சைக்கிள் கேப்பில் சைட் அடிக்கும் சைலன்டான பெண்கள்!

நம்மில் பலர் எம் வாழ் நாளில் என்றோ ஒரு நாள் நம்மை; ஒருத்தனோ ஒருத்தியோ திரும்பிப் பார்க்க மாட்டார்களா எனும் ஏக்கத்தினைத் தாங்கியவர்களாக எம் இளமைப் பருவத்தினைக் கடந்து வந்திருப்போம். ஆணுக்காகப் பெண்ணும், பெண்ணுக்காக ஆணும் காத்திருக்கும் விடயங்களை விட; "தன்னைப் பார்த்து ரசிக்க ஒருவர் காத்திருப்பாரே" எனும் ஆவலுடன் அழகுபடுத்திச் செல்லும் நிகழ்வுகள் இருக்கிறதே! அப்பாடா! அவை பருவ வயது மாற்றத்திற்கமைவாக எம்மை விட்டுத் தூர விலகிச் சென்றிருப்பது போலத் தோன்றினாலும், மீளவும் நினைத்துப் பார்க்கையில் சுகம் தரும் நினைவுகளாக அல்லவா இருக்கின்றன.

பள்ளியில் படிக்கும் போது எம்மில் பலருக்கு 13-16 வயதிற்கு இடைப்பட்ட காலத்தில் மனதினுள் ஓர் இனம் புரியாத குறு குறுப்பும், எதிர் பாலாரினைக் கண்டு விலகி நடக்கும் போது அவர்கள் எம்மைப் பார்க்க மாட்டார்களா எனும் ஏக்கமும் இயல்பாகவே எழுந்திருக்கும். அதிலும் நாம் டீன் ஏஜ் பருவத்தினை எட்ட முன்பதாகவே நம்முடன் கூடப் படிக்கும் எதிர்ப் பாலாரைப் பற்றிய சிறிய சிறிய விடயங்களில் கொஞ்சம் அக்கறை செலுத்த தொடங்கி விடுவோம். இதுவே மெது மெதுவாக சைற்(ட்) அடித்தல் என்ற நிலையினை நோக்கி எம்மை நகர்த்த ஆரம்பித்து விடுகின்றது. 

சிறு வயதில் எம்மோடு கல்வி கற்கும் எதிர்ப் பாலாரில் எமது இயல்பிற்கேற்றவாறு ஒருவரைச் சோடி கட்டி பட்டம் பளிக்கத் தொடங்கி விடுவார்கள். இந்த விடயமும் பின் நாளில் அதே ஆள் மீதான பிரியம் அதிகரிப்பதற்கு காரணமாக ஆகி விடுகின்றது. ஆண்களையும், பெண்களையும் பொறுத்த வரை கல்லூரி வாழ்வில் பலரைத் திருட்டுத் தனமாக ரசிக்கின்ற இயல்பு தான் அதிகமாக காணப்படும். ஆண்களின் பொதுவான குணவியல்பு கொஞ்சம் அழகான, மா நிறம் போன்ற பெண்ணை அல்லது வெள்ளை நிறப் பெண்ணை கண்டு பின் தொடர ஆரம்பிப்பதாகும். ஆனால் பெண்களின் குணவியல்பு இந்த விடயத்தில் அலைய விட்டு தன்னை ரசிக்கப் பலர் இருக்கிறார்களே எனப் பெருமிதம் கொள்வதாக அமைந்து கொள்ளும். 

தனக்குப் பின்னால் பல ஆண்கள் சைற் அடிப்பதற்காக அலைகின்ற போது தான் ஓர் தேவதை போன்ற நிலையினை உணர்வதாக என்னுடன் காலேஜ்ஜில் படித்த நண்பி ஒருத்தி கூறினாள். 13-16 வயதுகளில் ஆண்களிடையே ஆரம்பிக்கும் இந்தப் பழக்கம் பல்வேறுபட்ட விகாரமான மன உணர்வுகளை ஆண்களிடத்தே தூண்டுதற்கும் காரணமாக அமைந்து கொள்கின்றது. பாடசாலை செல்லும் போது காற் சட்டைப் பாக்கட்டினுள் சீப்பு கொண்டு போதல், பவுடர் கொண்டு செல்லுதல் முதலியவை இந்த சைற் அடித்தல் நோய்க்கான ஆரம்ப அறிகுறிகளாகும். பாடசாலை முடியும் தருணம் ஆண்கள் ஓடிச் சென்று பள்ளிக் கூட டாய்லெட்டினுள் உள்ள கண்ணாடியினைப் பார்த்து தம் தலையினை வாரி, பவுடரைப் பூசித் தம்மை அலங்கரிக்கத் தொடங்கி விடுவார்கள். 

பள்ளிக் கூட டாய்லெட்டில் கண்ணாடி இல்லை என்றாலே போதும். இருக்கவே இருக்கு கைக்கு அடக்கமான வட்டக் கண்ணாடி. சைட் அடிக்க மேக்கப் பண்ணும் பசங்களில் யாராச்சும் ஒருத்தன் இந்தக் கண்ணாடியைத் தன் பாக்கெட்டினுள் (POCKET) வைத்திருப்பான். மேக்கப் பண்ணி, வாசம் நிறைந்த பவுடரை மூஞ்சி முழுக்க பூசிய பின் பாடசாலை நிறை வடைந்ததும் ஓடிச் சென்று லேடீஸ் ஸ்கூலுக்கு முன்னாடி காத்திருக்க வேண்டியது தான் நம்ம பசங்களோட வேலை. இந்த வேளையில் நம்ம பசங்களில் சிலர் கூட்டமாக நின்று தான் பொண்ணுங்களை லுக்கு விட்டுப் பார்ப்பாங்க. 

ஏடா கூடமாக அடுத்த காலேஜ் பசங்க இவங்க வழியில குறுக்கிட்டாலே போதும். தம்மை ஒரு ஆக்‌ஷன் ஹீரோவாக லேடிஸ் ஸ்கூலுக்கு முன்னாடியே காண்பித்து பெண்டை நிமிர்த்திடுவாங்க. அன்றைய காலத்தில் சைட் அடிக்கும் போதெல்லாம் நாம சைக்கிளைத் தான் பின் தொடருவதற்கு யூஸ் பண்ணியிருப்போம். ஆனால் இன்றைய காலப் பசங்க மோட்டார் சைக்கிளை அல்லவா யூஸ் பண்றாங்க. சைக்கிளில் லேடீஸ் ஸ்கூல் முன்னாடி இருந்து ஒரு பெண்ணைப் பார்த்து, அவளைப் பின் தொடர்ந்து செல்லும் போது உச்சி வெய்யில் அதிகமாக இருந்தால் டயர் பஞ்சராகிடும். அப்புறம் என்ன சைக்கிளை உருட்டிக் கொன்று நடக்க வேண்டியது தான்.

பொண்ணுங்களை ஆண்கள் பார்க்க முன்னாடி தெரிஞ்சிருக்க வேண்டிய மொதல் மேட்டர் கண்ணடிப்பது. ஒரு பெண்ணை ஆண் மெதுவாக கடந்து செல்லும் போது வலது கண்ணால் ஜாடை காட்டத் தெரிந்திருக்க வேண்டும். கண்ணடிக்கத் தெரியலைன்னா கவலை வேணாம். பள்ளியில் இந்த மேட்டரில PHD முடிச்ச ஒருத்தன் கண்டிப்பா இருப்பான். அவன் எமக்கு கண் அடிப்பது முதல், விசில் அடித்து (சீழ்க்காய்) அடித்து முன்னாலே போகும் பெண்ணைத் திரும்பிப் பார்க்க பண்ணுவது எப்படி என்பது வரை அழகாக சொல்லிக் கொடுப்பான். பெண்களுக்கும் இந்த மாதிரியான பயிற்சிகளை அவர்களின் கல்லூரித் தோழிகள் சொல்லிக் கொடுப்பார்கள். 

இந்த மேட்டரில பெண்கள் கழுவுற தண்ணீரில் நழுவுகின்ற மீன் மாதிரித் தான் நடந்து கொள்வார்கள். தமக்கு எதிரே வரும் ஆண்களைப் பார்த்து மெதுவாக கண்ணால் ஜாடை காட்டி விட்டுப் பெண்கள் பார்த்தும், பார்க்காதது போன்று சென்று விடுவார்கள். அப்பாவிப் பையன் மனமோ "தம்மையும் ஒருத்தி பார்த்துக் கண்ணடித்து விட்டாளே!" எனும் எண்ணத்தில் அவள் பின்னே அலையும். காலேஜ்ஜில் படித்த காலத்தில்; ஒரு பெண்ணிடம் உரையாடிய போது, தமக்குப் பின்னே பல ஆண்களை வர வைப்பது, அலைய வைப்பது தமது மனதிற்கு இன்பமாகவும், தம்மை தாம் வசிக்கும் ஏரியாவில் ஹீரோயின் போல காண்பிப்பதற்கும் ஏதுவாக அமையும் என்றும் கூறினாள். 

பல பேரை அலைய விட்டுப் பார்ப்பது தான் அதிகமான பெண்களின் நோக்கமாக இருக்கும் எனவும் கூறினாள் அவள். நமக்குப் பின்னே வரும் எல்லா ஆண்களோடும் நாம் பேச மாட்டோம். ஒவ்வோர் நாளும் நமக்குப் பின்னே அலைய வேண்டும் எனும் நோக்கில் புது ட்ரெஸ் வாங்கி உடுத்தி வரும் ஆண்களும் உண்டு என கூறினாள் அவள். பெண்களுக்குள்ளே போட்டி நடக்குமாம். யாருக்குப் பின்னே அதிகளவான பசங்க வாறாங்க எனும் போட்டி காரணமாகவே; "தாம் ஒரே ஒரு தடவை ஒரு பையனைப் பார்த்தும் பார்க்காதது போன்று கண்ணால் ஜாடை காட்டி விட்டுச் சென்று விடுவோம்" என்று கூறினாள் மற்றுமோர் நண்பி. 

தொடர்ச்சியாக நம்மை ஒருவர் பின் தொடர்ந்து வந்து சைற் அடிக்கும் போது; "இவர் வேணாம், இவரை இத்தோடு Stop பண்ணிடனும் என நினைத்தால் உடனடியாக பின்னே திரும்பி பார்ப்போம். கொஞ்சம் கூச்ச சுபாவம் உள்ள ஆணாக இருந்தால் அன்றுடன் பின் தொடருவதை நிறுத்திடுவான்." அதனையும் மீறி அவன் வந்தால் "ஏன்டா நாயே! உனக்கு வேற வேலை இல்லையா? செருப்பு பிஞ்சிடும் என்று பேசினாலே" போதும் என்றாள் இன்னோர் நண்பி. பெண்களின் உள் மனதிலும் திருட்டுத் தனமாக ஆண்களைச் சைட் அடிக்கும் பழக்கம் இருக்கின்றது. ஆனால் அவர்கள் எல்லா நேரங்களிலும் அப் பழக்கத்தினை வெளிக் காட்ட மாட்டார்களாம். 

சைட் அடித்தல் தொடர்பில் பதிவர்களின் எண்ணக் கருத்துக்கள்:

ஆண்களில் பலர் பின் தொடர நினைப்பது சுமாரான பிகர்களை விட சூப்பரான பிகர்களைத் தான் என்று கூறுகின்றார் "அட்ராசக்க வலைப் பதிவின் ஓனர் திரு. சிபி. செந்தில்குமார்" அவர்கள். உண்மை தானே! நம்மில் பலர் கொஞ்சம் முக வெட்டான- வட்ட மதி போன்ற முகமுள்ள பெண்ணின் பின்னே அவள் அட்டுப் பிகர் ஆக இருந்தால் அலைகிறோமா? இல்லையே மனதை வாட்டும் Goodu பிகராக இருந்தால் தானே அலைகின்றோம் என தன்னுடைய சைட் அடித்த பள்ளிக் கால எண்ணங்களைப் பகிர்ந்து கொண்டார் "தமிழ் ஆதி ப்ளாக் ஓனர் ஐடியாமணி" அவர்கள். "நாஞ்சில் மனோ ப்ளாக் ஓனர் நாஞ்சில் மனோ" அவர்களிடம் கேட்ட போது சைட் அடிப்பதற்கு என்னைப் பொறுத்த வரை பெண்களின் மனசு தான் Very Important எனக் கூறி ஆச்சரியப்படுத்தினார். நான் கல்லூரி படிக்கும் போது வெள்ளையோ, கறுப்போ என்று பார்க்க மாட்டேன். ஆனால் மனசில அவங்க நல்லவங்க என்று தோன்றினால் லுக்கு விட்டுப் பார்ப்பேன் என்றார் அவர். 

ஆக சைட் அடித்தலும் ஒவ்வொருவரின் மனங்களைப் பொறுத்து வேறு பட்டுக் கொள்கின்றது என்பதற்கு மேற்படி விடயங்களை உதாரணங்களாக கொள்ளலாம். "இளைய பதிவர்களான மதுரன், KSS.ராஜ், துஸ்யந்தன், தமிழ்வாசி பிரகாஷ்" ஆகியோரிடம் சைட் அடித்தல் பற்றிச் சில டிப்ஸ் கேட்டேன். சுமாரான பிகராக இருப்போரை ஆண்கள் மனம் நாடுவதில்லை என்றும், சூப்பரான பிகராகவும், கொஞ்சம் Modern ஆகவும் இருந்தால் தான் அதுங்க பின்னாடி நாம அலைஞ்சாலும் அதுக்கும் ஒரு ஹிக்கு இருக்கும் எனத் தம் எண்ணங்களைப் பகிர்ந்து கொண்டார்கள் இவர்கள்.. இந்தக் காலத்தில மோட்டார் சைக்கிளும், டச் மாடல் போனும் கையில இருப்போருக்குத் தான் முன்னுரிமை கொடுக்கிறாங்க பொண்ணுங்க. ஸோ யாராச்சும் களத்தில இறங்க முன்னாடி கையில போனும், காலுக்குள் மிதிச்சிட மோட்டார் பைக்கும் வாங்கிக்குங்கோ என உசுப்பேற்றினார்கள் இன்றைய இளைய உள்ளங்கள். 

சைட் அடிக்கிற பெண்களைத் தான் திருமணம் செய்ய வேண்டும் என்று சட்டம் இருக்கா? இல்லேத் தானே! ஸோ, அதாலா தாரளமாக சைட் அடியுங்க என "பதிவர் கானா வரோ" அவர்கள் தன் உணர்வுகளைப் பகிர்ந்து கொண்டார். ஆண்களும், பெண்களும் பள்ளியிலும், டியூசன் சென்டர்களிலும், கோயில்களிலும் தம் சைட் அடித்தல் வேலையினைத் தொடங்கி, தாம் போகும் இடங்களெல்லாம் தம் எதிர்ப் பாலாரை அலைய வைப்பதனை ஒரு பொழுது போக்கு அம்சமாக கருதுகின்றார்கள். இன்றைய பெண்களில் சிலர் கொஞ்சம் இறுக்கமான உடையணிந்து தளுக்கு குலுக்கி வந்தால் தான் ஆண்கள் பார்வை நம் மேலே படுகின்றது எனவும், இல்லேன்னா யாருமே கண்டுக்கிறாங்க இல்லையே எனவும் ஆதங்கப்படுகின்றார்கள். இன்னும் சிலரோ மேற் சட்டையினூடாக நெஞ்சு பிதுங்கித் தெரிவது மாதிரி உடையணிந்து ஜாடை காட்டி அலைய வைப்பதனையும் இன்றைய காலத்தில் பெண்கள் ஜாலியாக நினைத்துச் செய்கிறார்கள் என்று கூறினார்கள். 

இது போல சுடிதார், சாறியில் அணிந்து வரும் பெண்களை விட, Modern ட்ரெஸ் மங்கைகளுக்குத் தான் மவுசு அதிகம் என்பதால் பல பெண்கள் இப்போது ஆண்கள் பார்வை தம் மீது பட வேண்டும் என்பதற்காகவே Modern மாடல்களாக மாறிக் கொள்கின்றார்கள் என கூறினார் "விக்கியின் அகட விகடங்கள் ப்ளாக் ஓனர் விக்கி உலகம்" அவர்கள்.. ஆண்கள் எப்போதும் வெளிப்படையாகவே சைட் அடித்தல் தொடர்பான விடயங்களை வெளிப்படுத்துவார்கள். ஆனால் பெண்களில் அதிகளவானோர் சைக்கிள் கேப்பில் மென்மையான உணர்வு கொண்டோராக இருந்து தம் உணர்வுகளை வெளிப்படுத்துவதால், பிரச்சினை ஏதாச்சும் வந்துட்டா இலகுவில் தப்பித்துக் கொள்கின்றார்கள் என்றார் "உணவு உலகம் ப்ளாக் ஓனர் ஆப்பிசர் சங்கரலிங்கம்" அவர்கள். 

வெளி நாடுகளில் கிழவிங்க கூட தம் உடம்பினை உடற் பயிற்சி செய்து சிக்கென்று வைத்திருக்கிறாங்க. ஆனால் நம்மூர் பொண்ணுங்க 30+ வயதாகிட்டாலே தொந்தியும், தொப்பையுமாக ஆகிடுறாங்க. இதனால நம்ம ஊர் பொண்ணுங்களை விட, பாரின் பொண்ணுங்க மேல லுக்கு விடுவதும் ஒரு ஹிக்கு என்று சொல்கிறார்கள் பதிவர்கள் "காட்டான், மற்றும் யோகா ஐயா" ஆகியோர். "அட போங்க நீரூபன், நம்ம ஊரில உள்ள பொண்ணுங்க பின்னாடி லோ...லோ என்று அலைவதை விட நடிகைகளை கனவில் சைட் அடித்து மகிழ்வது, அதுவும் ஹன்சிகாவிற்காக ரசிகர் மன்றம் கனவில் கட்டி மகிழ்வது போல சைட் அடித்தல் தான் நமக்குச் சரிப்பட்டு வரும்" என்று சொல்கிறார்கள் பதிவர்கள் "செங்கோவி, மைந்தன் சிவா மற்றும் பிலாசபி பிரபாகரன், வேடந்தாங்கல் கருன், வந்தேமாதரம் சசி" ஆகியோர். காலங்கள் கடந்தாலும், காலேஜ் வாழ்வில் சைட் அடித்த நினைவுகள் எம் மனதை விட்டு இலகுவில் மறைந்து விடுமா என்ன?

************************************************************************************************************************

விசேட அறிவித்தல்: அன்பிற்கினிய சொந்தங்களே! அதிகரித்த வேலைப் பளு காரணமாக என்னால் உங்கள் வலைகளுக்கு வழமை போல வர முடியவில்லை. என் பதிவில் தவறுகள் ஏதும் இருந்தால் பின்னூட்டம் ஊடாகச் சுட்டிக் காட்டுங்கள். எனக்கு கிடைக்கும் ஓய்வு நேரத்தில் வழமை போன்று உங்கள் வலைப் பதிவுகளுக்கு கண்டிப்பாக நான் வருவேன். ஆனாலும் நான் உங்களுக்குப் பின்னூட்டம் போடுகின்றேன் என்பதற்காக யாரும் பதிலுக்குப் பதிலாகப் பின்னூட்டம் எழுத வேண்டாம்! (மொய்க்கு மொய் வேணாம்)பதிவினைப் படித்த பின்னர் உங்கள் வருகையை அடையாளப்படுத்தா விட்டாலும், வழமை போல நான் யார் யார் வலைகளுக்கு வருகின்றேனோ, வந்து கொண்டே இருப்பேன்! 

************************************************************************************************************************

Share