கலவன் பள்ளிக் கூடமும், காதல் செய்யும் ஆசிரியர்களும்!

ஆசிரியர்களை, மாதா, பிதா, குரு தெய்வம் எனும் அடிப்படையில் முதன்மைப் படுத்துவார்கள். ஆனாலும் புனிதமான இந்த ஆசிரியர் தொழில் அலுத்து விட்டால், அரட்டை அடித்தே பாட நேரத்தை ஓட்டும் ஆசிரியர்களும் நம் ஊர்களில் இருக்கிறார்கள். ஆசிரியர் தொழில் இலகுவான ஒரு தொழிலல்ல. தாங்கள் கற்றுக் கொடுக்கப் போகும் பாடம் தொடர்பாக ஏற்கனவே முன் ஆயத்தம் செய்து கொண்டு(Prepare) பாடசாலைக்குச் சென்றால் தான் மாணவர்கள் கேட்கும் கேள்விகளிற்குப் பதில் சொல்லித் தப்பித்துக் கொள்ளலாம். ஒரு சில ஆசிரியர்கள் மாணவர்கள் ஏதாவது சந்தேகங்களைக் கேட்டால், சில நேரம் பதில் சொல்ல முடியாமல் திக்கு முக்காடி விட்டு, பின்னர் மாணவனிடமே சம்பந்தமில்லாத கேள்வியைக் கேட்டு விட்டு, மாணவனின் வாயை அடக்கிய பின்னர் பாடத்தைத் தொடருவார்கள்.



இந்த வகையில் வருபவர் தான் நம்ம வாத்தியார் வப்புசாமி...

வாத்தியார் வப்பு சாமியும் மாணவர்களும்!

ஒரு நாள் வாத்தியார் தமிழ்ப் பாடத்திலுள்ள திருக்குறளைப் பற்றி கற்பிக்கத் தொடங்குகிறார். முதல் நாள் பார்த்த ரஜினி படம், காரணமாக தூக்கம் கண்களைத் தழுவ நம்ம சக மாணவன் நரம்படி நாகமுத்து தூங்கிக் கொண்டிருக்கிறான். ஆசிரியருக்குப் பயங்கர கோபம்.

டோய் நரம்படி நாகமுத்து! எழும்படா, திருக்குறளை எழுதினவர் யார் என்று சொல்லு பார்ப்பம்?
‘மாடத்திலே கன்னி மாடத்திலே எனும் பாடலில் மனதைப் பறி கொடுத்திருந்த நம்ம நரம்படி, சேர் சத்தியமா நான் எழுதவில்லை என்று சொல்கிறான்.

ஆசிரியருக்குப் பாடத்தைக் கவனிக்காத கோபம் ஒரு புறம், பாவிப் பயல் நித்திரை கொண்டு தன்னை அவமானப்படுத்திட்டானே எனும் கவலை ஒரு பக்கம் இருக்க. உடனடியாக மாணவனை ஹெட் மாஸ்டரிடம் அனுப்புகிறார். ஹெட் மாஸ்டரும் நர.. நாகமுத்துவைக் குறுக்கு விசாரணை செய்யத் தொடங்க, அவன் அதே பதிலைச் சொல்லத் தொடங்குகிறான். பிறின்சிப்பலுக்குப் பயங்கரக் கோபம். நாக முத்துவை வீட்டுக்கு அனுப்பி, ’’ஓடிப் போய் உன்ரை அப்பாவைக் கூட்டி வாடா என்று கலைத்து விடுகிறார்.

ஓடிப் போன மாணவன், தந்தையாருடன் வருகிறான். தந்தையாரிடம் ஹெட் மாஸ்டரும், பிறின்சிப்பலும் நடந்தவற்றை ஒன்றும் விடாமல் கூறுகிறார்கள்.
நரம்படி நாகமுத்துவின் தந்தையார், நிறுத்துங்க சார், தெருக்குறளை எழுதினது யாரோ? இது கூடத் தெரியாமலா பாடம் நடாத்துறீங்க.
’’உந்த றோட்டு மதில்களிலை, சுவர்களிலை பொட்டையளின்ரை பெயரோடு பொடியங்கடை பேரையும் சேர்த்து எழுதுறது யார் தெரியுமே? என்ரை மகன் தான்.
சத்தியமா உவன் நாகமுத்து தான் சேர் உந்தத் தெருக் குறளையும் எழுதியிருப்பான். அதிலே சந்தேகமே இல்லை சேர்.. ... ஹெட் மாஸ்டரும், ஆசிரியரும் ஒருவரை ஒருவர் பார்த்து.. முழித்துக் கொண்டு நிற்கிறார்கள்.

வாத்தியார் வப்பு சாமியும் பாத்றூம் நினைவுகளும்! 


நம்மடை வப்புசாமி வாத்தியார் பள்ளிக் கூடத்திற்குச் சேர்ந்து கொஞ்ச நாட்களில் பாடசாலை நிர்வாகம் புதிதாக ஒரு  வெஸ்ரேன் பாத்றூமை(சிறு நீர் கழிக்குமிடம்)  கட்டி, அதன் சுகாதாரப் பொறுப்பையும், மேற் பார்வையும் நம்ம வாத்தியார் கிட்ட கொடுக்கிறாங்க. முதன் முதலாக டாயிலெட் மேற் பார்வை செய்யும் பொறுப்பை ஏற்றுக் கொண்ட நம்ம வாத்தியார், மாணவர்களுக்கு கண்டிப்பான உத்தரவினை வழங்குகிறார். ’’மாணவர்களே இது புது பாத்றூம், யாரும் இங்கே அசுத்தம் பண்ணக் கூடாது, மீறிப் பண்ணினால் நடக்கிறதே வேறை.

இரண்டு நாட்களின் பின், பாத்றூம் சுவரில் நம்ம சகோ, நக்கல் நந்த கோபால் எழுதினானே ஒரு வசனம்......’’உங்கள் எதிர் காலம் உங்கள் கைகளில்’’.

இதனைப் படித்த வாத்தியாருக்கு எப்படி இருந்திருக்கும்!

குட்டியும், சூட்டியும்!


மின்சாரத்திற்கு ஆங்கிலம் என்ன என்று நம்ம ஆங்கில ஆசிரியர் அல்போன்ஸ்  சகோதரி சூட்டியினைக் கேட்கிறார்.
.......அது எலக்ரிகுட்டி எனப் பதில் சொல்லுகிறாள் நம்ம சகோ.
ஆசிரியர்...என்ன பிள்ளை அது, அது எலக்ரிகுட்டி சேர். திரும்பவும் அதே பதில்..
அவர் எலக்ரிசிற்றி எனப் பல முறை சொல்லிக் கொடுத்தும், ஆசிரியரால் மாணவியின் உச்சரிப்பினைத் திருத்த முடியாது போகவே சூட்டியின் தந்தையாரினைப் பாடசாலைக்கு அழைத்து வருமாறு ஆசிரியர் சொல்லியனுப்புகிறார்.

சூட்டியின் தந்தையார் சூலவைரவன் பாடசாலை அதிபரைச் சந்திக்க வருகிறார். ஆசிரியரும் நடந்தவற்றையும், சூட்டியின் உச்சரிப்பில் உள்ள தவறினையும் விளக்குகிறார். நன்றாக செவிமடுத்த சூலவைரவன், சேர் அவளின்ரை கப்பாகுட்டி அப்படித்தான், அவள் இன்னும் கொஞ்ச நாளிலை எலக்ரிகுட்டியை பிக் பண்ணிடுவாள், நீங்கள் இதனைப் பப்ளிகுட்டி பண்ணிப் போடாதேங்கோ...
எனக் கூறி விட்டுச் செல்கிறார்...

ஆசிரியர் ஒரு கணம் சுய நினைவற்று நிற்கிறார்...
                                                                          
                                                                                    வாத்தியார் தொடர்ந்தும் வருவார்.....!

இதில் வருகின்ற முதலாவது நகைச்சுவையினை யாழ்ப்பாணத்தில் ஒரு காலத்தில்(இற்றைக்குப் பல ஆண்டுகளுக்கு முன்பு) பிரபலமாக ஒலித்துக் கொண்டிருந்த லூஸ் மாஸ்டரின் தனி நடிப்பு கசற்றில் இருந்து உங்களோடு பகிர்ந்து கொள்வதற்காக எழுதியிருக்கிறேன்.

இரண்டாவது,  நகைச்சுவை.. அது. வந்து...............அது வந்து..........என் சொந்த தயாரிப்பு.

மூன்றாவது நகைச்சுவை ஒரு புத்தகத்தில் படித்தது.


டிஸ்கி: நாற்றின் வாசகர்கள், அன்பு உறவுகள், நண்பர்கள், விமர்சகர்கள், தோளோடு தோள் நிற்கும் உள்ளங்கள், மற்றும் அனைவருக்கும் என் உளம் கனிந்த இனிய தமிழ் புது வருட வாழ்த்துக்களைத் தெரிவிப்பதில் மகிழ்ச்சியடைகிறேன். பிறந்திருக்கும் இந்தப் புதிய ஆண்டு, எங்கள் அனைவரது வாழ்விலும் ஒளியேற்றும் ஓர் நல்ல ஆண்டாக மலரும் என் நம்பிக்கையோடு, இன்றைய நாளை இனிதாகத் தொடங்குவோமாக!

Share