விதானையாரின் பெட்டையிடம் சிக்கிய விடலைப் பருவ நினைவுகள்!

எதிர் வாங்கில் வந்திருப்பாள்

என்னை விட உயர்ந்திருப்பாள்

புதிர் போட்டு புன்னகைப்பாள்

பூங் குழலால் உரசிடுவாள்

கதிர் பட்டு(க்) கண்ணுடையாள்

காதல் மொழி பேசிடுவாள்

புதிர் நீக்கி என்னிடத்தே

பூங்கோதை நீ வருவதெப்போ?

செம்பவளச் சிங்காரி - அவள்

சின்ன இடை ஒய்யாரி

அம்புலியின் பூங்கோதை - அவள்

அன்ன நடை மாக்கோதை

கும்மிருட்டு(க்) குழற்காரி - அவள்

குயிற் பாட்டில் சிருங்காரி

செம்பருத்தி வாய்க்காரி- எனை(ச்)

செவ் இதழால் நனைப்பதெப்போ?

எண்ணிரண்டு வயதாம்; அவள்

என்னை விட நிறமாம்

பெண்களுக்குள் அழகாம்; அவள்

பேச்சு மொழி சுவையாம்

கண்ணிரண்டில் ஒளியாம்; அவள்

கன்ன மதில் குழியாம்

எண்ணி எண்ணித் தவிக்கும்

என்னை நீயும் புரிவதெப்போ?

தேதி வைக்கும் முன்பே - இன்ப(த்)

தேன் மழையில் நனைவோம்

ஆதி முதல் அந்தம் வரை

அனு தினமும் கற்போம்

பாதி உயிர் பிரிந்தாலும் - உலகில்

பாச வலி மறவோம்

மீதி உயிர் இருப்பின்- நாம்

மீண்டும் மீண்டும் பிறப்போம்!

பிற் சேர்க்கை: இற்றைக்குப் பதினொரு வருடங்களுக்கு முன்பதாக என்னால் எழுதப்பட்டு எம் நாட்டின் போர்ச் சூழலின் இடப் பெயர்வில் சிக்குண்டு இக் கவிதையும் தொலைந்து விட்டது. இக் கவிதைக்கான சந்தமும் வரிகளும் என்னுள்ளே மனப் பாடமாய் இன்று வரை பதிந்திருக்கிறது.இதற்கான காரணம் நான் படித்த டியூசனில் எனக்கு எதிரே இருந்த நேமிசாவைப் (பெயர் மாற்றப்பட்டிருக்கிறது) பார்த்து நானும் ஆசையோடு இக் கவிதையை என் நோட் புக்கில் எழுதி வைத்திருந்தேன். என் அருகே இருந்த என் நண்பன் செய்த நாச வேலையால் ஆசிரியரின் கையில் கவிதை மாட்டி விட, அப்புறம் என்ன நானும் மாட்டி; "உனக்கு இந்த வயதில் இன்பத் தேன் மழை கேட்குதோ!" என பிரம்பு முறியும் வரை அடி வாங்கிய ஞாபகங்களோடு, இந்தக் கவிதை வரிகளும் என் மனதில் பொதிந்திருக்கிறது. 

அரும்பத விளக்கம்/ பொருள் விளக்கம்:

வாங்கு: பெஞ்சு - Bench Or Table.

கதிர் பட்டுக் கண்: நெற் கதிர்கள் போன்று நீண்ட தூரம் சாயக் கூடிய கூர்மையான பார்வை கொண்ட, பட்டுப் போன்று வெண்மையான கண்.

மாக்கோதை: மாம்பழம் போன்ற குளிர்மையான கோதை அல்லது பெரிய அழகி.

கும்மிருட்டு: பயமூட்டும் வெளிச்சமற்ற கருமையான இரவு.

குழல்: கூந்தல் அல்லது தலை முடி.

அம்புலி: சந்திரன்.

சிருங்காரி: சிறிய பெண்.

விதானையார் / விதாணையார்: ஈழத்தில் கிராம சேவகரைக் குறிக்கப் பயன்படும் (Urban or Rural Officer) ஒல்லாந்த மொழிச் சொல்.

பெட்டை: பிகர்.

உங்கள் அபிமான நாற்று வலைப் பதிவில்...

இன்றைய தினம் செவ்வாய் கிழமை இலங்கை இந்திய நேரப் படி மாலை நான்கு மணியளவில் பெண்ணடிமைத் தனம், ஆணாதிக்கம், சம உரிமை, பெண்ணுரிமை பற்றிப் பேசுகின்ற விவாத மேடைப் பதிவு ஒன்று உங்களை நாடி வரவிருக்கின்றது!காத்திருங்கள்!சூடான விவாதங்களை எதிர்பார்த்திருங்கள்!

Share