பெண்களுக்கான சூடான மேட்டர்கள்!

வணக்கம் உறவுகளே! இன்று முதல் வலைப் பதிவில் ஒரு வித்தியாசமான முயற்சியினைக் கொண்டு வரலாம் எனும் நோக்கத்தோடு களம் இறங்குகிறேன். நேற்று இரவு தான் ’டன்சல் வோஷிங்கன்’(Danzel washington)  என் கனவில் வந்தார். ’’அடப் பாவிப் பொடியா; உன் பதிவுகளுக்கெல்லாம் ஏடா கூடாமாகத் தலைப்பு வைச்சு மகளிர் அணியினரின் சாபத்திற்கு ஆளாகி விட்டாய். ’’அவங்க எல்லோரும் உன் பக்கம் வாறதைக் குறைச்சிட்டாங்க என்று; ஒரு பெரிய Unstoppable குண்டை என் தலை மீது போட்டு விட்டுப் போய் விட்டார்.

இன்று முதல் மகளிர் அணியினரின் சாபத்தில் இருந்து தப்பும் நோக்குடன் என் வலைப் பதிவில் ‘ஈழத்துச் சுவையருவி’ எனும் பகுதியினை ஆரம்பிக்கவுள்ளேன். இந்த ஈழத்துச் சுவையருவியி;ல் ஈழத்து மண் வாசனை கமழும் இலங்கையின் கலாச்சார உணவு வகைகள், சிற்றுண்டிகள், எனப் பல வகையான அயிட்டங்களை உங்களோடு பகிர்ந்து கொள்ளப் போகிறேன். எல்லோரும் சுவைக்க ரெடியா?

‘இல்லத் தரசிகளுக்கும், மனைவிமாரைக் கண் கலங்காமல் காலம் பூராவும் வைச்சுக் காப்பாற்றுவேன் எனும் சபதத்தோடு இருக்கும் நண்பர்களுக்கும்(வெங்காயம் நறுக்க விடாமல்- தாங்களே மனைவிக்கும் சேர்த்து சமைக்கும் கடமை உணர்வு உள்ள நண்பர்கள்), நம்ம ஓட்ட வடை நாராயணன் மாதிரி வெளிநாடுகளில் தமக்குத் தாமே சமையல் செய்து உண்ணும்- தனித்திருக்கும் ஜீவன்களுக்கும், மற்றும் பலருக்கும்...... இங்கே நான் வழங்கும் சமையற் குறிப்புக்கள் பயன் தரும் எனும் நம்பிக்கையில் எல்லாம் வல்ல ‘வலையாண்டார் வலைப் பதிவுச் சுவாமியை’ வேண்டிக் களமிறங்குகிறேன்.

ஈழத்துச் சுவையருவிக்குள் இறங்குவோமா...

இலங்கை உணவுகளை, கம கம வாசனையுடன் நீங்கள் கறி காய்ச்சி/ கறி ஆக்கி உண்ண வேண்டும் என்றால் உங்களுக்குத் தேவையான, மிக முக்கியமான ஒரு ’திங்ஸ்’ தான் மிளகாய்த் தூள். என்னுடைய சமையற் குறிப்புக்களில் ஈழத்துக் கலாச்சார உணவு வகைகளை மட்டுமே உங்களுக்காய் நான் இங்கே பகிர்ந்து கொள்வதால் நீங்கள் இந்த மிளகாய்த் தூள் இல்லாமல் சமையலில் இறங்க முடியாது. 

அப்போ கண்டிப்பாக, முதல் முயற்சியாக மிளகாய்த் தூள் அரைக்கும் முயற்சியில் இறங்குங்கள். வெளி நாடுகளில் உள்ள நண்பர்கள் இந்த மிளகாய்த் தூளை உங்கள் நாடுகளில் உள்ள இலங்கை, இந்தியக் கடைகளில் வாங்கிக் கொள்ளலாம்.  வெளி நாடுகளில், மிளகாய்த் தூள் வாங்க முடியாதவர்கள் இந்த Recipes இனைப் பின் பற்றி மிளகாய் தூளைத் தயாரித்துக் கொள்ளலாம், இல்லை என்றால் உங்கள் உறவினர்களிடம் சொல்லி, பார்சல் மூலமும் பெற்றுக் கொள்ளலாம். 

இந்த வருட இறுதியில் எனது உலகளாவிய மிளகாய்த் தூள் Selling Exporting  நிறுவனம் ஒன்றினை தொடங்க இருக்கிறேன். சிலோன் மிளகாய் தூள் வாங்க, யாராவது விரும்பினால் இப்போதே ஆடர் பண்ணிக் கொள்வது நல்லது.

இனி மிளகாய்த் தூள் எப்படி அரைப்பது என்று பார்ப்போமா?

தேவையான பொருட்கள்:

1kg செத்தல் மிளகாய்(Dry Red chilli)

1/2kg மல்லி

1/4kg கிலோ பெருஞ் சீரகம்/ பெரிய சோம்பு

150g சின்னச் சோம்பு/ சிறு சீரகம் 

100g மிளகு

கறி வேப்பிலை - உங்கள் விருப்பத்திற்கேற்ற வாறு தேவையான அளவு

50g கராம்பு

25g கறுவாப் பட்டை

100g ஏலக்காய்

10g அன்னாசிப் பூ( சிறிய கையளவு)

10g ஜாதிபத்தினி

25g மஞ்சள் கட்டை

 மேற் கூறப்பட்டுள்ள பொருட்களைக் கொண்டு, எப்படி மிளகாய்த் தூளைத்  தயாரிப்பது என்று பார்ப்போம்.

*மஞ்சள் கட்டையினைச் சிறிய துண்டுகளாக நறுக்கிக் கொள்ளுங்கள்.

*செத்தல் மிளகாயினையும் இரண்டாக வெட்டிக் கொள்ளுங்கள்

*வானலியில்/ அடுப்பில் ஒரு இரும்புச் சட்டியினை வைத்துச் சூடாக்கத் தொடங்குங்கள்

*சூடான சட்டியினுள் மல்லி, கறி வேப்பிலை, மிளகு, நறுக்கிய மஞ்சள் கட்டைகள் முதலியவற்றை ஒன்றாகக் கொட்டிச் சூடாக்கவும்/ வறுக்கவும்.

*மல்லியானது வெடிக்கும் பருவத்தில் இறக்கவும்.

* இதன் பின்னர், ஏனைய பொருட்களைத் தனித் தனியாகச் சூடாக்கவும்.

* பின்னர் மிளகாயை மட்டும் தனியாக, லேசான தேங்காய் எண்ணெய்யுடன் சேர்த்து வறுக்கவும். 1kg மிளகாய்க்கு, இரண்டு சிறிய தேக் கரண்டி(Small tea spoon) தேங்காய் எண்ணையினைச் சேர்க்கவும்.

*மிளகாய் வறுத்து முடிந்ததும் அடுப்பிலிருந்து இறக்கவும். மிளகாயில் உள்ள சூடு ஆறியதும் எல்லா வகையான பொருட்களையும், ஒன்றாகக் கலந்து/ மிக்ஸ் பண்ணி ஒரு அரைக்கும் ஆலை அல்லது மில்லில் கொடுத்து அரைக்கவும். 

*மில்லில் அரைத்ததும் உங்களுக்கு, கம, கமவென வாசனை வீசும் மிளகாய் தூள் கிடைக்கும், அதனை வீட்டிற்கு கொண்டு வந்து, பேப்பரில் கொட்டி, ஆற விடவும். பின்னர் போத்தலில் அடைத்து, உங்கள் சமையற் தேவைக்கேற்றாற் போல யூஸ் பண்ணத் தொடங்கலாம்.

*ஒரே, ஒரு கண்டிப்பான விசயம் என்ன என்றால், மிளகாயினைக் கருக்காது, பதமாகும் வரை வறுக்கவும். மிளகாய் கருக்கினால் நறு மணம் வீசாது, நாற்றம் தான் அடிக்கும்.

இனி எனது அடுத்தடுத்த பதிவுகளில் இந்தக் கம, கம என வாசமடிக்கும் இலங்கை மிளகாய்த் தூளின் துணையோடு, சுவையான கோழிக் கறி, ஆட்டிறைச்சிக் கறி, உருளைக் கிழங்குப் பிரட்டல், கத்தரிக்காய் வற்றல், இறால் கறி, மரக்கறி  கூழ்,  மாமிசக் கூழ், கோழிப் பொங்கல், முதலிய பல வகையான, வாயில் நாவூற வைக்கும் உணவுகளைச் சமைப்பது எப்படி என்பதனையும் பகிர்ந்து கொள்கிறேன். 

இந்த மிளகாய்த் தூள் கொஞ்சம் காரம் கூடியது, வீட்டிற்குத் திருடன் வந்தாலோ அல்லது, வீட்டில் யாருடனும் சண்டை என்றாலோ இதனை நீங்கள் ஒரு தற் காப்பு ஆயுதமாகவும் பயன்படுத்திக் கொள்ளலாம்.

********************************************************************************

டிஸ்கி: நீண்ட நாட்களின் பின்னர்,  பள்ளிக் கால நண்பர்களான அலுக்கோசும், குளுக்கோசும் சந்தித்துக் கொள்கிறார்கள். 

அலுக்கோஸ்: உன்னைச் சந்தித்தது ரொம்பச் சந்தோசம் மச்சான். நான் அவசர அவசரமாக வீட்டை போக வேணும் மச்சான், உன்னை பிறகு ஒரு நாள் மீட் பண்ணுறன் மச்சான்.

குளுக்கோஸ்: ஏன் மச்சான், இண்டைக்குத் தானே நிறைய நாளுக்குப் பின்னர், என்னைக் கண்டிருக்கிறாய். வாவன் கொஞ்ச நேரம் ஜாலியா அரட்டை அடிப்பம்.

அலுக்கோஸ்: இல்லையடா,  மச்சான், நான் வீட்டை போக வேணும், என்ரை மனுசி எனக்காக சாப்பிடாமல் காத்திருப்பா. அதை நினைச்சால் தான் ஒரே பீலிங்ஸ்சாக இருக்கடா மச்சி.

குளுக்கோஸ்: என்னடா,  என்னாலை நம்பவே முடியலை; இந்தக் காலத்திலை, இப்படி ஒரு பொண்டாட்டியோ! அதுவும், உனக்காக சாப்பிடாமல் காத்திருக்கிறாளோ?

அலுக்கோஸ்: இல்லையடா மச்சான், நான் போய்த் தான் அவளுக்கும் சேர்த்துக் சமைச்சுக் கொடுக்க வேணும்;-) , நான் கிளம்பட்டோ மச்சான்...

Share