போலீஸ் வெறியாட்டத்தால் பொசுங்கிப் போகுமா கூடங்குளம் போராட்டம்?

நம்ப வைத்து கழுத்தறுத்த ஜெயலலிதா! நம்பி கெட்ட அப்பாவி மக்கள்!

கூடங்குளம் அணு உலையினை மூடக் கோரி கூடங்குளம் அணு மின் நிலையத்தினைச் சுற்றியுள்ள 20km தூரத்தினுள் வசிக்கும் மக்களால் கடந்த வருடம் புரட்டாதி மாதம் முதல் பல்வேறுபட்ட போராட்டங்கள் அஹிம்சை முறையில் இடம் பெற்று வருவது நாம் அனைவரும் அறிந்த விடயமாகும். இப் போராட்டங்களினை நன்கு திட்டமிட்டு நசுக்கும் நோக்கில் சில மாதங்களுக்கு முன்னர் முதலமைச்சர் ஜெயலலிதா அம்மையார் "அணு உலை சுற்றுச் சூழலுக்கு ஆபத்தானது. மக்கள் குடியிருப்புக்களின் மத்தியில் அணு உலையினை நிறுவி இருப்பது தவறு. தானும் கூடங்குளம் மக்களுள் ஒருவராக போராட்டக் களத்தில் வெகு விரைவில் இருப்பேன்” என அறிக்கை விட்டிருந்தார். இந்த அறிக்கையானது சங்கரன் கோவில் இடைத் தேர்தலை முன்னிட்டு வெளியிடப்பட்ட அறிக்கை என அப்பொழுது யாருமே நினைத்திருக்கவில்லை.

ஆனால் இன்றோ நிலமை தலை கீழாக மாறி விட்டது. சங்கரன் கோவில் இடைத் தேர்தல் முடிவுற்றதும், ஜெயா அம்மையாரும் தன் வேலையினை காட்டத் தொடங்கி விட்டார் என கூடங்குளத்தில் வாழும் மக்கள் பேச ஆரம்பித்து விட்டார்கள். இதனை விட, தமிழகத்தில் மின் வெட்டினை அமுல்படுத்தி, கூடங்குளம் போராட்டத்தினால் தான் மின் வெட்டினை நடைமுறைப்படுத்த வேண்டி ஏற்பட்டது எனும் பொய்யான செய்தி மக்கள் மனங்களில் பரவுவதற்கும் காரணகர்த்தாவாக இந்த அம்மையாரும் விளங்குகின்றார்.

கூடங்குளத்தில் என்ன தான் நடக்கிறது என அறியும் நோக்கில் அங்கே உள்ள சக நண்பர் ஒருவருக்கு நேற்றைய தினம் தொலைபேசி அழைப்பினை மேற் கொண்டேன். நேற்றைய தினம் வரவேண்டிய பதிவு, நேரம் இன்மையால் இன்றைய தினம் உங்களை நாடி வருகின்றது. 

144 தடை உத்தரவும், மக்களை தாக்கும் போலீசும்!

கூடங்குளம் அணு உலையினை அகற்ற கோரி, கூடங்குளம் அணு மின் நிலையத்திற்கு 3km தொலைவில் உள்ள இடிந்தகரை எனும் ஊரில் உண்ணாவிராதப் போராட்டம் இடம் பெற்று வருகின்றது. அஹிம்சை முறையில் தமது பிரதேச நலனைக் கருத்திற் கொண்டு அப் பகுதி மக்களால் நடாத்தப்படும் உண்ணாவிரதப் போராட்டத்திற்குப் பதில் சொல்லத் திராணியற்ற மத்திய - மற்றும் மாநில அரசுகள் மக்களை ஆயுத முனையில் அடக்கி, போராட்டத்தினை நசுக்கி, அப்பாவி மக்களின் ஊரில் அணு உலையினை இயங்கச் செய்ய வேண்டும் எனும் எண்ணத்தில் விடாப் பிடியாக நிற்கின்றன.

இதன் பிரகாரம் கடந்த இரண்டு நாட்களுக்கு முன்னதாக 7000-10,000 வரையான போலீஸ், எல்லை காவல் படை, மற்றும் அதிரடிப் படையினரை கூடங்குளத்தின் இடிந்தகரை கிராமத்திற்குச் சமீபமாக நிறுத்தியிருக்கிறார்கள். இடிந்தகரை மக்கள் தம் உயிரைக் கூட கொடுப்பதற்கு அஞ்சமாட்டார்கள் என்பதனை உணர்ந்து தான் இடிந்தகரையில் போராட்டத்தினை மக்கள் ஆரம்பித்தார்கள் என கூறுகின்றார்கள் கூடங்குளம் வாசிகள். 

கூடங்குளச் சுற்று வட்டாரத்தில் உள்ள போலீஸார் இன்னமும் இடிந்தகரையில் போராட்டம் இடம் பெறும் பகுதிக்குள் உட்புகவில்லை. அப்படி உட்புகுந்தால் போலீசுக்கும் மக்களுக்கும் இடையில் முரண்பாடுகள் நிகழ வாய்ப்புக்கள் அதிகமாக இருப்பதாக அங்கே உள்ள மக்கள் கூறுகின்றார்கள். கூட்டப்புளி கிராமத்தில் தம் காட்டு தர்பாரை அரங்கேற்றிய போலீஸ், இரு நாட்களுக்கு முன்பதாக, ஆண், பெண் உட்பட 200 பேரை கைது செய்து, திருச்சி சிறையிலும், கடலூர் சிறையிலும் அடைத்துள்ளார்கள். சிறைச்சாலையிலும் தாம் வாழும் மண்ணின் நலனைக் கருத்திற் கொண்டு மக்கள் உண்ணாவிரதத்தினை தொடர்ந்து கொண்டிருப்பதாக கூடங்குளம் வாசிகள் தெரிவித்துள்ளார்கள்.

144 தடை உத்தரவின் பிரகாரம் பொது இடத்தில் இருவருக்கு மேல் சந்தித்து உரையாட முடியாது. கூட்டமாக யாரும் பேச முடியாது. இந்த தடை உத்தரவின் பிரகாரம் போராட்டத்தில் ஈடுபடுவோரை கைது செய்து அராஜக வழியில் தண்டனை வழங்க அரசிற்கு உரிமை இருப்பதாக மக்கள் விசனம் தெரிவித்துள்ளார்கள். 

அடிப்படை தேவைகளை நிறுத்தி விட்டு, பொய்யுரைக்கும் மாநில அரசு!

கூடங்குளம் சுற்று வட்டார கிராமங்களுக்கு வேண்டிய மின்சார வசதி தற்போது நிறுத்தப்பட்டிருப்பதோடு, உணவு விநியோகம், பஸ் சேவைகள், மற்றும் வெளியூர் தொடர்புகள் யாவும் துண்டிக்கப்பட்டிருப்பதாக அங்கிருந்து கிடைக்கும் செய்திகள் தெரிவிக்கின்றன.கூடங்குளத்தில் போதிய வசதிகளோடு வைத்தியசாலைகள் இன்மையால், மருத்துவத் தேவைகளைக் கருத்திற் கொண்டு மக்கள் வெளியிடங்களுக்கு செல்ல வேண்டிய தேவை இருக்கின்றது. ஆனால் தற்போது நோயாளர்கள் யாருமே வெளியே போக முடியாதவாறு தடுப்பரண்களை போலீஸ் ஏற்படுத்தி உள்ளதாக மக்கள் தெரிவிக்கின்றார்கள். நேற்று நள்ளிரவு இருதய நோயினால் பாதிக்கப்பட்டு முதியவர் ஒருவர் மேலதி சிகிச்சைகள் ஏதுமின்றி உயிரிழந்திருப்பதாகவும், மேலும் சில சிறுவர்கள் மேலதிக சிகிச்சையினை எதிர்பார்த்து காத்திருப்பதாகவும் அறிய முடிகின்றது. 

மாவட்ட செயலரோ கூடங்குளத்தில் எந்தவித வசதிகளும் நிறுத்தப்படவில்லை என, பொய்யறிக்கை வெளியிட்டு போலீஸின் செயலை நியாயப்படுத்தியுள்ளார்.

அரசியல்வாதிகளின் மௌனமும், ஆதரவும்!

கூடங்குளத்தில் அஹிம்சை முறையில் போராட்டத்தில் ஈடுபடும் அப்பாவி மக்கள் மீது தம் அராஜகத்தை கட்டவிழ்த்து விட்டிருக்கும் போலீஸின் நடவடிக்கைகள் தொடர்பில் மாநில அரசு மௌனம் சாதித்து வருகின்றது. வைகோவும், சீமானும் இன்றைய தினம் கூடங்குளம் வாழ் மக்களைச் சந்திக்க வருவதாக தகவல்கள் கிடைத்திருப்பதாகவும், தாம் தமது பிரச்சினைக்கு நல்லதோர் தீர்வு கிடைக்கும் நோக்கில் காத்திருப்பதாகவும் மக்கள் தெரிவித்துள்ளார்கள்.

அடுத்த கட்ட நடவடிக்கை என்னவாயிருக்கும்?

HRPC வழக்கறிஞர்கள் நேற்று நள்ளிரவு இடிந்தகரையில் உள்ள மக்களைச் சந்தித்துப் பேசியிருக்கிறார்கள். சிறையில் அடைக்கப்பட்டோரின் விபரங்களைப் பாதிக்கப்ப்பட்வர்களின் குடும்பத்தினரிடமிருந்து பெற்று, அவர்களை விடுவிப்பது தொடர்பில் நடவடிக்கை எடுக்கப்படும் என உறுதி மொழி அளித்திருக்கிறார்கள். மக்கள் விடாப் பிடியாக அணு உலையினை அகற்ற வேண்டும் எனும் கோஷங்களோடு போராட்டத்தில் உறுதியாக நிற்கிறார்கள். இராணுவம், மற்றும் போலீஸ் அதிகாரிகள் அறிவித்தல் ஏதுமின்றி (Without any arrest warrant) போராட்டத்தில் ஈடுபடும் மக்களை நள்ளிரவில் வீடுகளை உடைத்து கைது செய்வதில் குறியாக இருக்கிறார்கள். இனி என்ன நடக்கும் என்பதனை பொறுத்திருந்து பார்ப்போம்!

மக்கள் மத்தியில் காணப்படும் அச்ச நிலை!

அடிக்கடி உலங்குவானூர்திகளும், விமானங்களும் கூடங்குளத்தைச் சுற்றித் தாழப் பறந்து மக்களை அச்சத்தில் உறையச் செய்யும் வண்ணம் தமது நடவடிக்கைகலை முடுக்கி விட்டிருக்கின்றன. இதனால் மக்கள் மத்தியில் தாம் அனைவரும் பூண்டோடு அழிக்கப்படலாம் எனும் அச்ச நிலையும் காணப்படுகின்றது. விமானங்களும், உலங்குவானூர்திகளும் கடமையில் ஈடுபடும் போலீஸிற்கும், இராணுவத்திற்கும் பாதுகாப்பு வழங்கும் நோக்கில் பறப்பில் ஈடுபடுகின்றனவா? அல்லது மக்களைப் பயமுறுத்திப் போராட்டத்தை நசுக்கும் நோக்கில் பறப்பில் ஈடுபடுகின்றனவா என்பதனை தீர்மானிக்க முடியாதுள்ளதாக அங்கு வசிக்கும் மக்கள் அச்சம் வெளியிட்டுள்ளார்கள். 

இந்தச் செய்தித் தொகுப்பு உங்களை நாடி வர பங்களிப்பு நல்கியோர், 

கூடங்குளத்திலிருந்து : நண்பர் பாலா, மற்றும் நண்பர் சதீஷ்,

இவர்களோடு சென்னையிலிருந்து துவாரகன்.

எழுத்துருவாக்கம்: செல்வராஜா நிரூபன்.

இப் பதிவில் உள்ள படங்கள் யாவும் கூகிள் தேடல் மூலம் பெறப்பட்டவை.

Share