ப்ராப்ள பதிவர் பிலாசபி பிரபாகரனின் மறு பக்கம்!

நாற்று வலைப் பதிவினைத் தரிசிக்க வந்திருக்கும் அனைத்து உள்ளங்களுக்கும் வணக்கம்,
இணையத்தில் எழுதி வரும் பல்லாயிரக் கணக்கான தமிழ் எழுத்தாளர்களைப் பற்றி நாம் இலகுவில் அறிய முடியாதவர்களாக இருப்போம். தனிபட்ட மனித விருப்பு வெறுப்புக்களும், பாதுகாப்பு காரணங்களும், தனி நபர் உரிமைகளும் தான் ஒருவரைப் பற்றிய விபரங்களை மறைத்து, அவரது படைப்புக்களினூடாக அந்த எழுத்தாளர் எப்படி இருப்பார் எனும் எண்ணத்திற்கான விடையினை வழங்கி நிற்கின்றது. இந்த வகையில் வலைப் பதிவர்கள் மத்தியில் நன்கு அறியப்பட்ட "ப்ராப்ள பதிவர் பிலாசபி பிரபாகரனின் மறு பக்கம்" என்பது எப்படியிருக்கும் என நாம் அனைவரும் அறிவதற்கு ஆவல் கொண்டிருப்போம் அல்லவா? எமக்கு பிலாசபி பிரபாகரன் என்கின்ற தனி மனிதர் பற்றிய விபரங்கள் இப்போது வேண்டாம். 

பல பதிவர்களுக்கு தன் எழுத்துக்கள் மூலம் நன்கு அறிமுகமான பிலாசபி பிரபாகரனின் மறு பக்கத்தினை அறிய விரும்பின்;அவரினூடாக வெளிப்படும் அவரது எழுத்துக்களை நாம் அலசிப் பார்க்கலாம் அல்லவா? பிரபல பதிவர்கள் என்றாலே, ப்ராப்ளங்கள் அவர்களைச் சூழ்ந்து கொள்ளும் என்பது வலையுலக நியதி. இதற்கு அமைவாக பல அனானிகளின் தொல்லைகளையும், வேறு சில முகமூடிகளின் தொலைபேசி மிரட்டல்களையும் பிரபாகரன் எதிர் கொண்டு வருவது நாம் அனைவரும் அறிந்த விடயம். ஆகவே தான் ப்ராப்ளங்களை அடிக்கடி எதிர் கொள்ளும் பதிவர் என்பதால் ப்ராப்ள பதிவர் பிலாசபி பிரபாகரன் என்றோர் அடை மொழியினை இப் பதிவிற்குச் சேர்க்க வேண்டியதாகி விட்டது.நாற்று வலைப் பதிவினூடாக "அம்பலத்தார் பக்கங்கள்" வலைப் பதிவின் சொந்தக்காரர் திரு.அம்பலத்தார் அவர்கள் வலையுலகப் படைப்பாளிகளின் எழுத்துக்களை விமர்சனமாகத் தொகுத்து தருகின்றார். இப் பதிவினை அம்பலத்தார் பார்வையில் வெளிவரும் பிலாசபி பிரபாகரனின் படைப்புக்கள் பற்றிய குறிப்புக்கள் அலங்கரிக்கின்றது. 

பிரபாகரனின் தத்துப்பித்துவங்கள் ஒரு அதிரடி அலசல்! 

பிரபாகரனின் தத்துபித்துவங்கள்! ஆச்சரியமான பெயரில் ஒரு வலைப்பூ. பிரபாகரனின் தத்துபித்துவங்கள் எனும் பெயருக்கும் "Wine Shop" பானருக்கும் ஏற்ப இங்கே வெளியாகிருக்கும் அதிகளவான பதிவுகளும் மசாலா, சினிமா போன்றவற்றிகு அதிக இடம் கொடுக்கும் ஜனரஞ்சக பதிவுகளாக இருக்கின்றன.எது எதெற்கெல்லாமோ துரோகிப் பட்டம் கொடுக்கும்; எதற்கெடுத்தாலும் உணர்ச்சிவசப்படும் நம்ம ஈழத் தமிழ் உறவுகள் யாரும் பதிவர் பிரபாகரனின் வலைப் பூவினை நோக்கி,"பிரபாகரனின் தத்துபித்துவங்கள்" என்று பெயரிட்டு Wine Shop பனரிட்டு இந்தமாதிரி பதிவுகளை போட்டு நம்ம தலைவரையும் கொள்கைகளையும் நாறடிக்கிறானே என்று இது வரை போர்க்கொடி தூக்காததும், துரோகிப் பட்டம் கொடுக்காததும் ஆச்சரியம்தான். 

வலைப் பூவின் Wine Shop பானர் அவரது வலைப்பூ பெயருடனும் அவரது கலந்து கட்டிய எழுத்தில் அமைந்த பதிவுகளுடனும் ஒன்றிப் போகும் அளவிற்கு முகப்பு படமாக கொடுத்திருக்கும் அல்லது முட்டிக்கு முட்டி மோதிக் கொள்வது போன்ற தோற்றப்பாட்டைக் கொடுக்கும் ஆளவந்தான்  பானர் வலைப்பூவிற்கு நல்ல பொருத்தமானதாக தோன்றவில்லை. இனி அவரது படைப்புக்களைப் பற்றிக் கொஞ்சம் பார்ப்போமா? 

நித்யா: நான் படித்தவரையில் நண்பர் பிரபா ஒரு கதை முயற்சி செய்திருக்கிறார். நித்யா பிரபாகரனது முதலாவது சிறுகதை முயற்சி. அது ஒரு சிறுகதை என்பதைவிட I.T. இளைஞன் ஒருவனது ஆரம்பகால அலுவலக அனுபவப் பகிர்வு என்றே சொல்லலாம். I.T. வேலையிடம் ஒன்றின் அன்றாட நிகழ்வுகளை அப்படியே நம் கண் முன் கொண்டு வந்திருப்பது பாராட்டிற்குரியது. ஆரம்பத்தில் சுவாரசியமாக தொடங்கும் கதை போகப்போக தமிழ் பாடப் புத்தகத்தில் வரும் ஈர்ப்புத்தராத எதோ ஒரு பாடம்போல சுவாரசியம் குறைந்து செல்வது போல் தெரிகிறது. ஒரு நல்ல படைப்பானது வாசகனை அதை படிக்கும் ஒருசில நிமிடங்களாவது அந்தப்பக்கம் இந்தப்பக்கம் திரும்பவிடாது கட்டிப் போடவேண்டும். எனக்கு ஏனோ இக்கதையுடன் பூரணமாக ஒன்றிப்போக முடியவில்லை. கதைக்கு முக்கியம் வார்த்தைப் பிரயோகம்.எவ்வளவு நல்ல கதையையும் சொதப்பலான எழுத்து நடை மோசமானதாக்கிவிடும்.

பிரபா சாதாரண விடயங்களை பதிவிடும்போது கைவசப்படும் அளவிற்கு இங்கு வார்த்தைகளும் வாக்கியங்களும் கதையில் அவருக்கு கைகொடுக்காதது துரதிஸ்டமே. அவர் இக் கதை மூலம் எதைக் கூறவருகிறார் என்பது புரியாமலே கதை நிறைவடைகிறது. நித்யா போன்ற பெண்கள் அடுத்தவரது பலவீனத்தை தங்களுக்கு சாதகமாக பயன்படுத்திக் கொள்வதை சொல்லவருகிறாரா?அல்லது மேலதிகாரிகள் கைதேர்ந்த மேய்ப்பர்களாக மனோதத்துவம் தெரிந்தவர்களாக "ஆடுகிற மாட்டை ஆடி பாடுகிற மாட்டை பாடி பால் கறப்பது போல" வேலை வாங்குவதில் வல்லவர்கள் என்று கூறுகிறாரா? புரியவில்லை. கதை எழுதுவதில் அவர் தனக்கென ஒரு இடத்தை பிடிக்க கடந்து வர வேண்டிய தூரம் அதிகம் இருக்கிறது என்றே கூறலாம். 

ஞாநியின் கொலவெறியும் செல்வராகவனின் அறிவுதிருட்டும்...!

நான் படித்தவற்றில் பிரபாவினது ஜனரஞ்சக பதிவுகளில் "ஞாநியின் கொலவெறியும் செல்வராகவனின் அறிவுதிருட்டும்...!" சுவாரசியமானதாக இருந்ததுபோதிலும் அடிக்கடி ஞானியின் கருத்துக்களுடன் தன் பதிவுகளின் கருத்துக்களும் ஒத்துப்போவதாக குறிப்பிடுவதன் மூலம் தானும் ஞானி போல திறம்படச் சிந்தித்து எழுதுகிறேன் என்று சுய தம்பட்டம் அடித்துக்கொள்வது போன்ற எண்ணத்தை தோற்றுவிக்கிறது. இவ்வாறான விடயங்களில் பிரபாகரன் கொஞ்சம் கவனம் செலுத்தினால் இன்னும் சிறப்பான படைப்புக்களைப் பகிர முடியும்.

கேரக்டர் – ப்ளேபாய் பரந்தாமன்:

"கேரக்டர் – ப்ளேபாய் பரந்தாமன்" எனும் பதிவில் பரந்தாமன் எனும் கரக்டரை ரொம்ப இயல்பாக அப்படியே நம் கண்முன் கொண்டு வந்து நிறுத்தியது போல இருந்தது. இந்தப்பதிவு அவரது நித்யா கதையைவிட நன்றாக இருக்கிறது. பெரும்பாலான பதிவுகளிலும் அதிக விடயங்களை சொல்ல முனைந்திருக்கிறார்.இது சாதாரண வாசகர்களிற்கு அனைத்து விடயங்களையும் கிரகித்துக் கொள்வதில் சிரமங்களை ஏற்படுத்தும் சந்தர்ப்பத்தை கொடுத்திருக்கலாம். "சினிமா விமர்சனப் பதிவுகள்" அவரது வலைப்பூவின் சிறப்பு அம்சமாக இருக்கிறது. அவரது பதிவுகளையும், வலைப் பூவிற்கு வரும் பின்னூட்டங்களையும்,வாசகர் வட்டத்தையும், பார்க்கும்போது ஒருவிடயம் நன்கு புரிகிறது. "புத்தகங்களை படிப்பதை விட மனிதர்களை படிப்பதில் அதிக விருப்பம்" என பிரபா தனது சுயவிபரத்தில் குறிப்பிட்டு உள்ளதுபோல அவர் வாசகர்களின் நாடி பிடித்து மனநிலை அறிந்து அவர்களைக் கவரும் வண்ணம் எழுதுவதில் வல்லவர் என்பதை நிரூபித்துக்காட்டியிருக்கிறார். அதில் சந்தேகத்திற்கு இடமில்லை. 

பிரபாகரனின் இணைய எழுத்துலகப் பணி மேலும் தொடரட்டும் என்று உங்கள் அனைவருடனும் இணைந்து வாழ்த்தி,

மீண்டும் மற்றுமோர் விமர்சனப் பதிவினூடாக உங்கள் நாற்று வலைப் பதிவின் வாயிலாகச் சந்திக்கும் வரை, விடை பெற்றுக் கொள்வது;

நேசமுடன்,

அம்பலத்தார்.

நன்றி,

வணக்கம்!

http://ampalatharpakkam.blogspot.com/

Share