பிரதேச வாதத்தை தூண்டுகிறதா யாழ்ப்பாணம் குறும்படம்!

மரணங்கள் மலிந்த பூமியில் மகிழ்ச்சிக்கான கதவுகள் போர் தின்ற வாழ்விற்குப் பின்னரும் திறக்கவில்லை என்றே கூறலாம். தமிழனின் எழுச்சியின் போது இருந்த ஒற்றுமை இறுதி வரை தமிழனின் இரத்தத்தோடு ஊறியிருந்தால் தமிழர் தம் வாழ்வானது எப்போதோ ஒரு காலத்தில் செழிப்படைந்திருக்கும். வளமான வாழ்விற்காக போராடிய தமிழர்களை அவர்களின் போராட்ட நோக்கத்திலிருந்து திசை திருப்ப வேண்டும் எனும் காரணத்திற்காக கட்டவிழ்த்து விடப்பட்ட நச்சுப் பாம்பு தான் இப் பிரதேசவாதமாகும்.

போட்டி, பொறாமை, எரிச்சல், வன்மங்கள், குரோதங்கள், காழ்ப்புணர்சி அடிப்படையில் தமிழர்கள் தம் உள் நோக்கத்தினைச் சிதைக்க வேண்டும் எனும் ஒரே ஒரு காரணத்திற்காக தமிழர் விரோத குணம் கொண்டோரால் மெது மெதுவாகத் தமிழரின் இரத்தத்தினுள் புகுத்தப்பட்ட இந்தப் பிரதேசவாதம் பற்றிய சரியான புரிந்துணர்வற்றோர் மீண்டும், மீண்டும் பிரதேசவாதத்தினைத் தூண்டும் கருத்துக்களை முன் வைப்பது வேதனையளிக்கிறது. ஈழப் போர் கூட பிரதேசவாதம் என்ற ஒன்றின் அடிப்படையில் அதன் உரிய பலனை அடைய முன்னரே உள் இருந்தோரால் சிதைக்கப்பட்டது.

தமிழன் ஒவ்வோர் முயற்சியினைத் தொடங்கும் போதும் இன்றைய கால கட்டத்தில் பிரதேசவாதம் எனும் சாயம் பூசி அம் முயற்சியினை ஒரு பிரதேசத்திற்குரிய செயலாக்கி இன்பம் காணுவோரின் செயற்பாடுகள் பலவற்றை நாம் கண்டு கடந்து வந்திருக்கிறோம்.போரினால் பல வருடங்களாகப் பாதிக்கப்பட்ட ஒரு பிரதேசத்திலிருந்து நீண்ட காலத்தின் பின்னர் போராட்டம் சாராத வகையில் ஒரு குறும்படத்தினைத் தமிழ்க் கலைஞர்கள் உருவாக்குகின்றார்கள் என்றால் அவர்களின் முயற்சியினைப் பாராட்ட வேண்டும்.

உண்மையான, நேர்மையான குணம் கொண்ட மனிதர்களாக நாமிருந்தால் அக் குறும்படம் வெளியாகுவதற்கு முன்னபதாகப் பிரதேசவாதம் எனும் சாயம் பூசி அக் குறும்படத்தினைப் புறக்கணிக்கச் சொல்லிப் பிரச்சாரம் நடத்துவதனை விடுத்து, இந்த முயற்சியில் ஈடுபடும் உள்ளங்களிற்கு எம் ஆதரவுக் கரத்தினை நீட்ட வேண்டும். விமர்சனங்கள் என்பதற்கும் அப்பால் ஒரு முயற்சியினைப் புறக்கணிக்கும் வகையில் இணையத் தளங்கள் வாயிலாகவும், சமூக வலைத் தளங்கள் வாயிலாகவும் கூச்சலிடுவதால் நமக்குப் பயனேதும் கிடைக்கப் போவதில்லை என்பது யதார்த்தம்.

நீண்ட காலத்தின் பின்னர் யாழ் மண்ணில் உள்ள கலைஞர்களின் சிறிய முயற்சியாக யாழ்ப்பாணம் எனும் பெயரில் ஒரு குறும்படம் தயாரிக் கொண்டிருக்கிறது. படப் பிடிப்பு வேலைகள் யாவும் முடிவுற்று, இப்போது எடிற்றிங் வேலைகள் இடம் பெற்றுக் கொண்டிருக்கின்றது. யாழ் மண்ணைச் சேர்ந்த கலைஞர்கள் மாத்திரமின்றி, வன்னி மண்ணைச் சேர்ந்தோரும் இக் குறும்படத்தில் தம் பங்களிப்புக்களை வழங்கியிருக்கின்றார்கள். Evergreens பசு நிறுவனத்தினர் இக் குறும் படத்தினைத் தயாரிக்கின்றார்கள்.

ஒரு ஊரின் அல்லது ஒரு பிரதேசத்தின் பெயரினை இக் குறும்படம் தாங்கி நிற்கிறதே என்பதனை அடிப்படையாக வைத்து பிரதேசவாதம் எனும் நஞ்சினை இப் படத்தின் மீதும் தூவிப் பிரச்சாரம் செய்வது எவ் வகையில் நியாயமாகும்? ஒரு ஊரின் பெயரை இப் படத்திற்கு வைத்திருப்பதால் நாம் இப் படம் பற்றிய சரியான புரிதலின்றி எப்படி இந்தப் படத்தையும் பிரதேசவாதம் எனும் பெயர் கொண்டு புறக்கணிக்க முடியும்? தமிழக சினிமாவில் திருப்பதி, திருப்பாச்சி, பழநி, சிவகாசி, எனப் பல படங்கள் பிரதேசங்களின் பெயரினைத் தாங்கி வந்திருக்கின்றனவே. தமிழக மக்கள் யாராவது இந்தப் படங்களைப் பிரதேசவாதம் எனும் பெயர் கொண்டு புறக்கணித்தார்களா?

தமிழகத்தில் வெளியான பிரதேசங்களின் பெயர்களினைத் தாங்கிய படங்களைத் தமிழக மக்கள் தமது வழமையான பார்வையிலிருந்தும் விலகி எப்போதாவது புறக்கணித்திருப்பார்களா?ஹாலிவூட் திரையுலகில் பல திரைப்படங்கள் அமெரிக்க மாநிலங்கள் மற்றும் அமெரிக்க ஊர்களின் பெயர்களினைத் தாங்கி வந்திருக்கின்றனவே. இந்தத் திரைப்படங்களை பிரித்தானியா, ஆஸ்திரேலியா, நியூசிலாந்து முதலிய நாடுகளில் வாழும் ஆங்கிலேயர்கள் பிரதேசவாதம் அல்லது இனத்துவேசம் எனும் பெயர் சூட்டி புறக்கணிக்கவில்லையே? ஏன்? அடடா இந்த மக்களுக்கெல்லாம் இல்லாத பேரறிவும், புரிந்துணர்வும் எம் ஈழத்தில் உள்ள நரிகளுக்கு இருப்பது தான் இன்று வரை தமிழர்கள் ஒவ்வோர் துறைகளிலும் தம் இன மானத்தை அடகு வைத்துப் பிழைப்பதற்கான காரணமாக இருக்கின்றது.

முற்று முழுதாக நகைச்சுவையினை மையமாக வைத்துப் பதிவர் கிருத்திகன் குகேந்திரன் அவர்களின் இயக்கத்தில் உருவாகும் இப் படத்தினைப் பற்றிய சரியான புரிதலற்றவர்கள் கிழக்கு மாகாணம் எனும் ஒரு மாயையினை மீண்டும் கையிலெடுத்து வட மாகாணத்திலிருந்து யாழ்ப்பாணம் எனும் பெயர் கொண்ட திரைப்படம் பிரதேசவாதத்தினைத் தூண்டும் வகையில் வெளி வரப் போகின்றது. இதற்கான காரணம் இப் படத்தின் பெயர் என்று பொய்ப் பிரச்சாரம் செய்வது இப் படத்திற்கு கிடைத்திருக்கும் முதல் வெற்றியாகும். கிழக்கில் உள்ள மக்களில் பலருக்கு இப் படம் பற்றிய செய்திகள் அதிகளவில் தெரிந்திருக்க வாய்ப்பில்லை. அப்படியிருக்க கிழக்கு மாகாணத்தில் வாழும் மக்களின் உணர்வுகளைப் பிரதிபலிக்கும் நோக்கில் ஒரு சில புத்திஜீவீகளால் தனிப்பட்ட ரீதியில் வெளியிடப்படும் தான் தோன்றித் தனமான கருத்துகள் தான் பிரதேசவாதத்தை தூண்டுகின்றது எனும் பாணியிலான கருத்துக்களாகும்.

தலை முறை தலை முறையாகத் தமிழர்களுக்குள் பிரிவினையினை உருவாக்கி ஒரு சந்ததியினை அழித்தது போதும்! இனியாவது ஒரு சந்ததி வேற்றுமைகள் நீங்கி ஒற்றுமையுடன் வாழட்டுமே! நாம் வாழும் காலத்தில் தான் பிரதேசவாதம் எனும் பெயர் சொல்லி எமக்குள் பிரிவினைகளை உண்டாக்கி சுய இன்பம் கண்டு தெளிகின்றோம். எம் வருங்காலச் சந்ததிகளாவது பிரிவினைகளற்றவர்களாக தமிழர்கள் என்ற உணர்வோடு வாழ்வதற்கு நீங்கள் இடங் கொடுக்கலாம் அல்லவா? இன்னும் ஒரு சில நாட்களில் உங்களை நாடி வரைப் போகும் யாழ்ப்பாணம் குறும்படம் கொஞ்சம் வித்தியாசமான திரைப்படம் என நீங்கள் நினைத்தால் அதற்கான பதிலை இப் படம் பற்றிய ஸ்டில்கள் உங்களுக்கு வழங்கி நிற்கின்றது.

பதிவர்களின் புதிய முயற்சியாக வெளிவரவிருக்கின்றது இக் குறும்படம். நீண்ட காலமாக யாழ்ப்பாணத்தில் படப் பிடிப்பிற்குத் தடை செய்யப்பட்டுள்ள பிரதேசங்களில் இக் குறும்படத்திற்கான படப்பிடிப்பினை வெற்றிகரமாக நடாத்தி முடித்திருக்கிறார்கள் யாழ்ப்பாணம் குறும்படக் குழுவினர். பதிவர் மதிசுதா அவர்கள் இக் குறும்படத்தில் பிரதான கதா பாத்திரமாக நடித்திருக்கின்றார். மதிசுதா அவர்களுடன், பிரசன்னா, வாகீசன், பிரசாத், ஜெயகோபி, சஞ்சீவன், முகுந்தன், விந்தகன், வேணுதனுசன், நந்தஸ்ரீ, ஆகிய கலைஞர்களும் பதிவர்களும் இக் குறும்படத்தில் இணைந்து நடித்துள்ளார்கள்.  ஆக்கபூர்வமான விமர்சனங்கள் எப்போதும் வரவேற்கத்தக்கவை தான் ஆனால் படம் வெளியாகுவதற்கு முன்பே ஒரு புதிய முயற்சியினைச் சாயம் பூசி மறைக்க நினைப்போரின் செயல்கள் கண்டிக்கத்தகைவையே!

குறும்படம் பற்றி பிரதேசவாதம் எனும் ஒரு புதுக் கருத்துத் திணிப்பை புகுத்திய முதல் நபர்!

ஈழத்துச் சினிமா எனும் சொல்லுக்கான தேடலிற்கு இன்றைய கால கட்டத்தில் உள்ள எம் படைப்புக்கள் வாயிலாக விடை காண முடியாது நிற்கின்றோம். காரணம் இன்றைய கால கட்டத்தில் ஈழத்துச் சினிமாவில் முழு நீளத் திரைப்படங்கள் அதிகளவில் வெளியாகுவதில்லை. அத்தோடு ஈழத்தில் நிலவும் வளப் பற்றாக் குறை என்ற ஒன்றினைக் காரணங் காட்டி யாருமே படம் எடுக்க விரும்புவதுமில்லை. குறும்படங்கள் மாத்திரமே அத்தி பூத்தாற் போல எப்போதாவது ஒரு நாள் வந்து கொள்கின்றது. ஆகவே நீண்ட காலத்தின் பின்னர் யாழ் குடாநாட்டிலிருந்து ஒரு சிறு முயற்சியாக வெளிவரவிருக்கும் இக் குறும்படக் குழுவினரை வாழ்த்தி, வரவேற்பது நம் கடமையல்லவா?

யாழ்ப்பாணம் குறும்படத்தின் ட்ரெயிலரினைக் கண்டு களிக்க இங்கே கிளிக் பண்ணுங்கள்:

யாழ்ப்பாணம் குறும்படக் குழுவினருக்கு பேஸ்புக்கில் உங்கள் ஆதரவினை வழங்க இங்கே கிளிக் செய்யுங்கள்:

Share