கல்லூரி நினைவுகளும் கண் முன்னே நிற்கும் கவிதைகளும்

என் சிந்தனையை சிறகடித்த சிட்டுக்கள் - சுகந் தரும் ரணங்கள்!

அவள் கையிலிருந்து லெட்டரும், தின் பண்டமும், என் கைக்கு தாவியது. கொஞ்சம் வெட்கப்பட்டு, லெட்டரை என் கையினுள் திணித்து விட்டு, ஓடி விட்டாள். நான் கொஞ்ச நேரம் என்னை மறந்தவனாய் அக் காலத்தில் பேமஸான "உயிரே...உயிரே இது தெய்வீக சம்பந்தமோ" பாடலை மீட்டியவாறு கற்பனையில் மூழ்க ஆரம்பித்தேன். அப்போது அருகே வந்த நண்பன் கனியன், என்னைச் சுய நினைவிற்கு கொண்டு வந்தான். அந் நேரம் தான் கையில் ஆர்த்திகா கொடுத்த லெட்டர் இருக்கிறதே என்று உணர்ந்து லெட்டரைப் பிரித்துப் படிக்கத் தொடங்கினேன். நீங்கள் இங்கே படித்துக் கொண்டிருப்பது என்னை கெடுத்த பெண்கள் தொடரின் ஆறாவது பாகத்தின் தொடர்ச்சியாகும். இத் தொடரின் ஏனைய பாகங்களைப் படிக்க கீழே உள்ள Drop Down Menu இல் கிளிக் செய்யுங்கள். எ.கெ.பொண்ணுங்கள் பாகம் 01 பாகம் 02 பாகம் 03 பாகம் 04 பாகம் 05 பாகம் 06

முத்துப் போன்ற தன் கையெழுத்தால் என்னைச் சொக்க வைக்கும் சொல் அலங்காரம் கொண்டு சிக்கனமாய் இரு பக்கத்தில் ஓர் கடிதம் வரைந்திருந்தாள் அவள். கடிதத்தைப் பிரித்துப் படிக்க முன்பதாகவே எனக்கு காதல் போதையில் பறப்பது போன்ற உணர்வு ஏற்பட்டது. அந் நேரம் அச் சம்பவம் ஓர் எதிர்பாராத நிகழ்வாய் அமைந்தது. மனம் ப்ரியத்துடன் நினைத்துக் கொண்டிருந்த, ப்ரியமானவள் என்னிடம் வந்து தன் ப்ரியத்தை ஒப்புவித்த இனிய நாள் அது. என் வாழ்க்கை பாதையில் பெப்ரவரி மாசம் 14ம் திகதி, 16 வருடங்களுக்கு முன்னரான நாட்களை எளிதில் மறக்க முடியாது. காதலெனும் போதை செய்யும் மாயா ஜாலங்கள் பலவாறாக வகைப்படும். இப்பொழுதும் அந்தச் சம்பவத்தை நினைக்கையில் அடி வயிற்றில் ஒரு வித அமிலம் சுரந்து என் உடலை குளிர்விக்கிறதே! "இது தான் காதல் - இது தான் கல்லூரி நினைவுகளா?" என மீண்டும் - மீண்டும் நினைக்க வைத்து என்னை ஏங்க வைக்கிறது இந் நினைவுகள்.

                                                                                                                                         11.02.1996
என் ப்ரியமான நிரூபனுக்கு, உங்கள் ப்ரியமுள்ள ஆர்த்திகா எழுதுவது,
நான் உங்கள் விழியோர விம்பத்தை தரிசித்து அனு தினமும் ஆதவனைக் கண்ட தாமரையாய் அகம் மகிழ்கிறேன். அது போல நீங்களும் நலமாக இருப்பீர்கள் என நினைக்கிறேன். நீண்ட நாளாய் என் மனதில் நீங்கள் பதியமிட்ட காதல் விதை இப்போது முளை கொள்ள ஆரம்பித்திருக்கிறது. கடைக் கண் பார்வையால் இந்த ஆர்த்திகாவை அசைத்த நீங்கள் காதலைச் சொல்லியும் அசத்துவீங்க என நினைத்திருந்தேன். ஆனால் என் நினைவுகளை மாத்திரம் அசைத்து விட்டு, நிஜப் பொழுதில் இதயத்து துடிப்பை மாத்திரம் அதிகரித்து ஏக்கத்தை கூட்டி விட்டு விலகிச் செல்வது போல நடித்தீங்க.

ஆனாலும் உங்கள் எண்ணமெல்லாம் என் மேல் தான் உள்ளதெனும் உண்மையினை புரியாதிருக்க நான் என்ன சிறுமியா?எப்படிச் சொல்லுவது என்று தெரியவில்லை. கடிதம் மூலம் என் முடிவை சொன்னாலும் ஒரு வேளை பிலிம் காட்டும் நோக்கில் என் கடிதத்தை ஊரெல்லாம் காட்டி விட்டு, காதலை குப்பையில் போட்டு விடுவீங்க என பயந்திட்டிருந்தேன். ஆனால் அபிநயா தான் உங்களுக்கும் என் மீது பிரியம் இருப்பதாக ஊகித்து சொன்னாள். எப்படி என்று தானே யோசிக்கிறீங்க?
வாரத்தில் உள்ள ஏழு நாட்களையும் வரிசை கிரமமாக குறிப்பெடுத்து, ஒவ்வோர் நாளும் நான் என்ன ஆடை அணிந்து வருகிறேன் என அறிந்து வைத்து அதற்கு மச்சிங்காக நீங்களும் உடை உடுத்தி வருவீங்களே! அந்த ஒரு காரணம் போதாதா?
வகுப்பறையில் ஆசிரியர் கேள்வி கேட்கும் போது, யார் முதலில் விடை சொல்லுவது எனப் போட்டி வருகையில் என்னை ஒரு தரம் பார்த்து விட்டு, விடை சொல்ல எழுந்த நீங்கள் மௌனமாய் அமர்ந்து நான் பதிலுரைக்கும் அழகை ரசிப்பீர்களே! அந்தக் காரணம் போதாதா?

கோயில் திருவிழாவில் நான் போகும் பாதையெல்லாம் நீங்களும் வந்தீங்களே! நான் வாங்கி குடித்த அதே ராஜா ஐஸ்கிரீமை நீங்களும் வாங்கி சுவைத்த படி கடைக் கண்ணால் என்னை பார்த்தீங்களே! இப்படி பல காரணங்கள்! ஒன்று தெரியுமா நிரூ! என்னுடைய விஞ்ஞான பாட நோட்ஸ் கொப்பியை (நோட்டு புக்கு) வாங்கி நீங்கள் தவற விட்ட குறிப்புக்களை எழுதியது மட்டுமன்றி, நான் தவற விட்ட குறிப்புக்களையும் உங்கள் மென்மையான கையெழுத்தால் எழுதி கொடுத்தீங்களே! இதுவும் எனக்கு உங்கள் மீதான காதலை உரைப்பதற்கு உறுதுணையாக இருந்ததுங்க.

எனக்கு உங்களை மிகவும் பிடித்திருக்கிறது. I LOVE YOU NIRUPAN. NIRUPAN LOVE WITH ARTHTHIKA. மறைக்காமல் உங்கள் மன உணர்வை பதில் கடிதத்தில் சொல்லுங்கள். நீங்கள் என்னை வெறுத்தாலும் உங்களுக்காய் இவ் உலகில் நானிருப்பேன் என்பதனை நினைவில் கொள்ளுங்கள்!

மறு மடல் கண்டு, உங்கள் இருதயம் குளிரும் பதில் கடிதத்துடன் சந்திருக்கும் வரை விடை பெறுகிறேன்.
                                                                                                இப்படிக்கு;
                                                                                            உங்கள் அன்பிற்காக ஏங்கும்;
                                                                                             ஆர்த்திகா.

இவ்வாறு ஓர் கடிதம் எழுதி தந்தாள். கூடவே தன் மனசையும் காகிதத்தில் பத்திரப்படுத்தி அனுப்பினாள் ஆர்த்திகா. அன்று முதல் என் தூக்கம் போய் விட்டது. அந்தப் பதின்ம வயதில் அவள் நினைப்பில் என் கால்கள் என்னை ஆகாயத்தில் பறக்க வைக்கும் நோக்கில் உந்தித் தள்ள ஆரம்பித்தன. அவளை நினைக்கையில் எனக்குள் ஓர் இனம் புரியாத மாற்றம் உருவாகியது. அந்த மாற்றம் பற்றியும், என் பதில் கடிதம் எப்படி அமைந்தது தொடர்பிலும் அறிய ஆவலா? அடுத்த பாகம் வரை காத்திருங்கள்.

பிற் சேர்க்கை: "என்னை கெடுத்த பெண்கள்" எனும் தலைப்பில் இத் தொடரினை எழுதி வந்தேன். கெடுத்த எனும் சொல் ஆபாசம் எனப் பலர் முகம் சுளிப்பதாக புகார்கள் வந்ததையடுத்து இப்போது புதிய தலைப்பில் இத் தொடரினை தொடர்கிறேன்."

பெண்ணையும் கவிதைக்கு பலர் ஒப்பிடுகிறார்கள். உண்மையில் பெண்ணும் ஓர் கவிதை தான். ஆதலால் தலைப்பில் கவிதை என்று வைக்கலாயிற்று. 

Share