்கிறியே மச்சி’ என்று பேசுவார்கள்(இது கொஞ்ச நேரம் சொறியாமல் இருக்க முடியுமா எனும் அர்த்தத்தில் வரும்)

*பெரிசின்ரை ஆட்களுக்குத் தெரிஞ்சுது,  நோண்டி நொங்கெடுத்துப் போடுவாங்கள் மச்சி, பார்த்து மச்சி. கவனமா டீல் பண்ணு.(போராளிகள் ஈழத்தில் இருந்த காலத்தில், அப் போராளிகளின் தலைவரைப் பெரிசு என்று சிறப்பித்துக் கூறுவார்கள். அதே போல கோஷ்டி மோதலில் ஈடுபடும் நபர்கள் பெரிசின் ஆட்களிடம் அகப்பட்டால் கடுமையான தண்டணையினை எதிர் நோக்க நேரிடும் என்பதால் இவ்வாறு கூறுவார்கள்.)

*வாடா மச்சான் அவனை நோண்டியாக்குவோம்.(இது வாடா மச்சி அவனைக் கலாய்ப்போ/ கிண்டலடிப்போம் எனும் அர்த்தத்தில் சொல்லப்படும்).

*இவர் கொஞ்சம் நோண்டியான ஆள் மச்சி(இது ஒரு மாதிரியான ஆளை/ மெண்டல் கேசினைக் விளிக்கப் பயன்படும் நோண்டி)

* மீன், கருவாடு முதலிய கடலுணவுகளைச் சமைக்கையிலும் நோண்டிப் பார்த்து/ நோண்டிச் சமைப்பதாக கூறுவார்கள்.

2001ம் ஆண்டின் இறுதிப் பகுதியினைத் தொடர்ந்து இலங்கையின் வட கிழக்கு மக்களிடையே இந்த நோண்டியெனும் சொல்லானது பரவியிருந்தாலும், சிங்கள மக்களிடையே அவர்களது ஆரம்ப காலந் தொட்டு பேச்சு மொழி வழக்கில் இந்த நோண்டியானது புழக்கத்திலிருக்கிறதாம். 

இலங்கையில் வாழும் சிங்கள மொழிச் சகோதரர்கள் பயன்படுத்தும் Nondi- நோண்டி என்பதற்கான அர்த்தமானது

வெட்கப்படுதல், ஆழமாக ஊடுருவி ஆராய்ந்து பார்த்தல் எனும் வகையில் வந்து கொள்ளுமாம். 

பொட்ட நோண்டி பாங்- Podda nondi bang எனப்படுவது, ’’நன்றாக வெட்கப்படுவது போல ஆகி விட்டதே’’ என்று சிங்கள மக்கள் சொல்லிக் கொள்ளுவார்கள். 

இத்தகைய தகவல்களை அடிப்படையாக வைத்துப் பார்க்கும் போது, இந்த நோண்டியானது தமிழகத்திலிருந்து ஈழத்திற்குப் பரவியதா? அல்லது சிங்கள மொழிச் சொல்லின் கலப்பாக இலங்கைத் தமிழர்களின் பேச்சு மொழிக்குள் ஊடுருவியதா?  இதற்கான பதிலை உங்களிடமிருந்து எதிர்பார்க்கிறேன்.

டிஸ்கி: தயவு செய்து என்னை நோண்டியாக்காமல் உங்கள் கருத்துக்களையும் பகிர்ந்து கொள்ளலாமல்லவா. 

Share