அரசியல்வாதிகள் அடக்கி வாசிக்கனுமா அல்லது அழுத்திப் பேசனுமா?

அரசியல் என்பது மக்களுக்கான ஜனநாயகம் பேணும் பாதையென்று விளிக்கப்பட்டாலும், எம் இலங்கை- இந்திய நாடுகளில் நாட்டினது வளர்ச்சி- மக்களின் முன்னேற்றம் முதலிய செயற்பாடுகளைப் பற்றிய தூர நோக்குப் பார்வையற்ற அரசியல்வாதிகளால் இவ் அரசியலானது மாசுபடுத்தப்பட்டு வருகின்றது. மக்களுக்கான குரலையும், மக்களின் உரிமையினையும் உரத்துச் சொல்ல வேண்டிய கடப்பாடு ஒரு அரசியல்வாதிக்கு அல்லது மக்களால் தெரிவு செய்யப்பட்ட பிரதிநிதிக்கு இருக்க வேண்டும். ஆனால் எம் நாடுகளிலோ ஓட்டு வாங்கி, சட்ட சபை சென்ற பின்னர் தம் சுய ரூபத்தைக் காட்டி மக்களை மறக்கின்ற போலி அரசியல்வாதிகள் தான் அடக்கியும் வாசிக்கின்றார்கள். சந்தர்ப்பத்திற்கேற்றாற் போல அழுத்தியும் வாசிக்கின்றார்கள்.

இன்றைய பதிவினூடாக நாம் தமிழோடு கொஞ்சம் விளையாடிப் பார்ப்போமா? அடக்கி வாசித்தல்- அழுத்தி வாசித்தல் பற்றிய மொழிக் குறிப்புக்களை அலசுவது தான் இப் பதிவின் நோக்கம். ஒருவன் உரத்துக் கத்துகின்ற போது, அல்லது சத்தமாகப் பேசுகின்ற போது அவனது குரலைக் கொஞ்சம் தாழ்த்தி- சத்தமின்றி மென்மையாகப் பேசும் படி முதலில் டீசெண்டாக கேட்டுப் பார்ப்போம். நாகரிகமான இவ் வார்த்தைக்குச் செவிசாய்க்கா விட்டால் "ஏலேய் கொஞ்சம் அடக்கி வாசிக்கிறியா?" என்று சவுண்டு விட்டு மிரட்டுவோம். அடக்கி வாசித்தல் என்பது கொஞ்சம் மென்மையாக உரையாட முடியுமா? , சத்தமாகப் பேசாதிருக்க முடியுமா? கொஞ்சம் பொறுமையாக இருக்க முடியுமா எனும் சொற் பதங்களைத் தரும். 

ஒரு நபர் பொதுச் சபையிலோ அல்லது வெளியிடங்களிலோ அதிகப் பிரசங்கித் தனமாகப் பேசுகின்ற போது, அவருக்கு அருகே இருப்பவர்கள் அடக்கி வாசிக்கச் சொல்லிக் கேட்பார்கள். இதற்கும் அவர் மசிந்து (வளைந்து) கொடுக்கா விட்டால், "கொஞ்சம் பொத்திக்கிட்டு இருக்கிறியா" என்று பேசுவார்கள். அல்லது "மூடிக் கிட்டு இருக்கிறியா" என்றும் ஏசுவார்கள். இங்கே எதைப் பொத்தி, எதனை மூடி என்று நீங்கள் கேள்வியெழுப்பும் போது வாய் எனும் சொல் தொக்கி நிற்பதனை அல்லது மறைந்திருப்பதனை நீங்கள் உணருவீர்கள்.  ஒருவர் தன்னைப் பற்றித் தம்பட்டம் அடிக்கும் போது, ஓவராப் புகழும் போதும், "கொஞ்சம் பொத்திக்கிட்டுப் போறியா?" என்று ஏசி அவரின் வாயினை மூடப் பண்ணுவார்கள்.

அடக்கி வாசித்தல் என்பது நாதஸ்வரம், மற்றும் ஏனைய இசைக் கருவிகளை வாசிக்கும் நபரினைப் பார்த்தும் கொஞ்சம் அடக்கி வாசிக்க முடியுமா எனும் கேள்வியினை எழுப்புவதற்கும் பயன்பட்டுக் கொள்ளும். ஊடக சுதந்திரமானது கட்டுப்படுத்தப்படும் போது அல்லது செய்தித் தணிக்கை மேற்கொள்ளப்படும் போது அடக்கி வாசித்தல் சிறந்தது என்று எம் நாட்டில் சொல்லிக் கொள்வார்கள். அடக்கிவாசித்தல் எனும் சொற்பதமானது

நாகரிகமான முறையில் சொல்லுகின்ற போது- கொஞ்சம் சத்தம் போடமா இருக்க முடியுமா? என்ற வினாச் சொல்லாக வந்து கொள்ளும்.

இந்த அடக்கி வாசித்தல் எனும் சொற்பதத்தினை இலங்கையில் இரு நபர்கள் சண்டை போடும் போது, "கொஞ்சம் பொத்துறியா" என்று சொல்லிக் கொள்வர்கள். இதே சொல்லானது தமிழகத்தில் "மூடிக்கிட்டு இருக்கிறியா, கொஞ்சம் பொத்திக்கிட்டு இருக்கிறியா? " என்ற அர்த்தங்களோடு பயன்படுத்தப்படும். அத்தோடு "கொஞ்சம் அடங்குங்கடா" என்று அர்த்தம் வரும் வண்ணமும் யூஸ் பண்ணிக் கொள்வார்கள். 

அடக்கி வாசித்தல் பற்றி நான் அதிகம் அழுத்தி வாசிப்பது அழகல்ல என்பதால் இத்தோடு நிறைவு செய்கின்றேன். இந்த அடக்கி வாசித்தல் பற்றி உங்களுக்கு வேறேனும் சொற் பதங்கள்- மொழி வழக்குகள் தெரிந்தால் பின்னூட்டம் வாயிலாகப் பகிர்ந்து கொள்ளலாமே! 

***********************************************************************************************************************

பொறுமைக்கு நிகராக இந்த உலகில் பெண்களை ஒப்பிடுவதில் நியாயம் இருப்பதனை நாம் அறியாதவர்கள் அல்ல. மிக நுணுக்கமான கைவினைப் பொருட்கள், அலங்கார வேலைப்பாடுகள்- டிசைனிங் வகையறாக்களைப் பொறுமையாகச் செய்வதில் வல்லவர்கள் பெண்கள் தான். 

வலைப் பதிவிலும் அலங்கார- டெக்கரேசன் குறிப்புக்களையும், கைவினைப் பொருட்கள்- மீள் சுழற்சிப் பொருட்களைச் செய்வதற்கான தகவல்கள்- சிறுகதைகள், அனுபவக் குறிப்புக்கள் முதலிய விடயங்களோடு, இடைக்கிடையே சமையற் குறிப்புக்களையும் பகிர்ந்து வரும் சகோதரி "வானதியின்" வலைப் பதிவினைத் தாம் நாம் இன்று பார்க்கப் போகின்றோம்.

"வானதியின் Vanathy's" வலைப் பக்கத்திற்குச் செல்ல:

http://vanathys.blogspot.com/

***********************************************************************************************************************

இன்ட்லியில் ஓட்டளிக்க:

Share