பதிவுலகால் புறக்கணிக்கப்பட்ட பதிவரின் உள்ளக் குமுறல்!

அனைத்துப் பதிவர்களும் படிக்க வேண்டிய பதிவு!

பதிவுலகில் வலியது வெல்லும், மென்மையானது அழிந்து விடும் எனும் கொள்கை தான் எழுதப்படாத விதியாக, நிழல் அரசியல் போன்று நிலவுகின்றது. இது அனைவருக்கும் பொதுவாகத் தெரிந்த ஓர் விடயம். விளங்கக் கூறின் ஓட்டுக்கள் அதிகம் பெற்று, ஒரு பதிவரின் பதிவுகள் பிரபலமாகின்ற போது, அப் பதிவரைப் பற்றியும், அவரது எழுத்துக்கள் பற்றியும் அனைவரும் அறிந்து கொள்ளக் கூடிய சந்தர்ப்பம் ஏற்படுகின்றது. ஓட்டரசியலின் மூலம், ’நீ எனக்கு குத்து, நான் அப்புறமா வந்து உனக்கு ஓட்டுப் போடுகிறேன் எனும் விதி தான் எழுதப்படாத, பிறருடன் பேசப்படாத மௌனமான விதியாக இருக்கின்றது.

தொடர்ச்சியாகப் பல பதிவர்களது பதிவுகளினைப் படித்துப் பின்னூட்டமிட்டு, ஓட்டுப் போடும் நானே ஒரு சில நாட்கள் பதிவுலகப் பக்கம் வரவில்லை என்றால், மொய்க்கு மொய் என்னும் கொள்கை சில பதிவர்கள் மூலமாக நிறைவேறாத நிலையில் ஏமாந்திருக்கிறேன் என்றால்; ஏனைய பதிவர்களின் நிலமையினைச் சொல்லியா நீங்கள் அனைவரும் தெரிந்து கொள்ள வேண்டும். பல அருமையான, காத்திரமான படைப்புக்களை எழுதவல்ல பதிவர்கள் ஓட்டுக்கள் கிடைக்காது, இன்று வரை வெளித் தெரியா திறமைசாலிகளாக பதிவுலகினுள் இருக்கின்றார்கள்.

இத்தகைய வெளித் தெரியாத திறமைசாலிகள் வரிசையில் வந்த ஒரு பதிவர் தான் இணையம் தாஹீர். இவர் ஆரம்ப காலத்தில் பல சுவாரஸ்யமான படைப்புக்களை கவிதை, கட்டுரை வடிவில் எழுதித் திரட்டிகளில் இணைத்திருக்கிறார்.  தொடர்ச்சியாகப் பல பதிவுகள் எழுதித் திரட்டிகளில் இணைத்து, பதிவர்களின் பதிவுகளுக்கும் பின்னூட்டமிட்டு வந்திருக்கின்றார். ஆனால் காலவோட்டத்தில் அவரின் பதிவுகள் பிரபலமடையாது ப்ளாக்கினுள் முடங்கிக் கிடந்தன. இதனால் உளவியல் ரீதியில் பாதிக்கப்பட்ட தாஹீர் , பதிவுலகில் பதிவர்கள் ஒரு குழுவாகவே செயற்படுகின்றார் எனும் முடிவிற்கு வந்தார்.

இதன் பின்னர் பதிவர்கள் எழுதுகின்ற காத்திரமான பதிவுகள் தொடக்கம், காமெடியான பதிவுகள் வரை அனைத்தையும் தனது தளத்தில் காப்பி பேஸ்ட் பண்ணத் தொடங்கினார். பதிவுலகில் பல பதிவர்கள் பதிவெழுதி பதினைந்து நிமிடமாவதற்கு முன்பதாகவே, பதிவுகளைக் காப்பி பேஸ்ட் பண்ணித் தன் வலையில் புதிய அதிரடித் தலைப்புக்களோடு பிரசுரித்து, ஹிட்ஸ் ஏற்றித் தன் வலைக்கான வருகையாளார்களின் எண்ணிக்கையினை அதிகரித்துச் சந்தோசம் கண்டு கொண்டிருந்தார் தாஹீர்.

தாஹீர் பல பதிவர்களின் பதிவினைக் காப்பி பேஸ்ட் செய்வதனை அறிந்த பதிவர்கள் திரட்டிகளிடம் முறையிட்டு, தாஹீரினைத் திரட்டிகளை விட்டு நீக்கும் படி புகார் கொடுத்தார்கள். தாஹீர் திரட்டிகளை விட்டு நீக்கப்பட்ட பின்னரும் தன் காப்பி பேஸ்ட் செயலில் ஓய்வின்றித் தொடர்ந்தும் முனைப்புடன் செயற்பட்டார். இறுதியில் என் பதிவுகளும் தாஹீரின் தளத்தில் காப்பி பேஸ்ட் பதிவுகளாக வெளிவருவதனை அறிந்து அவரினைப் பற்றி, என் வலையில் ’பதிவர்களே! திரட்டிகளே! நீங்கள் இனியும் மௌனமாக இருக்கலாமா?’ எனும் பதிவினூடாக பதிவுலகில் உள்ள அனைவரும் விழித்துக் கொள்ளும் வண்ணம் எழுதியிருந்தேன்.

அதன் விளைவு, என் வலையினைப் போன்று நாத்து எனும் பெயரில் ஒரு போலி வலையினை உருவாக்கி, என் பதிவுகள் வெளியாகிச் சில நிமிடங்களில் அந்த வலையில் எனது பதிவுகளைக் காப்பி பேஸ்ட் செய்து திரட்டிகளில் இணைத்து வந்தார் தாஹீர். இச் செயலால் கடுப்பாகிய நான் தாஹீருடன் பேசிப் பார்த்தேன். அவர் போலி வலையினை நீக்க மாட்டேன் என்பதில் உறுதியாக இருந்தார். பின்னர் சகோதரன் மதிசுதாவின் உதவியோடு தாஹீரிடம் பேச்சுவார்த்தை நடாத்தி, இறுதியில் போலி வலையினை டீலீற் செய்வதற்கு இணங்கினார் தாஹீர்.

தாஹீரோடு பேசும் போது, தான் காப்பி பேஸ்ட் செய்வது, பதிவுலகம் தன்னைப் புறக்கணித்த காரணத்தினால் என்றும்,  பதிவர்கள் குழுவாக ஓட்டுப் போட்டுத் தம் பதிவுகளைப் பிரபல்யப்படுத்துகிறார்கள் என்றும் ஆதங்கப்பட்டார். பல சிரமங்களின் மத்தியில் மதிசுதாவின் ஆலோசனைக்கமைவாக தாஹீர் தனது காப்பி பேஸ்ட் முயற்சியினைக் கைவிட்டு, சுய பதிவுகளைத் தன் வலையில் பகிர்வதற்கு உடன்பட்டார். தற்போது காப்பி பேஸ்ட் இன்றி சுய பதிவுகளைத் தான் தன் வலையில் பகிர்ந்து வருகிறார் தாஹீர். இது மனதிற்கு மகிழ்ச்சி தரும் ஓர் விடயமாகும்.

தாஹீரின் புதிய வலையுலக மீள் பிரவேசத்திற்கு என் வாழ்த்துக்களை உங்கள் அனைவரோடும் சேர்ந்து தெரிவித்துக் கொள்கிறேன்.


இங்கே தாஹீர் பற்றி நான் பகிர்ந்து கொண்டமைக்கான காரணம்,
பல பதிவர்கள் தமக்கு ஓட்டுக்கள், கமெண்டுகள் போடும் பதிவர்களிற்கு மாத்திரம் மொய்க்கு- மொய் எனும் பாணியில் தமது செயற்பாடுகளைப் பகிர்ந்து விட்டு நின்று விடுகிறார்கள். இதனால் பல பதிவர்கள் பதிவுலக வெள்ளோட்டத்தில் காணாமற் போய்விடுகின்றார்கள். தாஹீரின் சம்வத்தினை அடிப்படையாகக் கொண்டு எம்மால் முடிந்த வரை, ஏனைய பதிவர்களின் பதிவுகளைப் படிக்கும் போது, கமெண்டு போட முடியாவிட்டாலும், கமெண்ட் போட நேரம் இல்லா விட்டாலும் ஓட்டுக்கள் போட்டு, அவர்களை ஊக்கப்படுத்தலாம் அல்லவா. தாஹீரினைப் போல் வலையுலகில் வெளித் தெரியாது பாதிக்கப்பட்ட பதிவர்கள் பலர் இருப்பார்கள். இவர்களுக்கு நாம் அனைவரும் செய்யப் போவது என்ன?

பிற் சேர்க்கை: பதிவுலகால் புறக்கணிக்கப்பட்ட தாஹீர் பற்றிய உண்மைச் சம்பவத்தினை, மேற்படி சம்பவத்தோடு தொடர்புடைய தாஹீரின் பரிபூரண சம்மதத்தோடு,  பதிவர்கள் அனைவருக்கும், ஓர் அனுபவப் பதிவாக இப் பதிவு அமைய வேண்டும் எனும் நோக்கில் இங்கே பகிர்ந்திருக்கிறேன்.


புலி எதிர்ப்பாளர், ஆபாசப் பதிவர் நிரூபனைப் புறக்கணிப்போம்!


வலையுலகில் எப்பொழுதும் திறந்திருக்கும் எனது பின்னூட்டப் பெட்டியினுடாக கருத்துக்களைச் சொல்லத் திராணியற்றவர்கள், ஈழப் போராட்டம் பற்றிய புரிதலற்றவர்களால் பல பதிவர்களுக்கு அனுப்படும் மின்னஞ்சல் தான் புலி எதிர்பாளர் நிரூபனைப் புறக்கணிப்போம். நிரூபனின் பதிவுகளுக்கு ஓட்டுப் போடுவதை நிறுத்துவோம் எனும் மின்னஞ்சலாகும். நான் வலையுலகில் காலடி எடுத்து வைத்த நாட் தொடக்கம், நேரடியாகவும், மறைமுகமாகவும், மைனஸ் ஓட்டு வடிவிலும் என் பதிவுகளுக்கும், என் மீதும், என் வலை மீதும் சேறு பூசும் முயற்சியில் ஈடுப்பட்ட ஒரு கும்பலுக்கு, தற்போது கிடைத்திருக்கும் அவல் தான் ‘ஈழ மக்களை நம்ப வைத்து ஏமாற்றிய புலித் தலைவர் பிரபாகரன்’’ எனும் பதிவாகும்.

இதனைச் சான்றாக வைத்து புலி எதிர்பாளர் நிரூபனைப் புறக்கணியுங்கள் எனும் தொனியில் ஒரு சிலர் காற்றுள்ள போதே தூற்றிக் கொள்ளும் முயற்சியில் ஈடுபடுகின்றார்கள். அதிமுக ஜெயலலிதா; ஈழ மக்கள் மீது அனுதாபங் காட்டும் போது, அது சந்தர்ப்பவாத அரசியல் என்பதனை உணராது, அவரைப் பின் தொடர்ந்து தாமும் ஈழ மக்கள் மீது ஆர்வம் உள்ளவர்கள் எனத் தம்மை வெளிப்படுத்தும் சந்தர்ப்பவாத ஈழ நலன் விரும்பிகள்;
ஈழம் பற்றிய பல்வேறு பதிவுகள், போரினால் பாதிக்கப்பட்ட மக்களுக்கு உதவி வேண்டிய பல பதிவுகள் வெளியான வேளையில் மாத்திரம் மௌனமாக இருந்து விட்டு, தற்போது பஞ்சாயத்துக் கூட்டிக் கையிலெடுத்திருக்கும் ஓர் விடயம் தான் இந்தப் புறக்கணிப்பு, ஓட்டுப் போடுவதை நிறுத்தும் நாடகம்.

இன்று வரை இண்ட்லியில் 986 பேரைப் பாலோ செய்து வந்தேன். ஒவ்வோர் பதிவுகளை இணைத்த பின்னரும், பல பதிவர்களுக்கு ஓட்டுக்களை பாரபட்சமின்றி வழங்கி வந்துள்ளேன். ஆனால் தற்சமயம், எனக்கு இண்ட்லி மூலம் கிடைக்கும் ஓட்டுக்களின் எண்ணிக்கை குறைவடைந்துள்ளமையினைத் தொடர்ந்து நான் இண்ட்லியில் பாலோ செய்யும் அன்பு உள்ளங்களின் எண்ணிக்கையினைக் குறைக்கலாம் என தீர்மானித்துள்ளேன்.

திரட்டிகளில் தமது பதிவுகளை இணைத்துள்ள பதிவர்களுக்கும், திரட்டிகளில் தம் பதிவுகளை இணைக்காத பதிவர்களுக்கும் தொடர்ச்சியாக என்னால் முடிந்த வரையில் கருத்துக்களைக் காத்திரமான முறையில் வழங்கி வருகிறேன். ஆனாலும் புறக்கணிக்க நினைக்கும் அன்பவர்கள் என் வாதத்திற்கு எதிர்க் கருத்துக்களை முன் வைத்து விட்டுப் புறக்கணித்தால் இன்னும் சிறப்பாக இருக்கும் என நினைக்கின்றேன்.

பாட்டு ரசிகனுக்கு ஓர் வெற்றிக் கேடயம்!


என் வலையில் ஜூன் மாதம் இடம் பெற்ற பதிவர்கள் பரபரப்புடன் மோதும் காமெடி ஜிம்மி!  போட்டியில் பங்கு பற்றி, இறுதி வரை, முதல் எழுத்துக்களை அடிப்படையாக வைத்துப் பல பாடல்களைக் கண்டு பிடித்து, சளைக்காது கும்மியடித்தாடிய பாட்டு ரசிகன் வலைப் பதிவின் சொந்தக்காரர் பாட்டு ரசிகன் அவர்களுக்கு, இன்றைய பதிவில் வெற்றிக் கேடயத்தினை வழங்குவதோடு, வாழ்த்துக்களைத் தெரிவித்துக் கொள்வதிலும் நாற்று வலைப் பதிவு வாசகர்கள் சார்பில் மகிழ்ச்சியடைகின்றேன். 


பாட்டு ரசிகனின் வலைப் பூவிற்குச் செல்ல: http://tamilpaatu.blogspot.com

இவ் வெற்றிக் கேடயத்தினைத் தன் கை வண்ணத்தின் மூலம் வடிவமைத்திருந்தார் நிகழ்வுகள் வலைப் பதிவுச் சொந்தக்காரர் சகோதரன் கந்தசாமி அவர்கள். அவருக்கும் இவ் வேளையில் என் மனமார்ந்த நன்றிகளைத் தெரிவித்துக் கொள்கின்றேன்.

Share