இம் முறைத் தேர்தலில் எல்லாமே இலவசம்!

இது தேர்தல் காலம், மக்கள் மனங்களையெல்லாம் இலவசங்களை அள்ளிக் கொடுத்து வாங்கும் திருவிழாக் காலம். எங்கள் தாய் தமிழக உறவுகளின் தேர்தல் கொண்டாட்டங்கள் பற்றி எங்கள் ஊரில் இடம் பெறும் ஒரு அரசியல் கருத்தாடலை உங்களுடன் இன்று பகிர்ந்து கொள்ளப் போகிறேன். எல்லோரும் படிக்க றெடி தானே!

இன்று முதல் என் வலைப் பதிவினூடாக, இவ்வாறான அரசியல், சமூகம் சார் அரட்டைகள் இடம் பெறும் பகுதியாக ‘ஆலமரத்தடி’ எனும் பெயரில் ஒரு பகுதியினை உங்களின் பேராதரவுடன் தொடங்கலாம் என்று தீர்மானித்துள்ளேன்.


ஆலமரத்தடி, தேர் முட்டியடி, தேரடி, தவறணையடி(நம்மாளுங்க கள்ளுக் குடிக்கிற இடம்), தேநீர்க் கடையடி(கன்ரீன்), பஸ் நிலையம், சப்பாட்டுக் கடை,  பொண்டுகளின்ரை அடுப்படி இவையெல்லாம் எங்கள் ஊரிலை அரட்டைகளுக்கும், காரணங்களேதுமற்ற வம்புச் சண்டைகளுக்கும் ரொம்பப் பேமஸ்ஸான இடங்களாகும்.

‘டோய் மவனே, சும்மா ட்ரெயிலர் காட்டுறதை விட்டிட்டு, மெயின் பிக்சருக்கை போடா என்று யாரோ பேசுறீங்க. சித்தப்பு எடுடா அந்த அரிவாளை(அட இது எங்கையோ கேட்ட குரலா இருக்கே, ஓ நம்ம நாஞ்சில் மனோ வாய்ஸ்) இப்பிடியெல்லாம் பேசின படி, என்னைத் தேடி ஆட்டோ வர முன்பே நான் நேரடியாக விசயத்திற்கு வாறேனுங்க.

இனி அரட்டையினுள் போவோமா..

வழக்கம் போல ஆலமரத்தடி இன்றும் கூடுகிறது. இளைய பிள்ளையாச்சி, மணியண்ணை, குணத்தான்,  முதலிய வயதான விஞ்ஞானிகளோடும், நிரூபனாகிய இளைய விஞ்ஞானியுடனும் அரட்டை களை கட்டத் தொடங்குகிறது. (ஊரிலை வேலை வெட்டி இல்லாமல் உள்ளூர் விடயங்கள் மூலம், உலக விடயங்களை அளக்கிற நாங்களெலோரும் விஞ்ஞானிகள் தானே, இப்பிடியாவது மனசைத் தேற்றிக்க விடுங்கப்பா)

ஆலமரத்தடியில் இருந்து கச்சானைத் தன்னுடைய பொக்கை வாயிற்குள் போட்ட படி இளைய பிள்ளையாச்சி தனது உரையாடலைத் தொடங்கினா.
’கேட்டியளோ சங்கதி, உந்தச் சீமான் பொடியன் ஏதோ வெட்டுறன், புடுங்குறன், வைகோவை வைச்சு அம்மாவுக்கு ஆதரவு கொடுத்து, தமிழக அரசியலிலை காங்கிரஸ்ஸை ஓரம் கட்டுறன் என்று கூத்தடிச்சுப் போட்டு இப்ப காத்துப் போன பலூன் மாதிரியெல்லே உடைஞ்சு போயிட்டார்,

’’மணியண்ணை தொடர்ந்தார், இளைய பிள்ளை, உவங்களுக்கு தங்கடை பெயர் பேப்பரிலை வர வேண்டும் என்று பேராசை போல, ஊரிலை உள்ள ரேடியோ, டீவிக்களிலை தங்களைப் பற்றிச் செய்தி வர வேண்டும் என்ற ஒரே நோக்கத்திலை ‘முந்திரிக் கொட்டை மாதிரி முந்திக் கொண்டு அனல் பறக்கப் பேசுறது’

காங்கிரஸ் யாரோடை கூட்டணியை வைத்திருந்தாலும் இந்த முறை வெல்ல விடமாட்டோம் என்று வீராப்புக் காட்டுறது, பிறகு வைகோ அம்மாவை விட்டு வெளியேறினதும் கொழுத்தின வெடியளெல்லாம் புஸ் வானமாகின மாதிரி வாயை மூடிக் கொண்டு ஓடுறது. இது தானே வழமையாக நடக்கிறது.

உந்த நகைச்சுவை வசனங்களைத் தானே நாங்கள் காலங் காலமாக கேட்டுக் கொண்டிருக்கிறம். அயல் நாட்டிலை இருக்கிற எங்களுக்கே இதனைக் கேட்கச் சிரிப்பா இருக்கென்றால் தங்கடை நாட்டிலை இருந்து காமெடி டைம், சிரிப்பு தர்பார், நகைச்சுவை நேரம் பாக்கிற சனங்களுக்கு டீவியைப் போடாமலே படங்காட்டுறாங்களெல்லோ நம்மாளுங்க;  என்று குணத்தான் பேசி முடித்தார்.

கையிலை இருந்த அப்பிள் ஐ போனை நோண்டிக் கொண்டிருந்த என்னைப் பார்த்து மணியண்ணை கேட்டார்.

அடோய் பொடியா, என்ன செய்கிறாய், ஏன் உந்தப் போனை வைச்சு நோண்டிக் கொண்டிருக்கிறாய்?
பதிலுக்கு நான்,
‘’நான் அண்ணை, புளொக்கிலை தமிழகத் தேர்தலைப் பற்றிப் படிக்கிறன்.

’என்னவாம் சொல்லுறாங்கள் தேர்தலைப் பற்றி எங்கடை உறவுக்காரங்கள் என்றார் குணத்தான்,

’’இந்த முறை வைகோ அம்மாவின்ரை கூட்டணியிலிருந்து பிரிஞ்சதாலை அம்மாவை விட ஐயாவுக்கு வெற்றி வாய்புக்கள் அதிகமாம் என்று எழுதியிருக்கிறார்கள் நம்மாளுங்க; என்று சொன்னேன்.

இடையிலை குறுக்கிட்ட இளைய பிள்ளையாச்சி, கலைஞரின்ரை பல தசாப்த கால அரசியல் வாழ்வை யாராலையும் வெல்ல முடியுமோ? அவரின்ரை அரசியல் சாணக்கியத்தையும், காய் நகர்த்தல்களையும் பார்த்தீங்களென்றால் புரியும் தானே! மனுசன் இன்றைக்கு முப்பது வருசத்திற்கும் மேலாலை தந்திராமா எல்லே காய் நகர்த்தி வருகுது. அதோடை எதிர்ப்பார்ப்புக்களைக் கூட்டுறதிலையும், சஸ்பென்ஸ் வைச்சு திரில் பட றேஞ்சிலை அரசியலை நகர்த்துறதிலையும் கலைஞர் கை தேர்ந்த ஆள் தான் என்று பேசி முடித்தா.

’’எணோய் ஆச்சி! கலைஞர் கை தேர்ந்த ஆளோ, அது தான் தெரியுமே, பெரிய வீராவேசத்தோடை டில்லிக்குப் போய் பதவியை ராஜினமா செய்யிற மாதிரிப் பிலிம் காட்டிப் போட்டு,  சோனியா அன்ரியின்ரை காலிலை விழ வைச்சிட்டாரே ஒட்டு மொத்த தமிழ்க் குலத்தையும்.
இதுவே அவரின்ரை அரசியல் சாணக்கியம் என்று அனல் பறக்க சீமான் போல கூறி விட்டு, வியர்வையைத் துடைத்தான், குணத்தான்.

’’மணியண்ணை: என்ன தான் இருந்தாலும் நீங்கள் கலைஞரைக் குறை சொல்லக் கூடாது. அந்தாள் இப்ப இலவச டீவி, கலண்டர், இலவச லப்டோப், இலவச கிறைண்டர் வழங்குகிற மாதிரி,

தான் இந்த முறைத் தேர்தலிலை வெல்ல முடியாமற் போய், அம்மா வெல்லப் போறா என்று ஒரு நிலமை வந்தால், ஐய்யா ஊகிச்சு அறிஞ்சாரெண்டால் தமிழீழத்தையும் எல்லே இலவசமாக கொடுத்திடுவார். அந்தளவு அரசியல் சாணக்கியம் உள்ள ஆள் என்று மணியண்ணை கலைஞரை விட்டுக் கொடுக்காதவர் போலப் பேசி முடித்தார்.

சரி...சரி பொழுது படப் போகுது(இருளப் போகுது) எல்லோரும் வீட்டை போவோம், கிளம்புங்கோ என்று சொன்னபடி இளைய பிள்ளையாச்சி என்னைப் பார்த்தா.

’’அடோய் தம்பி நிரூபன் நீ என்னடா செய்கிறாய்? - இது இளைய பிள்ளையாச்சி.

‘’ஆச்சி நான் யூடியூப்பிலை பாட்டுப் பார்க்கிறேன். பாட்டுப் பாக்கிறியோ, பாட்டு!

‘’என்ன பாட்டடா தம்பி, அதை நாங்களும் கேட்கிற மாதிரிச் சத்தமாப் போடேன் என்றா ஆச்சி..

நானும் பாட்டைப் போட்டேன்.

சொர்க்கம் படத்திலை இருந்து, டி.எம். எஸ் பாடின பாடலான
’சொல்லாதே யாரும் கேட்டால் எல்லோரும் தாங்க மாட்டார் .......... என்ற படி பாடல் ஒளிபரப்பாகத் தொடங்கியது.

காலத்திற்கேற்ற மாதிரிக் கறெக்ராப் (correct) பாட்டுப் போடுறாய் பொடியா என்று ஆச்சி சொன்னா. நானும் பாடலைப் பார்த்த படி நடையைக் கட்டத் தொடங்கினேன்.

பிற் குறிப்பு: இப் பதிவில் உள்ள படங்கள் யாவும் தமிழர் குரல் வலைப் பதிவிலிருந்து கூகிளின் தேடல் உதவியுடன் எடுக்கப்பட்டவை.

Share