பதிவர்களின் ஹிட் வெறியால் புறக்கணிக்கப்படும் பெண் பதிவர்கள்!

வலையுலக வங்குரோத்து அரசியலும், வன்மங்களும் - விவாதிப்போம் வாருங்கள்!

எல்லோருக்கும் வணக்கமுங்கோ, எல்லோரும் நல்லா இருக்கீங்களா? 

தமிழ்ப் பதிவுலகம் ஆரோக்கியமான வழியில் செல்லுகின்றதா என்று எம்மை நாமே கேள்வி கேட்டு சுய பரிசோதனை செய்து கொள்வோம். கூகிள்காரன் ப்ரீயா வுடுறான் தானே! நாம என்ன வேண்ணாலும் எழுதுவோம் அப்படீன்னு எல்லோரும் கருத்துச் சொல்லிட்டு போகலாம். ஆனால் தோழமையுடன், உங்களில் ஒருவனாக என்னுடைய சில மன உணர்வுகளை, என் கேள்விகளை உங்களோடு பகிர்ந்து கொள்ள வந்திருக்கிறேன். இப் பதிவில் தமிழ்ப் பதிவுலகை நாச வழியில் கொண்டு செல்லும் ஆபாசப் பதிவர் (அப்படித்தான் ஊரெல்லாம் பேசிக்கிறாங்க) அடியேனும் உள்ளடக்கம் என்பதால், உங்கள் தெளிவான கருத்துக்களைச் சொல்லுமாறு தாழ்மையாக கேட்கின்றேன். 

இணையத்தில் எம் தமிழ்ப் பதிவுலகில் ஆண் பதிவர்கள் சக பதிவர்களால் அடையாளம் கண்டு கொள்ளப்பட்ட அளவிற்கு பல பெண் பதிவர்கள் அடையாளம் காணப்படவில்லை.வெளித் தெரியாத மின்னல்களாகவும், புயல்களாகவும், சமூகத்தினைச் சீர் செய்யும் நல் வழிக் கருத்துக்களை ஆண்களை விடத் திடமாகச் சொல்லக் கூடியவாறும் எழுதுகின்ற வல்லமை படைத்த பல தமிழ்ச் சகோதரிகள் இணையத்தில் எழுதி வருகின்றார்கள். நிரூபன் ஒரு நாளைக்கு ரெண்டு பதிவு எழுதி ஹிட்டுக்காக அலைந்தாலும், அந்த நிரூபனை விட மிகவும் காத்திரமாக தன் ஒத்தைப் பதிவினூடாக திடமான சேதி சொல்லக் கூடிய வகையில் எழுதுகின்ற பெண் சகோதரிகள் எம்மிடையே உள்ளார்கள்.ஆனால் நிரூபன் போன்ற பதிவர்களின் பதிவுகளுக்கு வரும் கூட்டம்,ஏனைய சகோதரிகளின் பதிவுகளுக்கு போவதில்லை!  

என்னுடைய ப்ளாக்கிற்கு ட்ரேங் என்ற ஒன்று இல்லை! விரும்பினால் தேடிப் பார்க்கலாம். ஆனால் பல பெண் சகோதரிகளின் ப்ளாக்கிற்கு ட்ரேங் இருந்தும் வாராந்த தமிழ்மண தரப்படுத்தலில் டாப் 20 என்ற அந்தஸ்த்திற்குள் வராது காணாமற் போகின்றார்கள்.இதற்கான காரணங்கள் என்ன என்று அலசுவோமா? வாருங்கள். மனம் விட்டுப் பேசி மௌனச் சிறைகளை உடைத்தெறிவோம். ஒரு எளிய உதாரணம். சொல்கிறேன் கேளுங்கள். வலையுலகில் ஒரு பெண் பதிவர் நன்றாகவே கவிதை எழுதுவார். ஒரு கவிதையில்;

"முத்தம் கரிக்கும் எனச் சொன்னார்கள். 

நான் மூன்று வேளையும் 

முத்தம் வேண்டும் என்கிறேன் - காரணம் 

உன் முத்தம் இனிக்கிறது!" 

அப்படீன்னு ஓர் கவிதை எழுதினாங்க. அந்தப் பெண் பதிவரின் பதிவிற்கு பதிவுலக சீர்திருத்த வாதிகள் எனத் தம்மைத் தாமே சொல்லிக் கொள்ளுகின்ற ஓர் குழுவினர் என்ன பண்ணினாங்க தெரியுமா? 

"வாடி! நாம உனக்கு முத்தம் குடுத்து காண்பிக்கிறோம்! முத்தம் இனிக்குதா? கரிக்குதா?அப்படீன்னு ஆராய்ச்சி பண்ணுவோம் என அசிங்கமாக பின்னூட்டங்களை அனுப்பியதோடு அந்தப் பெண்ணை கூகிள் ப்ளஸ், பேஸ்புக் எனப் பல குழுமங்களில் அசிங்க அசிங்கமாக கேள்வி கேட்டிருக்கிறார்கள். அப் பெண்ணின் பர்சனல் டீட்டெயிலை பிஸ்ஸிங் முறையில் சுட்டு பர்சனலாக திருமணமாகி ஒரு குழந்தை உள்ள பதிவர் ஒருவர் இம்சித்திருக்கிறார். இப்போது வரை பிரச்சினை தொடர்பான ஆதாரங்கள் கை வைசம் இருக்கு. இதனை வைத்து கடந்த வருடத்தில் இரு பதிவுகளையும் எழுதிச் சம்பந்தப்பட்டவர்களை கண்டித்திருந்தேன். மேற்படி பிரச்சினை தொடர்பில் அடியேன் சம்பந்தப்பட்ட பதிவுலக அதி மேதாவிகளுடன் பேசினேன். ஆனால் சம்பந்தப்பட்டவர்கள் திருந்துவதாக சொன்னார்கள். உறுதி மொழி வழங்கினார்கள். அப்புறமா பார்த்தா மறுபடியும் அந்தப் பெண் எழுத வந்த போது தமது குரங்கு குணத்தினை ஆரம்பித்து விட்டார்கள். 

இத்தனைக்கும் சம்பந்தப்பட்ட பதிவர்களில் சிலர் மேற்கு நாடுகளில் வாழ்வோர். ஆணுக்குப் பெண் சரி நிகர் சமானம் எனும் பாரதியின் கோட்பாட்டினை அறிந்தவர்கள். ஆனால் ஓர் பெண்ணால் வெளிப்படையாக தன் உணர்வுகளைப் பத்தி எழுதுவதை ஜீரணிக்க முடியாது எனும் ஆணாதிக்க மனப்பாங்கில் இருப்பவர்கள். இவர்களைப் போலப் பல பதிவர்கள் பெண்களின் எழுத்துக்களை அடக்க பதிவுலகில் உள்ளார்கள். ஆனால் இதே போல ஒரு கவிதையினை ஆண் எழுதியிருந்தால் ரசிக்கிறார்கள். பாராட்டுகிறார்கள். வாழ்த்து மழை பொழிகிறார்கள். கில்மாப் பட விமர்சனம் எழுதினால் ஓடோடிப் போய் கும்மியடித்து வரவேற்கிறார்கள். ஆண்கள் எது வேண்டுமானாலும் எழுதலாம். ஆனால் பெண்கள் எதுவுமே எழுதக் கூடாது என்பது தான் வலையுலக வங்குரோத்து அரசியலாக, படித்த, உயர் பதவிகளில் உள்ள சில புத்தி ஜீவிகளால் மேற்கொள்ளப்படுகின்றது. 

நாற்று நிரூபன்

மேற்படி சம்பவம் ஓர் எளிய உதாரணம். இப்படி இன்னும் பல சம்பவங்கள் இருக்கிறது. அது பற்றி இப்போது விவாதிக்க வேண்டிய நேரம் இல்லை என்பதால் பதிவின் உள்ளடக்கத்தோடு உரையாடுவோம்."தேனம்மை லட்சுமணன்” என்கின்ற படைப்பாளியை பதிவராவதற்கு முன்பதாக அடியேன் ஈழத்தில் விகடன் வாயிலாக, அறிந்திருக்கிறேன். அவரின் படைப்புக்களிற்கு விகடனின் ஊடாக கிடைக்கும் வரவேற்பிற்கு சமனாக வலையுலகில் வரவேற்புக்கள் கிடைப்பதில்லை. இதனைப் பதிவர்கள் யாவரும் நன்கறிவோம். ஹேமா என்கின்ற பெண் பதிவர் பல வருடங்களாக எழுதி வருகின்றார். ஆனால் அவரது எழுத்திற்கு கிடைத்த அங்கீகாரம் ரொம்ப கம்மி என்றே கூறலாம்.அதிரா என்கின்ற பெண் பதிவர் ரொம்பவும் நகைச்சுவையான பதிவுகளை + பின்னூட்டங்களை எழுதுகின்றார். நம்மில் எத்தனை பேருக்கு அதிராவை தெரியும்? ஷர்மி என்கிற பதிவர் சுவையாக + சூடான விடயங்களைத் தொட்டுச் செல்கின்றார். ஷர்மியை அறிந்தவர்கள் எத்தனை பேர்? ரேவா என்கிற பெண் பதிவர் கவிதைகளுள் வித்தியாசமான வடிவங்களை கையாண்டு தமிழ்க் கவிதைகளைப் படைக்கிறார். ஆனால் அவற்றுக்கான அங்கீகாரம் எந் நிலையில் கிடைக்கிறது? அடுத்ததாக என்றும் 16 எனும் பெயரில் எழுதும் சகோதரி, இவரது படைப்புக்களை நம்மில் எத்தனை பேர் அறிந்திருப்போம் என்பது கேள்விக்குறியே!

தமிழ்மண டாப் 20 பட்டியலில் உள்ள பதிவர்களை நாம் அறிந்து கொண்ட அளவிற்கு நம்மில் பலர் அறியவில்லை மேற்படி பெண் பதிவர்களை அறிந்து கொள்ளவில்லை. ஆனால் வாய் ஓயா குறையாக எந் நேரமும், நாம் தான் வலை உலகின் வல்லவர்கள் என்று பேச்சு வேறு!! இப்போது புதிதாக களம் புகுந்திருக்கும் தேன் சிட்டு, தென்காசித் தமிழ்ப் பைங்கிளி, யசோதா காந்த் போன்ற பதிவர்களின் பதிவுகளுக்கு கிடைக்கும் அங்கீகாரமானது ரொம்ப கம்மியாகவே இருக்கிறது. ஆனால் அவர்களின் பின்னர் வலை உலகிற்கு வந்து எழுதும் ஆண் பதிவர்களின் பதிவுகள் பிரபலமாகுது.டாப் 20 பட்டியலினுள் வருகிறது. டாப் 20 பட்டியலில் உள்ளவர்களுடன் எனக்கு தனிப்பட்ட போட்டி எதுவும் இல்லை! மீண்டும் சொல்கிறேன் ட்ரேங் ஏதும் என் ப்ளாக்கிற்கு இல்லை எனும் நிலையில்; நடுநிலமையுடன் என் கருத்துக்களை உங்கள் முன் வைக்கின்றேன். சித்தர்களைப் பற்றிப் பதிவிடும் சகோதரி தோழியின் வலைக்குச் செல்லும் வருகையாளர்கள் நம்ம தமிழ்ப் பதிவர்களின் டெய்லி வருகையாளர்களை விட அதிகம். ஆனால் நம்மில் எத்தனை பேருக்கு அவரின் படைப்புக்களைத் தெரியும்?

பதிவுலகத் திரட்டிகளில் சில பெண் பதிவர்களின் பதிவுகளை காண முடியாது. ஆனால் தனிப்பட்ட ரீதியில் அவர்களின் படைப்புக்களிற்கு நல்ல வரவேற்பு கிடைக்கும். இதே போன்று, சமையல் குறிப்புக்களை எழுதும் சில சகோதரிகள் திரட்டிகள் இன்றி அதிக வாசகர்களைப் பெறுகின்றார்கள். திரட்டிகளின் ஊடே ஆண்களின் படைப்புக்கள் மாத்திரம் பிரபலமாகின்றது. வலை உலகில் ஆண் பதிவர்கள் ஆபாசத்துடன், பரபரப்பு தலைப்புக்களை வைத்து எழுதும் அளவிற்கு பெண் பதிவர்களால் எழுத முடியாது. ஏன் ஓர் ஆண் பரபரப்பு தலைப்பு வைத்து பதிவின் உள்ளே காத்திரமான விடயமின்றி மொக்கைப் பதிவு எழுதுவதனை விட, ஓர் பெண் பதிவர் நல்ல தலைப்பில் மிக மிக சூப்பரான பயனுள்ள பதிவினை எழுதியிருப்பார். ஆனால் அந்தப் பதிவுகள் கண்டு கொள்ளப்படாதிருக்கும். ஆனால் என் போன்ற பதிவர்களின் மொக்கைப் பதிவுகள் பலரின் பார்வைக்கும் எட்டுது. 

நாற்று வலையின் ஒரிஜினல் பதிவு

இதற்கான காரணம் என்ன? ஹிட்டு மேனியாவில் பெண் பதிவர்களை நாம் ஓரங்கட்டுகின்றோமா? இல்லை சுதந்திர எழுத்துக்களைப் பெண்கள் பிரசவிகையில் ஆணாதிக்க மனப்பான்மையால் பல ஆண் பதிவர்கள் புறக்கணிக்கிறார்களா?பெண் பதிவர்களையும் எல்லோரும் அறியும் வண்ணம்,ஆண்களின் படைப்புக்களிற்கு வலை உலகில் இருக்கும் மரியாதையினைப் போன்று சம அந்தஸ்த்தினைப் பெற்றுக் கொடுப்பதற்கு நாம் என்ன செய்யலாம்? பெண்களுக்கென்று தனியான தரவரிசைப் பட்டியல் வழங்குவது தொடர்பில் பரிசீலனை செய்யலாமா? அல்லது தமிழ்மணம் போன்ற திரட்டிகளில் ஈழம், அரசியல், மொக்கை எனப் பிரிவுகள் இருப்பது போன்று தனியாகப் பெண் பதிவர்களின் படைப்புக்கள் அடையாளம் கண்டு கொள்ளப்படும் வண்ணம் ஓர் லேபிளினை பெண்கள் எனும் பிரிவின் கீழ் அறிமுகப்படுத்துமாறு கோருவது சிறந்ததா?உங்களின் கருத்துக்களை ஆவலுடன் எதிர்பார்க்கிறேன். அனைத்து உள்ளங்களின் கருத்துக்களையும் பரிசீலித்து தமிழ்மணத்திற்கு ஓர் மடல் அனுப்புகின்றேன்.எம் சகோதரிகளின் கருத்துக்களையும் உலகறியச் செய்யும் வண்ணம் நாமும் சக மனிதர்களாக உழைப்போம்! 

இப் பதிவில் யாரையுமே தாக்கி எழுதலைங்கோ! ஆபாசப் பதிவர், ஹிட்டுக்காக அலையும் பதிவர் என்று என்னை நானே சொல்லியிருக்கேன்! ஸோ...வேறு யாரும் தம்மையும் இந்தப் பட்டியலில் சேர்த்திருப்பதாக தனிப் பதிவு எழுதி மன்னிப்பெல்லாம் கேட்க சொல்ல வேணாம்! நானே இவ் இடத்தில், அப்படி உங்கள் மனம் கோணும் வண்ணம் நான் ஏதாவது சொல்லியிருந்தா மன்னிச்சிடுங்க என்று சொல்லிடுறேன்! வேண்ணா காலில் கூட விழுந்துக்கிறேன்! ஹி...ஹி.. தனித் தனியாக ஒவ்வோர் ப்ளாக்கிற்கும் வந்து மன்னிப்பு கேட்க டைம் இல்லைங்கோ! 

பதிவினை முழுமையாகப் படித்து உங்கள் பின்னூட்டங்களை முன் வைக்குமாறு பணிவன்புடன் வேண்டுகிறேன். இப் பதிவிற்குரிய பின்னூட்டங்களுக்கான பதில்கள் இன்னும் ஐந்து மணி நேரம் கழித்து வழங்கப்படும். அது வரை நான் கொஞ்ச நேரம் பீச்சிற்கு போய் காத்து வாங்கிட்டு வாரேன். மொபைலில் உங்கள் பின்னூட்டங்களைப் படிச்சிட்டுத் தான் இருப்பேனுங்க. ஆனால் கமெண்ட் போடுமளவிற்கு மொபைலில் டைப் செய்ய முடியலைங்க. 

இப் பதிவினை எழுதுமாறு என்னைத் தூண்டிய, சில கருத்துக்களை இப் பதிவு தொடர்பில் வழங்கிய குட்டிச் சுவர்க்கம் வலைப் பதிவின் சொந்தக்காரி, அன்பு அக்கா ஆமினாவிற்கு என் சார்பிலும், அனைத்துப் பதிவர்கள் சார்பிலும் உளமார்ந்த நன்றிகள் உரித்தாகட்டும். 

Share