பிள்ளை பிடிகாரங்க பற்றிய அதிர்ச்சியூட்டும் தகவல்கள்!

பிள்ளை பிடிகாரர் பற்றி அறியாதோர் யாரும் இருக்க மாட்டார்கள்.  இலங்கையில் வாழும் மக்களுக்கு இந்தப் பிள்ளை பிடிகாரர் பற்றிய செய்திகளைக் கேட்டாலே அதிர்ச்சியாகக் தான் இருக்கும். கூடவே பயத்தோடு கூடுய நடுக்கமும் ஏற்பட்டு விடும்.

சிறு வயதில் எமது சுட்டித் தனத்தை அடக்கும் வண்ணம் வீட்டில் உள்ள பெரியவர்கள் ‘அந்தா வாசலைப் பார், பிள்ளை பிடிகாரன் வாற சத்தம் கேட்குது’ என்று சொன்னாலே போதும், பயந்து நடுங்கி வீட்டில் அம்மாவின் சீலைக்குப் பின்னால் ஒளிந்து கொள்வோம். ஆனால் கால மாற்றத்தில் இந்தப் பிள்ளை பிடிகாரரின் பெயரைக் கேட்டாலே காற் சட்டையுடன் சிறு நீர் போகக் கூடிய பயந்த நிலைக்கு நாமெல்லாம் தள்ளப்பட்டு விட்டோம்.

இலங்கை மக்களைப் பொறுத்த வரை சிறுவர்கள் சுட்டித் தனம் புரிகையில், அவர்களை மிரட்டிப் பயமுறுத்தி அவர்களின் குறும்புகளை அடக்க பிள்ளை பிடிகாரன், உம்மாண்டி முதலிய சொற்களைப் பயன்படுத்துவார்கள்.

’உம்மாண்டி சாக்குப் பையோடு வாறார், உன்னையைப் பிடிச்சுக் கொண்டு போடுவார்’ என்று ஒரு சுட்டியைப் பார்த்துச் சொன்னாலே போதும், அந்தக் குழந்தை அடுத்த நிமிடமே ஓடி ஒளிந்து கொள்ளும்.

தமிழர் தரப்பின் விடுதலைப் போராட்டங்கள் தீவிரமடைந்த காலப் பகுதியான 1987ம் ஆண்டிலிருந்து இன்று வரைக்கும் இலங்கையில் வாழும் ஒவ்வோர் மக்களும் அச்சத்துடனும் பீதியுடனும் உச்சரிக்கும் ஒரு வார்த்தையாக இந்தப் புள்ள புடிகாரங்க எனும் சொல் திரிபடைந்து கொள்கிறது.

அடையாளம் தெரியாத நபர்களாக(Unidentified persons) ஆரம்ப காலங்களில் தமிழ் மக்களது வீடுகளிற்கு நுழைந்து பல இளைஞர்களை வெள்ளை வானில் துப்பாக்கி முனையில் கடத்திப் பின்னர் கொலை செய்து வீசும் இரக்கமற்ற மனிதர்களைத் தான் தமிழ் மக்கள் பிள்ளை பிடிகாரங்க என்று அழைக்கத் தொடங்கினார்கள். இதற்கான காரணம்,

*இந்தப் பிள்ளை பிடிகாரங்களை இலகுவில் அடையாளம் தெரிந்து கொள்ள முடியாத மாதிரி முகத்தினைக் கறுப்புத் துணியால் கட்டி இருப்பார்கள்.

*இனந் தெரியாத நபர்களாக ஆட்களைக் கடத்திக் கொலை செய்யும் நோக்கோடு வரும் நபர்களினைப் பற்றிய விபரங்கள் தெரிந்தும் சமூகத்தின் முன்னே- அல்லது பொது இடங்களில் அவர்களைப் பெயர் சுட்டி அழைக்க முடியாத துன்ப நிலை- பெயர் சுட்டி அழைத்தால் அந் நபர்களைக் காட்டிக் கொடுத்தால் தாமும் கொலை செய்யப்படுவோம் எனும் அச்சம் மக்கள் மனங்களில் இயல்பாகவே ஒட்டிக் கொண்டமை.

*இலங்கையில் தமிழ் மக்கள் செறிந்து வாழும் வட கிழக்குப் பகுதியில் மட்டும் பரவி இருந்த உயிரோடு ஆட்களைக் கடத்திக் கொலை செய்யும் நிலமை பிற் காலத்தில் இலங்கையின் ஏனைய பகுதிகளுக்கும் பரவியது.

*வட கிழக்குப் பகுதிகளில் இடம் பெற்ற இனந் தெரியாத நபர்களின் ஆட் கடத்தல், கொலைச் செயற்பாடுகள் 2005ம் ஆண்டிலிருந்து ‘குறித்த ஒரு இனத்தினது இளைய சமூகத்தினை(15-50 வயதுடைய மக்களினை) அடக்கும் நோக்கோடும், இளையவர்களின் தொகையினைக் குறைக்கும் நோக்கோடும் தான் அரங்கேறின.

*2005ம் ஆண்டினைத் தொடர்ந்து இந்தப் பிள்ளை பிடிகாரர்களின் நோக்கம் அடையாளம் தெரியாத நபர்களாக வந்து கப்பம் கோருதல். ஆட்களைக் கடத்தி மறைத்து வைத்து பெருந் தொகைப் பணத்தினை வாங்குதல். வீடு புகுந்து ஆயுத முனையில் திருடுதல் எனப் பல வடிவங்களில் மாற்றம் பெற்றது.

*இலங்கையின் ஒரு சில பகுதிகளில் மனிதர்களைக் கடத்தி உடல் அவையங்களான கண் , சிறு நீரகம் முதலியவற்றை வெளி நாட்டிற்கும், உள் நாட்டிற்கும் விற்பனை செய்யும் நோக்கோடும் இந்த ஆட் கடத்தல் சம்பங்கள் நடை பெற்றுள்ளன.

*விடுதலைப் போராட்டத்திற்காகவும், கட்டாய ஆட்சேர்ப்பிற்காகவும் தமிழ் மக்களது விடுதலை வேண்டிப் போராட்டம் இடம் பெற்ற பகுதிகளில் 2008ம் ஆண்டினைத் தொடர்ந்து வேறோர் வடிவில் பிள்ளை பிடிகாரர் பிறந்து கொள்கிறார்கள்.

வீட்டுக்கு ஒருவர் நாட்டிற்கு வேண்டும் எனும் கொள்கை அடிப்ப்படையில் வெள்ளை வான்கள் மூலம் புலிகளது கட்டுப் பாட்டின் கீழிருந்த வன்னிப் பகுதியில் புலிகளால் இளைஞர்கள் கடத்தப்பட்டார்கள். இவர்களையும் மக்கள் பிள்ளை பிடிகாரர் என்றே அழைத்தார்கள்.

*பிள்ளை பிடிகாரர் கடத்தலுக்குப் பயன்படுத்தும் வாகனம் வெள்ளை நிறத்தில் இருப்பதால், மக்கள் வெள்ளை வான் மர்ம மனிதர்கள் என்றும் இவர்களை அழைக்கத் தொடங்கினார்கள்.

அரசியல் விடயங்களை அதிரடியாகத் தமிழ் நாட்டில் எழுதினால் ‘ஆட்டோ வீட்டிற்கு வரும் எனும் அச்சம் இருப்பது போல,

இன்றும் ஈழத்தில் ’வெள்ளை வான் இரவு வீட்டிற்கு வரும் எனும் அச்சமும் இருக்கிறது.

டிஸ்கி: தொடர்ச்சியாக என் பதிவுகளுக்கு நான் வைத்து வரும் அசிங்கமான, இடக்கு முடக்கான தலைப்புக்களை இனிமேல் பதிவுகளுக்கு வைப்பதில்லை என்று முடிவெடுத்துள்ளேன்.  பல வாசக நெஞ்சங்களிற்கு இந்தத் தலையங்கங்கள் காரணமாக ஏற்பட்ட அசௌகரியங்களுக்கு எனது வருத்தத்தினைத் தெரிவித்துக் கொள்கிறேன். வாசக உள்ளங்கள் பலரது அன்புக் கட்டளைக்கமைவாக இன்று முதல் என் பதிவுகளுக்கு நல்ல தலைப்புக்களை வைப்பதாகத் தீர்மானித்துள்ளேன்.

நான் பதிவெழுதத் தொடங்கிய ஆரம்ப காலங்களில் தனிக் கடையில் ஈ கலைக்க வேண்டிய நிலமையில் இருந்த காரணத்தால் தான் கொஞ்சம் விவகாரமான-விபரீதமான தலைப்புக்களைப் பதிவுகளுக்கு வைக்கத் தொடங்கினேன். ஆகவே இதனால் ஏற்பட்ட இடையூறுகளுக்கு என் வருத்தத்தினைத் தெரிவித்துக் கொள்கிறேன்.

Share