உலகெலாம் நக்கி பொழைக்கும் ஈ(ழ)னத் தமிழர்கள்!

"தமிழன் இல்லாத நாடும் இல்லை! தமிழனுக்கு என்றோர் நாடும் இல்லை!" என்பது ஈழத்து ஆஸ்தான கவிஞரின் கவி வரிகளாகும். உலக நாடுகள் எங்கும் தமிழன் பரந்து வாழ்கின்றான் எனும் விடயத்திற்கும் அப்பால் இன்றளவில் உலக நாடுகள் சிலவற்றின் அரசியல் நிலமைகளை / ஆட்சியில் உள்ள கட்சியின் வாக்குப் பலத்தினைத் தீர்மானிக்கின்ற மாபெரும் சக்தியாகவும் உலகத் தமிழன் விளங்குகின்றான். என்ன ஆச்சரியமாக இருக்கிறதா? வாருங்கள் பதிவினுள் நுழைவோம். 

கப்பல் ஓட்டிய தமிழன் எனும் பெயருக்கு சொந்தக்காரராக ஆசியாவில் உள்ள பழந்தமிழ்க் குடிகளுள் ஒன்றான ஈழத்தினைச் சேர்ந்த வல்வெட்டித்துறையில் வாழ்ந்த தமிழ்க் குடிகள் விளங்குகின்றார்கள். உலகளவில் பல நாடுகளுக்கும் சென்று தம் பண பலத்தால் முன்னேறிய குடிகளாக தமிழர்கள் வாழ்ந்த காலத்தில் இனவாதச் சிங்கள அரசின் கொடிய போர் மேலும் பல ஆயிரக் கணக்கான தமிழர்களை அவர்களின் பூர்விக நிலங்களை விட்டு புலம் பெயர்ந்து செல்ல வைத்தது. 

தமிழன் தான் வாழும் நாட்டில் இடம் பெற்ற அசாதாரண சூழ் நிலைகளால் தன் சொந்த நாட்டை விட்டு புலம் பெயர்ந்து உலகெங்கும் வாழும் நிலைக்குத் தள்ளப்பட்டான். தமிழர்களில் போர் வெறியர்கள் வாழ்ந்ததாக, இன்றும் வாழ்ந்து வருவதாக வரலாறுகள் ஏதும் இதுவரை எழுதப்படவில்லை. தமிழர்கள் தானாகப் போரை விரும்பி ஏற்றவர்கள் அல்ல. போர் எனும் அரக்கனின் பிடிக்குள் வலிந்து தள்ளப்பட்டவர்கள். உலகெங்கும் பரந்து வாழும் இருபது இலட்சத்திற்கும் மேற்பட்ட ஈழ மக்கள் போரை விரும்புவதாக அரசியல் பற்றி அதிகம் தெரியாத சில ஈனப் பிறவிகள் இன்று போலிக் கட்டுரை வரைந்து குளிர் காய்கின்றன. 

ஈழத்தில் போர் ஓய்ந்தால் உலகெங்கும் வாழும் தமிழர்களின் அகதிக் குடியுரிமை பறிக்கப்பட்டு, அவர்கள் நாட்டிற்குத் திரும்ப நேரும் என பொய்யுரைத்து பல வாசகர்களை முட்டாளாக்க முனைகின்றனர் சில மதம் பரப்பு நல் உள்ளங்கள். எந்த ஓர் நாட்டிலும் ஐக்கிய நாடுகள் சாசனப் படி அகதிக் குடியுரிமை வழங்கப்பட்டால் அது மீளப் பெறப்படமாட்டாது என்பது நியதி! உலகெங்கும் பரந்து வாழும் ஈழ மக்களில் 99 வீதமான மக்கள் அந் நாட்டுக் குடியுரிமையுடன் வாழ்கிறார்கள். அவர்களுக்கென்று குடும்பம், வாழ்க்கை தொழில் எனப் பல அம்சங்கள் அன்றாட வாழ்க்கையுடன் பின்னிப் பிணைந்துள்ளன. 

ஒரு சதவீதமான மக்கள் மாத்திரம் நிரந்தர குடியுரிமை இன்றி வாழ்க்கையுடன் போராடுகின்றார்கள். ஆக ஈழ மக்களைப் போர் வெறியர்களாக்கி அல்லாவின் தத்துவம் ஒன்றினை ஈழ மக்களின் இன்றைய நிலையுடன் செருகிப் பார்த்து ஈழ மக்களுக்கு அன்று அல்லா சொல்லி வைத்த கூற்றுப் படி இன்று இந்த நிலமை எனக் கட்டுரை வரைந்து சுய சொறிதல் செய்வதில் சிலருக்கு இன்பம் இருக்கு என்பதற்கு இப்படியான கட்டுரைகள் சான்றாதாரங்களாக விளங்குகின்றன. 

உலகத் தமிழ் மக்கள் தாம் வாழும் நாட்டின் சட்ட திட்டங்களுக்கு அமைவாக தம்மைத் தாமே பல துறைகளிலும் வளர்த்துக் கொள்கின்றார்கள். பாராளுமன்றங்களில் அரசியல்வாதிகளாக, தொழிற் துறைகளில் நன்கு முன்னேறிய செல்வந்தர்களாக, தொழில் நுட்பம், அறிவியல், எனப் பல வழிகளிலும் சிறந்தவர்களாக விளங்குகின்றார்கள். கனடா, மற்றும் ஐக்கிய இராச்சியம் ஆகிய நாடுகளில் அங்கு வாழும் ஐந்து லட்சம் தமிழர்களின் வாக்குரிமையினை வைத்துத் தான் ஆளுங் கட்சியின் அரசியல் ஸ்திரத் தன்மை கூட தீர்மானிக்கப்படுகின்றது. 

உலகெல்லாம் வாழும் மக்கள் அனைவரும் தம்மைப் போல இலங்கையில் வசிக்கும் தமிழ் மக்களும் சகல வசதி வாய்ப்புக்களுடன் வாழ வேண்டும் என நினைக்கின்றார்களே அன்றி, போர் புரிந்து இன்னோர் சந்ததி தம் வாழ்வை முடித்துக் கொள்ள வேண்டும் என விஷமத்தனமாக நினைப்பவர்கள் அல்ல. தமிழினம் இன்று உலக நாடுகள் பலவற்றாலும் நேசிக்கப்படும் ஓர் இனமாக மாறி வருகின்றது. பல நாடுகளில் மாறியிருக்கின்றது. உலகெங்கும் பரந்து வாழும் தமிழர்களின் அதீத திறமைகளைப் பட்டியலிட ஓர் பதிவு போதாது. 

வரலாறுகள் புனை கதைகளாக மதக் கோட்பாடுகளை முன்னிறுத்தி எழுதப்படும் போது, அவற்றினை மீள ஆராய்வது மனிதனின் தலையாய கடமையாகின்றது! 

*****************************************************************************************************************

எல்லோருக்கும் வணக்கமுங்க,

எல்லோரும் நல்லா இருக்கீங்களா? மிகவும் நீண்ட இடைவேளையின் பின்னர் உங்கள் அனைவரையும் இப் பதிவின் வாயிலாகச் சந்திப்பதில் மிக்க மகிழ்ச்சி! 

மீண்டும் அடுத்த பதிவுடன் வெகு விரைவில் உங்கள் அனைவரையும் சந்திக்கிறேன். 

இப் பதிவினைப் படித்த அனைவருக்கும் நன்றி கூறி விடை பெறுகின்றேன்.

நேசமுடன்,

செ.நிரூபன்.

*****************************************************************************************************************

Share