எனக்கு அது போக மாட்டேங்குது!

வணக்கம், வந்தனம், நமஸ்தே, ஆயுபோவான், அஸ்லாமு அலைக்கும், எல்லோரும் எப்பிடி இருக்கிறீங்கள்?  இன்றைக்கு ஒரு சீரியஸ்ஸான மேட்டரோடை உங்களை நாடி வருகிறேன். சில வேளை உங்களுக்கு இந்தப் பிரச்சினை சிரிப்பை வரவழைக்கலாம். ஆனாலும் இப் பிரச்சினையால் நான் தினம் தினம் படும் வேதனை இருக்கிறதே, அவலம் இருக்கிறதே அது வார்த்தைகளுக்குள் அடக்கமுடியாது.


எனக்கு இப்ப ஒரு ஆறு, ஏழு நாட்களாக அது ஒழுங்காக போக மாட்டேங்குது. ’’டோய் என்ன சும்மா அது இது என்று கதை விடுறாய்? விளக்காமச் சொன்னால் தானே புரியும் என்று முறைக்கிறீர்கள் தானே. என்ன அப்பிடிப் பார்க்கிறீங்க? சொல்ல வெட்கமா இருக்கு, சொன்னால் பேச மாட்டீங்களே? அந்தக் காலமையிலை பல்லை விளக்கிப் போட்டு தண்ணியை வாளியிலை எடுத்துக் கொண்டு போய் அமெரிக்காவின்ரை நாஸா முதல், நடிகைகளின்ரை அந்தரங்க அறை வரை சிந்தித்துக் கொண்டு மனதை ஒரு நிலையில் வைத்துக் கொண்டு இருப்போமே! அது தான் பாருங்கோ. நாங்கள் பிறியா(The place for freedom of thinking) இருந்து யோசிப்போமெல்லே ஒரு இடம். அந்த இடத்திலை போய்க் குந்தினால்; எனக்கு அது வர மாட்டேங்குது.

என்ன இன்னுமா புரியவில்லை. சொல்ல வெட்கமா இருக்குப் போங்கோ. எனக்கு இப்ப ஒரு கொஞ்ச நாளாக கக்கூஸ் அதாங்க ரொயிலெற் ஒழுங்காப் போக மாட்டேங்குது. இது இப்ப, போற வாற இடமெல்லாம் பெரிய பிரச்சியினைத் தருகிறது. ஆரம்பத்திலை வாளியிலை தண்ணியை எடுத்துக் கொண்டு போய் இருந்த ரெண்டு நாளும் ‘சறக்...புறக்...கறக்.....புறக்..........என்று சத்தமா வாய்வு மட்டும் தான் போய்ச்சு. என்ன கொடுமை நல்லுரானே, சந்நிதியானே என்று நினைச்சு நல்லா முக்கி இருந்து பார்த்தேன். ம்......கூம்.. அது போகவே மாட்டேங்குது சகோதரர்களே.

இது ஓவராப் போனாலும் பிரச்சினை, போகாட்டியும் பிரச்சினை எனும் கட்டத்திலை எனக்கு இப்போ போகாட்டிப் பிரச்சினை என்ற நிலமை. வேலைக்குப் போற இடத்திலை அலுவலகத்திலை எங்கடை ஊழியர்களுக்கு முன்னாலையும் ரொய்லெற்ற்குப் போகாட்டி வாற அதே சத்தம் தான் சறுக்......புறுக்.....குறுக்..............விறுக்....புர்........................என்று சத்தம் வந்திட்டுது என்றால் பாருங்களேன்? அவமானமாகவும், வெட்கமாகவும் இருக்கு. ஆட்களுக்கு முன்னு, நாலு பேருக்கு முன்னுக்கு உங்களுக்கு வாய்வு போனால் அது தான் குசு சத்தமாகப் போனால் எப்பிடியிருக்கும்? அதே நிலமை தான் இப்ப எனக்கும் ஏற்பட்டிருக்கிறது.

என்ன செய்ய என்ரை கடவுளே என்று அவசரமாக ஓடிப் போய்  ‘ஆனைப்பந்தியிலை உள்ள டொக்டர் சிவகடாட்சத்தைச் சந்தித்தேன்’ அவர் என்ன சொன்னார் தெரியுமே?

’தம்பி நிரூபன், உங்களுக்கு மலச் சிக்கல் இருக்குது என்று நினைக்கிறேன். இது ஒரு சின்னப் பிரச்சினை தான். (என்னது சின்னப் பிரச்சினையோ, வயித்திலை கல்லைக் கட்டிக் கொண்டு நடக்கிற மாதிரி கழிவெல்லாத்தையும் தேக்கி வைத்திருக்கிற எனக்குத் தான் தெரியும் அது என்ன பிரச்சினை என்று?)ஒரே வழி நீங்கள் நல்லாப் பழங்களை உண்ண வேணும். உந்தப் பெட்டிப் பால்(அதானுங்கோ Nestomalt, Anchor, Viva) குடிக்கிறதை நிறுத்திப் போட்டு இனிமேல் (Fresh) பிரெஷ்சாக பசுப்பாலை வாங்கிப் கொஞ்சம் சீனி போட்டு கொதிக்க வைச்சு இளஞ் சூட்டோடை குடிச்சுப் பாருங்கோ, அதோடை நல்லாப் பப்பாசிப் பழமும், வாழைப் பழமும், உண்ணச் சொல்லிச் சொன்னார்.

நானும் எங்களின் திருநெல்வேலிச் சந்தைக்கு நாயாய் அலைஞ்சு, ஒரு மாதிரிப் பப்பாசிப் பழம், வாழைப் பழம் எல்லாம் வாங்கிச் சாப்பிட்டுப் பார்த்தேன். ம்...கூம்.. எந்த வித மாற்றமும் இல்லை. அரை மணி நேரமா இருந்து முக்கின முக்கிலை ஆட்டுப் புழுக்கை போடுற மாதிரி இரண்டு கட்டியள்(Two small drop's) மட்டும் வந்திச்சு. ஊரிலை உள்ள கடவுள் மாரை எல்லாம் கும்பிட்டு மன்றாடி முக்கி முடிக்கிறதுக்குள்ளை ‘டோய் வெளியிலை வேளைக்கு வாடா’ என்று தம்பி வந்து கதவிலை தட்டுறான். என்ன கறுமம் பிடிச்ச வாழ்க்கை என்று எண்ணவும் தோன்றுது.

இதெல்லாம் சரிவராது என்று நொந்து நூலாகி வேலைக்கும் போன புதன் லீவு போட்டிட்டு முதல் போன டொக்டரும் சரி வர மாட்டார் என்ற நோக்கத்திலை ‘கல்வியங்காடு செந்தில் நாதன்’ டொக்டரிட்டைப் போனேன். அவரிட்டைப் பிரச்சினையைச் சொன்னதும் ஒரு பேதிக் குழுசையைத் தந்து போட்டுச் சொன்னார். இந்தப் ‘பேதிக் குளிசையைக் குடிச்சால்’ ஏற்கனவே உடம்பிலை இருக்கிற கசாளம் எல்லாம் ஒரேயடியா கலக்கிக் கழிவாப் போடும். இதுக்குப் பிறகு ரொய்லெற் ஒழுங்காகப் போகும் என்று.

பேதிக் குளிசை குடிச்ச ஒரு நாள் மட்டும் கொஞ்சம் சுமாராகப் போய்ச்சுது பாருங்கோ. அடுத்த நாள் முதல் இரண்டு சின்ன துண்டுகள் தான். நானும் உந்த உறைப்பான அல்வா மிக்ஸர், பக்கோடா எல்லாம் வேண்டிச் சாப்பிட்டுப் பார்த்தேன். சரியாக மாட்டேங்குது. இறுதியா ஒரே முடிவோடை களத்திலை இறங்கி மிளகாய்த் தூளைக் கூடக் கரைச்சுக் குடிச்சுப் பார்த்தேன். கலக்கிக் கொண்டு போகட்டும் என்று. எதுவுமே வேலைக்கு ஆக மாட்டேங்குது.

என்னோடை அவஸ்தை இருக்கே. அது சொல்லி மாளாது. நீங்கள் தான் ஹெல்ப் பண்ணவேணும் உறவுகளே. ரொயிலெற் போகா விட்டால் உடம்பிலை தேங்கி இருக்கிற கழிவுகள் அதிகமாகி உடலிலை குருதியோடு சேர்ந்து விடும் என்று என் நண்பன் ஒருவன் பெரிய குண்டை வேறை தூக்கிப் போட்டுட்டான். யாருக்காவது ஏதும் வழி தெரியுமே? என்னோடை வாழ்க்கையோடை விளையாடாதீங்கோ. சிரிப்பாக நினைக்காமல் சீரியஸ்ஸாகப் பதில் சொல்லுங்கோ.


இப்பவெல்லாம் கழிவு போகாததாலை உடல் நிறை அதிகமாகி எங்கை பொண்ணுகள் நம்மளை லுக்கு விடாமல் போயிடுவாங்களோ என்று சாப்பிடுறதையே குறைச்சிப் போட்டன் உறவுகளே.

Share