Water For Elephants - ஹாலிவூட் பட விமர்சனம் - மணமான பெண் மீதான டீன் ஏஜ் பையனின் காதல்!

தும்மலையும், காதலையும் நெருப்பு புகையினையும் இலகுவில் மறைக்க முடியாது என்று கூறுவார்கள். காதல் உணர்வின் அடிப்படையிலும், ஒரு மனிதனது உடல் இச்சையின் அடிப்படையிலும் எங்கு வேண்டுமானலும் எப்போது வேண்டுமானலும் பிறந்து கொள்ளும். இளங் கன்னியர் மீதும், மணமான பெண்கள் மீதும் வாலிப வயசுப் பையன்களுக்கு அவர்களின் மன உணர்வின் அடிப்படையில் காதல் பிறந்து கொள்ளும். இந்த வகையான காம உணர்வோடு கூடிய பொருந்தாக் காதல்கள் கை கூடுவதென்பது அரிதிலும் அரிது. ஆனால் மனதளவில் சுகம் காண நினைக்கும் ஆடவனுக்கு அவனது மன உணர்வினைப் பூர்த்தி செய்யும் வகையில் பிறக்கும் காதலானது சில வேளை கசப்பான உணர்வுகளையும் தோற்றுவிக்கக் கூடும் அல்லவா?

வயது கூடிய ஆடவன் அழகும் இளமையும் கவர்ந்திழுக்கும் அட்ராக்சன் கலந்த லுக்கும் உடைய ஒரு பெண்ணைத் திருமணம் செய்து தன் அருகே வெறுமனே பெயருக்கு மனைவியாக மனைவி என்ற அடை மொழியோடு வைத்திருக்கும் போது, அவனிடம் பணம் இருந்தால் என்ன? இவ் உலகினை ஆளுகின்ற மகா பலம் இருந்தால் என்ன? ஒரு பெண்ணுக்கு வேண்டிய ரொமான்டிக் கலந்த சாந்தமான காதல் உணர்வு இல்லையேல் அவனது துணைவியாக உள்ள பெண்ணின் மன நிலை என்னவாகும்? 

வயது கூடிய ஆணை மணம் புரிந்துள்ள இளம் பெண்ணின் வாழ்க்கையில் அழகும், அவளுக்கு ஆதரவு கொடுத்து அவள் உணர்வுகளைச் செவிமடுக்கும் இயல்பும் கொண்ட ஒரு ஆடவன் குறுக்கிடும் போது அப் பெண்ணின் மனதில் தன்னைப் பெயருக்கு மனைவி என்ற நாமம் சூட்டி மகிழும் கணவன் மேலா அல்லது இளைஞன் மேலா காதல் உருவாகும்? இத்தகைய வினாக்களுக்கான விடையினைத் தன்னகத்தே கொண்டு நிற்கும் திரைப்படம் தான் WATER FOR ELEPHANT.

சிறு வயதில் தன் தாய் தந்தையரை இழந்த இளைஞனான ஜக்கோப் தன் கால் போகும் திசையில் நடந்து காட்டுப் பாதையூடே ஓடும் புகைவண்டியில் தொற்றி ஏறிக் கொள்கின்றார். அந்தப் புகை வண்டியானது அமெரிக்காவின் பென்சில்வேனிய மாநிலத்தில் மிகவும் புகழ்பெற்ற சர்க்கஸ் குழுவான Benzini Brothers சர்க்கஸ் குழுவினர் தமது சர்க்கஸ் நிகழ்வுகளுக்கான பயணங்களை மெற்கொள்ளும் புகை வண்டியாகும். 

தன் நிலையினை எடுத்துச் சொல்லி பென்சினி பிரதர்ஸ் சர்க்கஸ் குழுவுடன் இணைந்திருக்கும் ஜக்கப்பின் வாழ்வானது சிறிது சிறிதாகத் துளிர் விடத் தொடங்கும் சமயத்தில் சர்க்கஸ் குழுவின் ஓனர் ஓர்க்கஸ்ட் அவர்களின் இளம் மனைவியும் தேவதையுமான மெலீனா ஜக்கப்பின் பார்வைப் புலனை ஊடுருவிச் செல்கின்றா. அழகிய பெண்ணை அருகே வைத்துக் கொண்டு பணம் பணம் என சர்க்கஸே கதியென்று இருக்கும் ஓர்க்கஸ்ட் அவர்களை விட்டு ஜக்கப்பின் மீது மெலீனாவின் மன உணர்வுகள் தாவத் தொடங்குகின்றது.

காதலன் ஜக்கப் ஒரு புறம், மறு புறம் கணவன் ஓர்க்கஸ்ட் எனத் தத்தளிக்கும் நீர்க்குமிழி நிலையில் நிற்கும் மெலீனாவின் வாழ்விற்கு என்ன ஆச்சு? முக்கோணக் காதல் கதையினூடாக, ஒரு இளைஞனின் வயது முதிர்ந்த பெண் மீதான காதல் உணர்வுகள் எப்படி அமைந்து கொள்ளும் என்பதனையும் அழகுறச் சொல்லி நிற்கும் படம் தான் இந்த Water For Elephant. Sara Gruen's அவர்களின் Water For Elephants நாவலை அடிப்படையாக வைத்து 20th Century Fox நிறுவனத்தின் வெளியீட்டில் இவ் வருடத்தின் ஏப்ரல் மாதமளவில் ரிலீஸ் ஆகியிருக்கிறது இந்த திரைப்படம். 

Francis Lawrence அவர்கள் இக் கால இளைஞர்களின் ரசனைக்கேற்ற மாதிரி மென்மையான ரொமான்டிக் காட்சிகளினைப் புகுத்தி இப் படத்தினை இயக்கியிருக்கிறார். James Newton Howard அவர்களின் இசை காதல் உணர்வினை உடலினுள் ஊடுருவச் செய்து மனதை மயக்கச் செய்கின்றது. Reese Witherspoon, Robert Pattionson, Christoph Waltz ஆகியோர் இப் படத்தின் முன்னணி நட்சத்திரங்களாக நடித்திருக்கிறார்கள். ஜக்கப் ஆக வரும் நடிகர் Robert Pattionson அவர்களும், மெலினாவாக இப் படத்தில் நடித்திருக்கும் நடிகை Reese Witherspoon அவர்களும் காதல் மற்றும் ரொமான்டிக் காட்சிகளில் தம் இயல்பான நடிப்பினை வெளிப்படுத்தி அசத்தியிருக்கிறார்கள்.

பொழுது போக்கிற்காகப் படம் பார்க்க விரும்புவோருக்கும்;சர்க்கஸ் காட்சிகளைக் கண்டு களிக்க விரும்பும் நபர்களுக்கும்; காதல் ரசம் நிரம்பி வழியும் ரொமான்டிக் காட்சிகளைக் கண்டு களிக்க விரும்புவோருக்கும் விருந்தளிக்கும் இந்த திரைப்படம். 120 நிமிடங்கள் நேர அளவை கொண்ட இத் திரைப்படத்தை நீங்கள் விரும்பினால் கூகிளில் தேடுவதன் மூலம் ஆன்லைனில் கண்டு களிக்க முடியும்.

Water For Elephants: காற்றுள்ள போதே தூற்றிக் கொள்ள ஆசைப்படும் இளம் உள்ளங்களின் உணர்வுகளைச் சொல்லும் படம்!

Water For Elephants திரைப்படத்தின் ட்ரெயிலரினை யூடியூப்பில் கண்டு களிக்க:

Share